ស្ថានភាពនយោបាយចុងក្រោយបានក្លាយជារបៀបវារៈនៃសន្និបាតគណៈចលនាមហាជនរបស់CPP
គណ:ចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជា នៅថ្ងៃសៅរ៍ទី២១ខែធ្នូនេះ កំពុងបើកមហាសន្និបាតបូកសរុបលទ្ធផលការងាររយៈពេល២ថ្ងៃ ដោយមានការចូលរួមពីមន្ត្រីថ្នាក់ក្រោម២៧០០នាក់។ ក្នុងនោះស្ថានភាពនយោបាយបច្ចុប្បន្នរបស់កម្ពុជា បានក្លាយជារបៀបវារៈសំខាន់មួយនៃមហាសន្និបាតនេះ។
ចុះផ្សាយនៅថ្ងៃ៖
មហាសន្និបាត របស់គណចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជាធ្វើឡើងរយៈពីរថ្ងៃពីថ្ងៃទី២១ដល់ថ្ងៃទី២២ខែធ្នូ នាមជ្ឈមណ្ឌលសន្និបាតកោះពេជ្រ ដឹកនាំដោយលោក សាយ ឈុំ អនុប្រធានគណបក្សប្រជាជនកម្ពុជា និងជាប្រធានគណ:ប្រចាំការនៃគណ:អចិន្ត្រៃយ៍គណបក្សកាន់អំណាចនេះ ដោយមានការចូលរួមពីសមាជិក២៧០០នាក់ ។ តាមគម្រោងលោកនាយករដ្ឋមន្ត្រី ហ៊ុន សែន ប្រធានគណបក្ស នឹងចូលរួមបិទមហាសន្និបាតនេះនៅថ្ងៃទី២២ធ្នូស្អែក។
លោក ហ៊ុន ម៉ានី ប្រធានគណៈចលនាមហាជន នៃគណៈកម្មការធិការកណ្ដាលគណបក្សប្រជាជនកម្ពុជាបានសសេរនៅលើបណ្ដាញសង្គមហ្វេសប៊ុកនៅថ្ងៃសៅរ៍នេះថា ការរៀបចំសន្និបាតគណ:ចលនាមហាជនធ្វើឡើងក្នុងគោលបំណង សរុបលទ្ធផលការងារ ឆ្នាំ២០១៩ និងដាក់ទិសដៅការងារបន្តសម្រាប់ឆ្នាំបន្ទាប់ តាមរយៈការចែករំលែកព័ត៌មាន បទពិសោធន៍ការងារ និងសមទ្ធិផលការងាររបស់គណៈចលនាមហាជន និងគណៈជំនាញ ដែលបានបំពេញកន្លងមក។ ហើយអង្គសន្និបាតក៏នឹងផ្សព្វផ្សាយពីស្ថានភាពនយោបាយ ជូនដល់ថ្នាក់ដឹកនាំគណៈចលនាមហាជន តាមបណ្តា ក្រសួង ស្ថាប័ន រាជធានីខេត្ត និងក្រុងសុ្រក ខណ្ឌទូទាំងប្រទេស។ នេះបើតាមលោក ហ៊ុន ម៉ានី ។
គណៈចលនាមហាជនរបស់គណបក្សប្រជាជនកម្ពុជា ត្រូវបានគេអះអាងថាគឺជាចលនាប្រមូលផ្ដុំកម្លាំងមហាជនគ្រប់ស្រទាប់វណ្ណៈដូចជាៈ កម្មករ កសិករ បុរស នារី និងយុវជនទាំងពីរភេទជាដើម ដើម្បីពូនផ្ដុំជាកម្លាំងចលករមួយក្នុងការជំរុញការអនុវត្តកម្មវិធីនយោបាយរបស់គណបក្សកាន់អំណាច ឲ្យកាន់តែមានប្រសិទ្ធិភាព និងមានផលប្រយោជន៍ជូនប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ