លោកយ៉ែម បុញ្ញឫទ្ធិ៖នៅពេលនេះ បក្សប្រឆាំងកំពុងរៀបចំដាក់ពាក្យសុំដំឡើងអង់តែនទូរទស្សន៍សង្គ្រោះជាតិ
លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានថ្លែងបញ្ជាក់ប្រាប់វិទ្យុបារាំងអន្តរជាតិនៅរសៀលនេះថា នៅពេលនេះ ក្រុមការងារទទួលបន្ទុកបង្កើតទូរទស្សន៍ព្រះអាទិត្យកំពុងរៀបចំឯកសារនានាដើម្បីដាក់ពាក្យស្នើសុំអាជ្ញាធរដំឡើងអង់តែនទូរទស្សន៍។ អ្នកនាំពាក្យរូបនេះ ក៏សង្ឃឹមដែរថា អាជ្ញាធរនឹងអនុញ្ញាតទៅតាមការស្នើសុំរបស់គណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:០៦
បន្ទាប់ពីត្រូវបានអាជ្ញាធរមិនអនុញ្ញាតឲ្យដំឡើងអង់តែនសម្រាប់រៀបចំផ្សាយទូរទស្សន៍ព្រះអាទិត្យជាបន្តបន្ទាប់មក នៅពេលនេះកំណើតទូរទស្សន៍របស់គណបក្សប្រឆាំងកំពុងចាប់ផ្តើមមានពន្លឺបន្តិចឡើងវិញហើយ។ នោះ គឺនៅពេលនេះ គណបក្សសង្គ្រោះជាតិកំពុងតែរៀបចំសំណុំឯកសារនានាដើម្បីដាក់ពាក្យស្នើសុំដំឡើងអង់តែនម្តងទៀត។ ម្តងនេះ គឺគ្រោងសាងសង់លើដីថ្មីក្នុងរាជធានីភ្នំពេញដែលគណបក្សប្រឆាំងអះអាងថាជាអំណោយសប្បុរពីអ្នកគាំទ្ររបស់ខ្លួនម្នាក់និងទើបទទួលបានប្លង់រឹងលើដីដែលតម្លៃជាង២០ម៉ឺនដុល្លារអាមេរិកនេះ។
ទូរទស្សន៍ព្រះអាទិត្យរបស់គណបក្សសង្គ្រោះជាតិ បានទទួលអាជ្ញាប័ណ្ណពីក្រសួងព័ត៌មានតាំងតែពីថ្ងៃទី២៧ខែវិច្ឆិកាឆ្នាំ២០១៤ ប៉ុន្តែត្រូវបានជួបឧបសគ្គជាបន្តបន្ទាប់។ ដំបូងឡើយបក្សប្រឆាំងគ្រោងសាងសង់នៅទួលគោកតែក៏ត្រូវផ្អាកទៅវិញដោយសារតែមានការតវ៉ាមិនឲ្យលើកអង់តែន។ ក្រោយមកបក្សប្រឆាំង ក៏ប្តូរទៅទិញដីនៅក្រុងតាខ្មៅអស់ជាង១០ម៉ឺនដុល្លារ តែក៏ត្រូវរាំងស្ទះទៀតដោយសារតែការផ្ទេរកម្មសិទ្ធិនិងរឿងហេតុផ្សេងៗទៀតដូចជាការទាមទារដកលុយវិញពីសំណាក់អ្នកចូលលុយពីមុនៗជាដើម។
សម្រាប់លើកនេះវិញ លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិសង្ឃឹមថា អាជ្ញាធរនឹងអនុញ្ញាតទៅតាមការស្នើសុំ ព្រោះថា ដីដែលគ្រោងដំឡើងអង់តែននោះ គឺជាដីស្រែមិនសូវមានមនុស្សរស់នៅ។ លោកយ៉ែម ប៉ុញរិទ្ធ បដិសេធមិនប្រាប់ឡើយថា ដីថ្មីនោះមានទីតាំងនៅកន្លែងណាទេ គ្រាន់តែថានៅក្នុងរាជធានីភ្នំពេញប៉ុណ្ណោះ។
សូមបញ្ជាក់ថា គណបក្សប្រឆាំងគ្រោងចំណាយលុយ៣លានដុល្លារសម្រាប់បង្កើតទូរទស្សន៍ថ្មីនេះ ហើយក៏បានរៃអង្គាសប្រាក់ពីសប្បុរសជនទាំងក្នុងនិងក្រៅប្រទេសបានចំនួនជាង៧០ម៉ឺនដុល្លារផងដែរ។ បើតាមលោកយ៉ែម បុញ្ញឫទ្ធិ លុយទាំងនេះ កំពុងតែតម្កល់ទុកនៅក្នុងធនាគារមិនមានអ្នកណាប៉ះពាល់ឡើយ មិនដូចការរិះគន់របស់មជ្ឈដ្ឋានខ្លះដែលថាគណបក្សយកលុយទាំងនោះទៅចាយអស់ទេ។
បើទោះបីនៅពេលនេះ ទូរទស្សន៍គណបក្សសង្គ្រោះជាតិកំពុងមានវិវដ្ឋទៅមុខខ្លះៗក៏ពិតមែន ក៏ប៉ុន្តែវាសនារបស់ទូរទស្សន៍ថ្មីនេះ នៅមិនប្រាកដប្រជានៅឡើយទេ ព្រោះថាដំណើរការស្នើសុំដំឡើងអង់តែនលើដីថ្មីត្រូវឆ្លងកាត់ដំណាក់កាលជាច្រើន។ ហេតុដូច្នេះហើយ ទើបលោកយ៉ែម បុញ្ញឫទ្ធិ ពិបាកបញ្ជាក់ថា ទូរទស្សន៍ថ្មីនេះនឹងអាចដំណើរការផ្សាយបាននៅពេលណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ