ក្រុមពលករខ្មែរនៅកូរ៉េខាងត្បូងធ្វើយុទ្ធនាការពាក់ស្រោមមុខខ្មៅក្រោមហេតុផលទាមទារសេរីភាព
«សូមកូនខ្មែរក្រោកឡើង ប្រយុទ្ធដើម្បីសេរីភាព» គឺជាឈ្មោះយុទ្ធនាការរបស់ក្រុមពលករខ្មែរនៅប្រទេសកូរ៉េខាងត្បូង តាមរយៈបណ្តាញហ្វេសប៊ុក ខណៈលោក សម រង្ស៊ី ប្រកាសធ្វើមាតុភូមិនិវត្តន៍មកកម្ពុជានៅថ្ងៃ៩វិច្ឆិកាខាងមុខ។ យុទ្ធនាការនេះធ្វើដោយអ្នកចូលរួមម្នាក់ៗសុទ្ធតែពាក់ស្រោមមុខពណ៌ខ្មៅ គឺដូចនឹងអ្វីដែលក្រុមបាតុករនៅទីក្រុងហុងធ្វើបាតុកម្មរាប់ខែមកនោះដែរ។ ប៉ុន្តែ ពីខាងរដ្ឋាភិបាលកម្ពុជាវិញ បានចាត់ទុកយុទ្ធនាការ នេះថាធ្វើឡើង ដោយក្រុមពលករ«មួយក្តាប់តូច»ដែលចាញ់បោកអ្នកនយោបាយបក្សប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
លោក យឹម ស៊ីណន តំណាងចលនាយុវជនគណបក្សសង្រ្គោះជាតិប្រចាំប្រទេសកូរ៉េខាងត្បូងបានបញ្ជាក់ថា យុទ្ធនាការពាក់ស្រោមមុខពណ៌ខ្មៅនេះ គឺចាប់ផ្តើមធ្វើកាលពីថ្ងៃអាទិត្យ២៩កញ្ញារហូតដល់ថ្ងៃ៩វិច្ឆិកា ជាពេលកំណត់ដែលលោក សម រង្ស៊ី ធ្វើមាតុភូមិនិវត្តន៍មកដល់កម្ពុជា។
ថ្វីត្បិតយុទ្ធនាការតាមហ្វេសប៊ុកនេះ ទើបតែកើតចេញពីប្រទេសកូរ៉េខាងត្បូង តែ លោក យឹម ស៊ីណន អះអាងថា នេះជាយុទ្ធនាការ«សកល»របស់ពលរដ្ឋខ្មែរនៅទូទាំងពិភពលោក ជាពិសេសពលរដ្ឋខ្មែរនៅប្រទេសកម្ពុជាផងដែរ។
ជាកត់សំគាល់ យុទ្ធនាការពាក់ស្រោមមុខខ្មៅបែបនេះ គឺស្រដៀងគ្នានឹងអ្វីដែលក្រុមបាតុករនៅទីក្រុងហុងធ្វើឡើងរាប់ខែមកនេះ ដើម្បីទាមទារឲ្យមេដឹកនាំក្រុងហុងកុងចុះចេញពីតំណែងនោះដែរ។ ប៉ុន្តែមេដឹកនាំយុទ្ធនាការរបស់ពលករខ្មែរ នៅកូរ៉េខាងត្បូង អះអាងថា ការជ្រើសរើសវិធីសាស្ត្រតស៊ូមតិបែបនេះ គឺជាការគិតឃើញ និងសម្រេចជារួមរបស់ក្រុមយុវជនខ្មែរនៅកូរ៉េ ពោលមិនបានយកគំរូតាមក្រុមបាតុករនៅហុងកុងនោះឡើយ។
ពីខាងរដ្ឋាភិបាលកម្ពុជាវិញមិនឲ្យតម្លៃសោះឡើយចំពោះយុទ្ធនាការបែបនេះរបស់ពលករខ្មែរដែលមាននិន្នាការគាំទ្របក្សប្រឆាំង។ លោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េខាងត្បូងបានប្រាប់វិទ្យុបារាំងអន្តរជាតិRFIតាមតេឡេក្រាមថា យុទ្ធនាការរបស់ពលករខ្មែរ«មួយក្រុមតូចនេះ» គឺធ្វើឡើងតាមលំនាំបាតុករនៅទីក្រុងហុងកុង ដោយលោកថា អ្នកទាំងនោះចាញ់បោកអ្នកនយោបាយបក្សប្រឆាំងដែលត្រូវតុលាការរំលាយចោល។ លោក ឡុង ឌីម៉ង់ ចាត់ទុកសកម្មភាពនេះថាជាទង្វើខុសច្បាប់។ប៉ុន្តែការធ្វើយុទ្ធនាការដោយពាក់ម៉ាស់ពណ៌ខ្មៅបែបនេះ ត្រូវបាន លោក យឹម ស៊ីណន ពន្យល់ថា ដើម្បីការពារសុវត្ថិភាពអ្នកទាំងនោះ និងជំរុញឲ្យពួកគេហ៊ានបញ្ចេញមតិនិងរិះគន់ចំណុចមិនល្អរបស់រដ្ឋាភិបាលសព្វថ្ងៃប្រាប់ទៅពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ