អាជ្ញាធរក្រុងភ្នំពេញរារាំងយុទ្ធនាការជិះកង់របស់ក្រុមស្រ្តីក្នុងទិវាសិទ្ធិនារីអន្តរជាតិ៨មីនា
អាជ្ញាធរក្រុងភ្នំពេញ កាលពីព្រឹកមិញ បានរារាំងយុទ្ធនាការជិះកង់របស់ក្រុមអង្គការសង្គមស៊ីវិលដែលភាគច្រើនគឺជាស្រ្តី នៅក្នុងថ្ងៃប្រារព្ធទិវាសិទ្ធិនារីអន្តរជាតិ៨មីនា។ អាជ្ញាធរបានអះអាងថា ការរារាំងនេះ គឺដើម្បីរក្សាសណ្តាប់ធ្នាប់សាធារណៈនិងបង្កាការកកស្ទះចរាចរណ៍។ ចំណែកឯក្រុមអង្គការសង្គមស៊ីវិលវិញបានហៅសកម្មភាពនេះថា គឺជាការបំបិទសិទ្ធិសេរីភាពនៅថ្ងៃសិទ្ធិនារី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
បើទោះជាដឹងហើយថា អាជ្ញាធរពុំបានអនុញ្ញាតច្បាប់ឲ្យមានការជួបជុំគ្នាជិះកង់នៅថ្ងៃនេះក្តី តែក្រុមស្រ្តី ដែលមកពីបណ្តាញអង្គការសង្គមស៊ីវីលជាតិ និងអន្តរជាតិប្រមាណជា៣០០នាក់ បានបន្តមកជួបជុំគ្នាតាមការគ្រោងទុក។ ការជួបជុំគឺធ្វើឡើងនៅមុខទីស្តីការក្រសួងកិច្ចការនារីស្ថិតនៅភូមិដំណាក់ធំបី សង្កាត់ស្ទឹងមានជ័យ រាជធានីភ្នំពេញមុនពេលពួកគេចាប់ផ្តើមយុទ្ធនាការជិះកង់យកញត្តិទៅដាក់នៅក្នុងរដ្ឋសភា។ ក៏ប៉ុន្តែនៅទីបំផុតទៅ ក្បួនជិះកង់របស់ពួកគេ ត្រូវបានរារាំងដោយអាជ្ញាធរខណ្ឌប្រមាណជា១០០ម៉ែត្រ ពីទីស្តីការក្រសួងកិច្ចការនារី។ ការជួបជុំជិះកង់របស់ក្រុមស្រ្តីនៅក្នុងទិវាសិទ្ធិនារីអន្តរជាតិ៨មិនានៅថ្ងៃនេះ គឺដើម្បីផ្សព្វផ្សាយពីសិទ្ធិស្ត្រី និងលុបបំបាត់អំពើហិង្សាលើស្ត្រីនៅគ្រប់រូបភាព ក្រោមប្រធានបទ "បញ្ឈប់ហិង្សាលើស្ត្រី"។
សម្រាប់អាជ្ញាធរ យុទ្ធនាការជិះកង់របស់បណ្តាញក្រុមស្រ្តីទាំងនេះ គឺធ្វើឲ្យប៉ះពាល់ដល់សន្តិសុខ សុវត្ថិភាពសង្គម, ខូចសណ្តាប់ធ្នាប់ និងរបៀបរៀបរយសាធារណៈ និងបង្កឲ្យកកស្ទះចរាចរណ៍ជាដើម។ ហើយម្យ៉ាង នៅចំនឹងថ្ងៃនេះតែម្តងក៏មានយុវជនមួយក្រុមទៀត បានរៀបចំយុទ្ធនាការជិះកង់ដូចគ្នានេះ ដើម្បីលើកស្ទួយវិស័យទេសចរណ៍ និងមនុស្សធម៌ផងដែរ។ ចំណែកឯក្រុមស្រ្តី ដែលរងការរារាំងនៅថ្ងៃនេះ បានហៅសកម្មភាពនេះថា គឺជាការបំបិទសិទ្ធិសេរីភាពនៅថ្ងៃប្រារព្ធទិវាសិទ្ធិរបស់ខ្លួនទៅវិញ។
គួរបញ្ជាក់ថា នៅក្នុងពេលជួបជុំគ្នា កាលពីព្រឹកថ្ងៃទី៨មីនា ក្រុមស្ត្រីដែលអះអាងថា មកពីបណ្តាញអង្គការសង្គមស៊ីវិល និងសហគមន៍រងគ្រោះដីធ្លីនៅភ្នំពេញ មួយចំនួនបានពាក់មួកត្នោត ដោយនៅនឹងដៃមានកាន់ទង់ជាតិ និងបដាដោយមានការសរសេរពាក្យស្លោកជាច្រើន មានជាអាថ៌៖ “ទាំងអស់គ្នាដើម្បីស្រ្តី ស្រ្តីជាប្រភពនៃសន្តិភាព”, “សូមពង្រឹងការអនុវត្តច្បាប់ ដើម្បីផ្តល់យុត្តិធម៌ដល់ស្រ្តី” និងពាក្យស្លោកថា “ខ្ញុំមិនប្រើហិង្សាលើស្រ្តីជាដាច់ខាត! ចុះអ្នកវិញ?
យោងតាមសេចក្ដីថ្លែងការណ៍របស់បណ្តាញស្ត្រីអង្គការសង្គមស៊ីវិល កាលពីថ្ងៃទី៧មីនា ប្រទេសកម្ពុជា គឺជាប្រទេសមួយដែលកំពុងស្ថិតក្នុងកាលៈទេសៈមួយ ដែលប្រឈមទៅនឹងការរំលោភសិទ្ធិស្ត្រីយ៉ាងធ្ងន់ធ្ងរ ក្នុងវិស័យកាត់ដេរ វិស័យដីធ្លី វិស័យធនធានធម្មជាតិ វិស័យសេដ្ឋកិច្ចក្រៅប្រព័ន្ធ វិស័យស្ត្រីនៅក្នុងសេវាកម្មកម្សាន្ត វិស័យនយោបាយ ស្ត្រីដែលបម្រើការងារតាមផ្ទះ ស្ត្រីធ្វើចំណាកស្រុកទៅក្រៅប្រទេស និងស្រ្តីក្នុងវិស័យផ្សេងៗទៀត។
សូមបញ្ជាក់ថា ឆ្នាំនេះ គឺជាខួបលើកទី១០៥ នៃទិវាសិទ្ធិនារីអន្តរជាតិ៨មីនា។ នៅថ្ងៃនេះ រាជរដ្ឋាភិបាលកម្ពុជាក៏បានប្រារព្ធទិវាដូចគ្នានេះដែរ ក្រោមប្រធានបទ “វិនិយោគលើសមភាពយេនឌ័រ ដើម្បីកិច្ចអភិវឌ្ឍប្រកបដោយចីរភាព”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ