ក្រសួងព័ត៌មានពន្យល់ពីលក្ខខណ្ឌនៃការបើកវិទ្យុ VOA និង RFA នៅកម្ពុជាឡើងវិញ
រដ្ឋមន្ដ្រីក្រសួងព័ត៌មាន លោក ខៀវ កាញារីទ្ធ នៅថ្ងៃទី២៥មករានេះ បានផ្ញើលិខិតមួយទៅកាន់រដ្ឋមន្ដ្រីក្រសួងការបរទេស លោក ប្រាក់ សុខុន ដើម្បីពន្យល់ពីនិតីវិធីនៃការបើកដំណើរការឡើងវិញ នូវការិយាល័យតំណាងវិទ្យុអាស៊ីសេរី RFA និងវិទ្យុសំឡេងសហរដ្ឋអាមេរិក VOA នៅកម្ពុជា។ បើតាមរដ្ឋមន្ដ្រីក្រសួងព័ត៌មាន ការបើកការិយាល័យវិទ្យុ VOA និង RFA នៅកម្ពុជាឡើងវិញបាន ល្គឹកណាវិទ្យុទាំងពីរនេះ គោរពកាតព្វកិច្ចសារពើពន្ធជាមុនសិន។
ចុះផ្សាយនៅថ្ងៃ៖
សេចក្ដីពន្យល់បំភ្លឺរបស់ក្រសួងព័ត៌មាននាថ្ងៃទី២៥មករានេះ ធ្វើឡើងជាការឆ្លើយតបនឹងសេចក្ដីថ្លែងការណ៍របស់ក្រសួងការបរទេសកម្ពុជា ចុះថ្ងៃទី០៣ ខែធ្នូ ឆ្នាំ២០១៨។ ជាសេចក្ដីថ្លែងការណ៍ដែលគូសបញ្ជាក់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្ដួចផ្ដើមគំនិតបិទការិយាល័យតំណាងរបស់ខ្លួន ដោយខ្លួនឯង។ ហេតុដូច្នេះ វិទ្យុទាំងពីរនេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញបានដែរ។ នេះបើតាមសេចក្ដីថ្លែងការណ៍របស់ក្រសួងការបរទេសកម្ពុជា។
ជាការឆ្លើយតប ក្រសួងព័ត៌មាន បានរំឭកប្រាប់ក្រសួងការបរទេស អំពីវត្តមាននៃវិទ្យុសំឡេងសហរដ្ឋអាមេរិក VOA និងវិទ្យុអាស៊ីសេរី នៅកម្ពុជា។ បើតាមក្រសួងព័ត៌មាន វិទ្យុទាំងពីរនេះ បានធ្វើសកម្មភាពផ្សព្វផ្សាយព័ត៌មាន និងបើកការិយាល័យរបស់ខ្លួននៅកម្ពុជា អស់រយៈពេលជាយូរឆ្នាំ ដោយពុំបានចុះបញ្ជីនៅក្រសួងព័ត៌មាន និងមិនបានអនុវត្តកាតព្វកិច្ចចុះបញ្ជីពន្ធដារស្របតាមច្បាប់ទេ។ ការបិទការិយាល័យតំណាងនៅកម្ពុជារបស់វិទ្យុទាំងពីរនេះ ក៏ធ្វើឡើងដោយគ្មានការជូនដំណឹងដល់អាជ្ញាធរមានសមត្ថកិច្ចដែរ។
ទាក់ទងនឹងទៅសេចក្ដីថ្លែងការណ៍របស់ក្រសួងការបរទេស ដែលបញ្ជាក់ថា វិទ្យុអាស៊ីសេរីនិងវិទ្យុសំឡេងសហរដ្ឋអាមេរិក មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញ, ក្រសួងព័ត៌មានបញ្ជាក់ថា អាចធ្វើទៅបាន ល្គឹកណាវិទ្យុទាំងពីរនេះ គោរពកាតព្វកិច្ចសារពើពន្ធជាមុនសិន។
សូមរំឭកជូនថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានសម្រេចបិទការិយាល័យរបស់ខ្លួននៅកម្ពុជា នៅឆ្នាំ២០១៧។ កាលណោះ ក្រសួងពាក់ព័ន្ធព្រមានចាត់វិធានការតាមផ្លូវច្បាប់ ក្រោយរកឃើញថា វិទ្យុទាំងពីរនេះ បានបើកការិយាល័យរបស់ខ្លួនដោយគ្មានច្បាប់អនុញ្ញាត និងមិនបានបង់ពន្ធជូនរដ្ឋ។ វិទ្យុអាស៊ីសេរី បានហៅចំណាត់ការរបស់អាជ្ញាធរដូច្នេះ ថាជាការបង្ក្រាបលើប្រព័ន្ធផ្សព្វផ្សាយ។ ប៉ុន្តែនៅក្នុងសេចក្ដីថ្លែងការណ៍ចុះថ្ងៃទី០៣ ខែធ្នូ ឆ្នាំ២០១៨ ក្រសួងការបរទេសកម្ពុជាបានសង្កត់ធ្ងន់ថា រដ្ឋាភិបាល មានការប្ដេជ្ញាចិត្តយ៉ាងមោះមុត ក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ