បញ្ហា EBA៖ អឺរ៉ុបថា នៅតែបើកទ្វារចរចាជាមួយកម្ពុជា
ប្រមុខការទូតកម្ពុជា លោក ប្រាក់ សុខុន កាលពីថ្ងៃចន្ទ ទី២១មករា បានជួបពិភាក្សាការងារជាមួយស្នងការពាណិជ្ជកម្មសហភាពអឺរ៉ុប លោកស្រី Cecilia Malmstrom ក្នុងឱកាសលោកចូលរួមកិច្ចប្រជុំរដ្ឋមន្ដ្រីការបរទេសអាស៊ានអឺរ៉ុប នៅទីក្រុងព្រុចស៊ែល ប្រទេសប៊ែលហ្ស៊ិក។ នៅក្នុងជំនួបនោះ ភាគីទាំងពីរបានជជែកអំពីបញ្ហា EBA។ បញ្ហា EBA ដែលលោកស្រីស្នងការពាណិជ្ជកម្មសហភាពអឺរ៉ុប អះអាងថា អឺរ៉ុបនៅតែបើកទ្វារចរចាជាមួយកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
បើកទ្វារចរចាអំពីបញ្ហា EBA ក៏ពិតមែន ប៉ុន្តែស្នងការពាណិជ្ជកម្មសហភាពអឺរ៉ុបថា អឺរ៉ុប នៅតែបារម្ភអំពីលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋនៅកម្ពុជា។នេះគឺជាអ្វីដែលលោកស្រី Cecilia Malmstrom ស្នងការពាណិជ្ជកម្មសហភាពអឺរ៉ុប សរសេរនៅលើទំព័រធ្វីតធឺរបស់លោកស្រី កាលពីថ្ងៃចន្ទ ទី២១មករា ក្រោយជំនួបជាមួយប្រមុខការទូតកម្ពុជា លោក ប្រាក់ សុខុន។ ប្រមុខការទូតកម្ពុជា លោក ប្រាក់ សុខុន ក៏បានបញ្ជាក់អំពីជំនួបពិភាក្សាការងារជាមួយលោកស្រី Cecilia Malstrom តាមរយៈហ្វេសប៊ុកផងដែរ ប៉ុន្តែខ្លឹមសារនៃជំនួបនោះ មិនត្រូវបានលោករដ្ឋមន្ដ្រីបង្ហើបឲ្យដឹងទេ។
សូមរំឭកបន្តិចថា កាលពីថ្ងៃទី០៥តុលាឆ្នាំ២០១៨កន្លងទៅ លោកស្រី Cecilia Malstrom ស្នងការអឺរ៉ុបសម្រាប់វិស័យពាណិជ្ជកម្ម បានជូនដំណឹងដល់កម្ពុជាថា សហភាពអឺរ៉ុបកំពុងអនុវត្តដំណើរការដកហូតប្រព័ន្ធអនុគ្រោះពន្ធ EBA ពីកម្ពុជា ដោយសារតែគ្មានកែលម្អច្បាស់លាស់និងជាក់ស្ដែង ទាក់ទងនឹងបញ្ហាសិទ្ធិមនុស្សនិងសិទ្ធិការងារនៅកម្ពុជា។
ដំណើរការនីតិវិធីនេះត្រូវចំណាយពេលសរុប ១២ខែ ដោយត្រូវចែកចេញជាពីរដំណាក់កាល។ ដំណាក់កាលទី១ គឺនៅក្នុងរយៈពេល ៦ខែ រាប់ចាប់តាំងពីថ្ងៃដែលសេចក្តីសម្រេចចាប់ផ្តើមនីតិវិធីព្យួរ ប្រព័ន្ធអនុគ្រោះពន្ធ។ នៅក្នុងអំឡុងពេលនេះ គណៈកម្មការអឺរ៉ុបនៅតែបើកទ្វារចំហក្នុងការជជែកជាមួយនឹងប្រទេស ដែលជាកម្មវត្ថុនៃនីតិវិធីព្យួរប្រព័ន្ធអនុគ្រោះពន្ធ EBA។ ដំណាក់កាលទី២ ដែលមានរយៈពេល ៦ខែដែរ គឺជាដំណាក់កាលនៃការចេញរបាយការណ៍ និងសេចក្តីសន្និដ្ឋាន ដើម្បីឈានទៅចេញសេចក្តីសម្រេចចុងក្រោយ។ ការសម្រេចនោះ ត្រូវប្រើពេល៦ខែទៀត មុនពេលចូលជាធរមាន និងឈានទៅអនុវត្ត។
រដ្ឋាភិបាលកម្ពុជាបានទទួលស្គាល់ថា ប្រព័ន្ធអនុគ្រោះពន្ធ EBA ផ្ដល់ផលចំណេញដល់កម្ពុជា ខណៈវិស័យឯកជនវិញ បានសម្ដែងក្ដីបារម្ភចំពោះការដកប្រព័ន្ធអនុគ្រោះពន្ធ EBA ពីកម្ពុជា។ លិខិតចុះថ្ងៃទី២១មករារបស់តំណាងវិស័យឯកជនចំនួន៣៩ស្ថាប័ននៅកម្ពុជា បានគូសបញ្ជាក់ថា អវត្តមាន EBA នឹងធ្វើឲ្យប៉ះពាល់ដោយផ្ទាល់ដល់ជីវភាពរស់នៅរបស់កម្មករ និងក្រុមគ្រួសាររបស់ពួកគេរាប់លាននាក់ ដែលអាស្រ័យការងារនៅក្នុងវិស័យកាត់ដេរនៅកម្ពុជា។ មិនតែប៉ុណ្ណោះ វាក៏នឹងរុញច្រានឲ្យពួកគេខិតទៅរកហានិភ័យនៃការវិលត្រឡប់ទៅរកភាពក្រីក្រឡើងវិញថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ