ឆ្នាំ២០១៨៖ ចំនួនឈ្មោះក្នុងបញ្ជីបោះឆ្នោតផ្លូវការកើនឡើងដល់ ៨លាន៥សែននាក់
គណៈកម្មាធិការជាតិរៀបចំការបោះឆ្នោត ហៅកាត់ថា គជប នៅថ្ងៃព្រហស្បតិ៍ម្សិលមិញ បានផ្ដល់សុពលភាព និងប្រកាសផ្សាយលទ្ធផលផ្លូវការនៃបញ្ជីបោះឆ្នោត ឆ្នាំ២០១៨។ លទ្ធផលនៃបញ្ជីបោះឆ្នោតឆ្នាំ២០១៨ បង្ហាញថា ចំនួនឈ្មោះក្នុងបញ្ជីបោះឆ្នោតកើនឡើងដល់៨លាន៥សែននាក់។
ចុះផ្សាយនៅថ្ងៃ៖
នៅក្នុងពិធីប្រកាសផ្ដល់សុពលភាពបញ្ជីបោះឆ្នោត ឆ្នាំ២០១៨ រៀបចំធ្វើនៅទីស្ដីការ គជប នៅថ្ងៃទី២៧ខែធ្នូ លោក ឌុច សុន សមាជិក គជប បានថ្លែងឲ្យដឹងថា ការប្រកាសផ្ដល់សុពលភាពបញ្ជីបោះឆ្នោត ឆ្នាំ២០១៨ នេះ ធ្វើឡើងក្រោយពេល គជប បិទបញ្ចប់ការដោះស្រាយបណ្ដឹងតវ៉ានិងបណ្ដឹងជំទាស់ចប់រួចរាល់។ នេះគឺជាការប្រកាសបិទផ្លូវតវ៉ា មានន័យថា ពលរដ្ឋលែងមានឱកាសប្ដឹងតវ៉ាឬជំទាស់នឹងបញ្ជីឈ្មោះបោះឆ្នោតថ្មីនេះទៀតហើយ។
បើតាមការប្រកាសរបស់ គជប នៅថ្ងៃទី២៧ខែធ្នូ ចំនួនឈ្មោះក្នុងបញ្ជីបោះឆ្នោតឆ្នាំ២០១៨ កើនឡើងដល់៨លាន៥សែននាក់ (៨,៥៤៤,៨៨៥នាក់) ស្មើនឹង ៨៦,២៤% នៃចំនួនអ្នកគ្រប់អាយុបោះឆ្នោតសរុបដែលមានជិត១០លាននាក់។ ក្នុងនោះ អ្នកចុះឈ្មោះបោះឆ្នោតថ្មីមានចំនួនជិត២សែននាក់ (១៩៥,៣៨៥នាក់) ឈ្មោះអ្នកបោះឆ្នោតដែលត្រូវលុបចេញពីបញ្ជីមានចំនួនជាង៥ម៉ឺននាក់ (៥៦,៩៤១នាក់) និងឈ្មោះប្រជាពលរដ្ឋស្នើសុំកែតម្រូវទិន្នន័យមានចំនួនប្រមាណ១ពាន់នាក់ (១,៥៥៣នាក់)។
បញ្ជីឈ្មោះបោះឆ្នោតផ្លូវការឆ្នាំ២០១៨នេះ នឹងត្រូវផ្សព្វផ្សាយជាសាធារណៈនៅថ្ងៃទី៣១ ខែធ្នូ។ គជប ក៏នឹងបញ្ជូនបញ្ជីផ្លូវការនេះ ទៅរក្សាទុកជាឯកសារនៅលេខាធិការដ្ឋានរាជធានីខេត្តរៀបចំការបោះឆ្នោត និងនៅតាមសាលាឃុំ សង្កាត់ ទាំង ១៦៤៦ ទូទាំងប្រទេស។
គួររំឭកថា ការចុះឈ្មោះបោះឆ្នោតឆ្នាំ២០១៨ និងការពិនិត្យបញ្ជីឈ្មោះ ត្រូវបាន គជប រៀបចំធ្វើរយៈពេល១៨ថ្ងៃ ចាប់ពីថ្ងៃទី០១ ខែតុលា ដល់ថ្ងៃទី១៨ខែតុលាកន្លងទៅ។ បើតាមទិន្នន័យ គជប ត្រូវចុះឈ្មោះបោះឆ្នោតថ្មីជិត៥សែននាក់នៅក្នុងឆ្នាំ២០១៨ បន្ថែមលើឈ្មោះនៅក្នុងបញ្ជីបោះឆ្នោតឆ្នាំ២០១៧ ដែលមានចំនួនជាង៨លាន៣សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ