លោក សម រង្ស៊ី ដាក់លិខិតទៅសហភាពអឺរ៉ុប ក្រោយសកម្មជនរបស់ខ្លួនត្រូវសមត្ថកិច្ចកោះហៅទៅសាកសួរ
លោក សម រង្ស៊ី នៅថ្ងៃទី២៦ធ្នូ ម្សិលមិញ បានដាក់លិខិតទៅសហភាពអឺរ៉ុប ដោយចោទអាជ្ញាធរកម្ពុជាថានៅតែគំរាមកំហែងសកម្មជនសង្គ្រោះជាតិដែលធ្វើសកម្មភាពគាំទ្រខ្លួននៅកម្ពុជា។ លិខិតរបស់លោក សម រង្ស៊ី ធ្វើឡើងក្រោយពីសកម្មជនសង្គ្រោះជាតិ ត្រូវកោះហៅទៅសាកសួរ ដោយសារការបង្ហោះវីដេអូគាំទ្រលោក សម រង្ស៊ី ជាប្រធានស្ដីទីសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០១:៥៨
ការកោះហៅសកម្មជនអតីតគណបក្សសង្គ្រោះជាតិ ទៅសាកសួរ បង្ហាញឲ្យឃើញពីការមិនអើពើលើស្មារតីនៃអនុសាសន៍របស់សហភាពអឺរ៉ុប ចំពោះស្ថានភាពនយោបាយនៅកម្ពុជា ធ្វើនៅស្ត្រាស់បួរ ក្នុងខែកញ្ញា កន្លងទៅ។ នេះបើតាមលិខិតរបស់លោក សម រង្ស៊ី ដែលត្រូវបានជ្រើសតាំងជាប្រធានស្ដីទីអតីតគណបក្សសង្គ្រោះជាតិ ចុះថ្ងៃទី២៦ ខែធ្នូ។
សូមរំឭកជូនថា កាលពីសប្ដាហ៍មុន សកម្មជនសង្គ្រោះជាតិម្នាក់នៅស្រុកស្អាង ខេត្តកណ្ដាល បានអះអាងថា ខ្លួនត្រូវបានសមត្ថកិច្ចកោះហៅទៅសាកសួរ ដោយសារការបង្ហោះវីដេអូគាំទ្រលោក សម រង្ស៊ី ជាប្រធានស្ដីទីអតីតគណបក្សសង្គ្រោះជាតិ និងគាំទ្រស្មារតីនៃពាក្យស្លោក សម រង្ស៊ី និង កឹម សុខា ជាមនុស្សតែមួយ។ លោក លី ម៉េងយៀង តាមរយៈបណ្ដាញសង្គមហ្វេសប៊ុក បានគូសបញ្ជាក់ថា ក្រោយការសាកសួរលោកអស់៤ម៉ោង លោកត្រូវបានសមត្ថកិច្ចតម្រូវឲ្យធ្វើកិច្ចសន្យាឈប់បង្ហោះវីដេអូឃ្លីបគាំទ្រគណបក្សសង្គ្រោះជាតិតទៅទៀត មុននឹងអនុញ្ញាតឲ្យវិលត្រឡប់ទៅផ្ទះវិញ។
ក្រៅពីចោទអាជ្ញាធរកម្ពុជាថា នៅតែបន្តគំរាមកំហែងសកម្មជនសង្គ្រោះជាតិដែលធ្វើសកម្មភាពគាំទ្រខ្លួននៅកម្ពុជា លោក សម រង្ស៊ី បានអំពាវនាវឲ្យសហគមន៍អន្ដរជាតិ ដាក់ទណ្ឌកម្មកាន់តែខ្លាំងនិងកាន់តែឆាប់លើរដ្ឋាភិបាលកម្ពុជា។ ជាទណ្ឌកម្មប្រឆាំងនឹងមន្ដ្រីជាន់ខ្ពស់នៃរដ្ឋាភិបាលកម្ពុជា និងអនុវត្តការផ្អាកការអនុគ្រោះផ្នែកពាណិជ្ជកម្មសេរីជាដើម។ បើតាម លោក សម រង្ស៊ី គឺមានតែទណ្ឌកម្មដែលប៉ះពាល់ដល់ផលប្រយោជន៍ផ្ទាល់របស់របបលោក ហ៊ុន សែន ទេ ទើបអាចធ្វើឲ្យរបបនេះប្រតិកម្មតបវិញបាន។
គួរជម្រាបថា បន្ទាប់ពីលោក សម រង្ស៊ី ប្រកាសចូលស្រុកវិញនៅឆ្នាំក្រោយ សកម្មជនអតីតគណបក្សសង្គ្រោះជាតិបានបន្តថ្លែងសារគាំទ្រ និងត្រៀមខ្លួនត្រឡប់ទៅចូលរួមជីវភាពនយោបាយជាមួយ លោក សម រង្ស៊ី វិញ។ លោកនាយករដ្ឋមន្ដ្រី ហ៊ុន សែន បានប្រកាសស្វាគមន៍ដំណើរវិលត្រឡប់របស់លោក សម រង្ស៊ី ដែរ ដោយត្រៀមខ្នោះដើម្បីទទួលលោក សម រង្ស៊ី រួចជាស្រេច។ លោក ហ៊ុន សែន ថា គ្មានឡើយការលើកលែងទោសដល់លោក សម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ