អង្គការសុខភាពពិភពលោក បានចុះ ការញៀនល្បែងវីដេអូ ទៅក្នុងបញ្ជីឈ្មោះជំងឺ នៅខែមិថុនា ២០១៨ នេះ។ នេះជាករណីទីមួយ ! សម្រាប់អង្គការសុខភាពពិភពលោក ការប្រព្រឹត្តលេងល្បែងវីដេអូ ជាបញ្ហាខួរក្បាលពិតៗ។ អង្គការបានបង្ហាញឯកសារការងារ តាំងពីចុងឆ្នាំ២០១៧មក បញ្ជាក់អំពើសំណើចុះបញ្ជី ញៀនល្បែងវីដេអូ ជាជំងឺ។ ដូចម្តេចដែលហៅថាជំងឺញៀនល្បែងវីដេអូ ? ជំងឺនេះមានគ្រោះថ្នាក់យ៉ាងណាខ្លះ ?
ញៀនល្បែង ជាពាក្យមួយដ៏ស្មុគស្មាញ ពិបាកយល់ខ្លាំងណាស់ ! តាំងពីដើមមក ល្បែង ដែលរាប់ ថាអាចមានលក្ខណៈញៀន ដរាបណាតែជាល្បែងមានភ្នាក់ ឬបើតាមពាក្យសាមញ្ញខ្មែរ គឺល្បែងស៊ីសង ដែលឪពុកម្តាយជីដូនជីតា ផ្តាំផ្តាច់មិនឱ្យសាកល្បងព្រោះខ្លាចលុងខ្លួន ងប់នឹងល្បែងពាលា។ ចំពោះពាក្យថា ញៀន គឺច្រើនតែសំដៅទៅលើការញៀន សុរា ញៀនអាភៀន គ្រឿងញៀន ...
នៅថ្ងៃទី ១៨ មិថុនា ២០១៨ ពិភពលោកបានរាប់ឃើញមានជំងឺថ្មីមួយទៀត នោះគឺជំងឺញៀនល្បែងវីដេអូ។ សម្រាប់អង្គការសុខភាពពិភពលោក ការញៀនល្បែងវីដេអូ គឺជាជំងឺផ្លូវចិត្ត ដ៏ពិតៗ ដោយបានប្រមូល ភស្តុតាង ឯកសារការងារជាច្រើន សុំកត់ត្រាបញ្ចូល ការញៀនល្បែងវីដេអូ ទៅក្នុងបញ្ជីឈ្មោះជាប្រភេទជំងឺអន្តរជាតិមួយ តាំងពីឆ្នាំ២០១៧មក។ នេះជាលើកទីមួយ គិតចាប់តាំងពីឆ្នាំ១៩៩០មក ដែលអង្គការសុខភាពពិភពលោក បានសើរើបញ្ជីឈ្មោះជំងឺផ្លូវចិត្តនិងឥរិយាបថ។
ញៀនហ្កេម ជាជំងឺដែលគ្មានផ្តល់និងបង្ហាញជារោគសញ្ញាអ្វីទាំងអស់ ! នេះបើតាមអ្នកជំនាញវេជ្ជសាស្ត្រ និងស្រាវជ្រាវវិទ្យាសាស្ត្រមួយចំនួនធំ។ ហេតុដូច្នេះហើយបានជាមិនខ្វះឡើយ ការចោទសំណួរ និងការសិក្សាប្រឆាំង បញ្ជាក់សួរថាតើ ការញៀនល្បែងវីដេអូ ពិតជាជំងឺ ឬគ្រាន់តែជាប្រឌិត ?
សម្រាប់អង្គការសុខភាពពិភពលោក ជំងឺញៀនហ្កេម ត្រូវបានកំណត់ តាមរយៈឥរិយាបថ បែបស៊ូខ្លាំង និងប្រឹងខ្លាំង របស់អ្នកលេង មិនថាល្បែងវីដេអូនោះជាល្បែងអនឡាញ ឬអុហ្វឡាញទេ។
ដើម្បីអាចចាត់ទុក ជនណាម្នាក់ ថាមានធ្លាក់ខ្លួនកើតជំងឺញៀនល្បែងវីដេអូ អង្គការសុខភាពបានកំណត់ រោគសញ្ញា ធំៗបី ៖
- កាត់បន្ថយការគ្រប់គ្រងឥរិយាបថរបស់ខ្លួននៅពេលលេងល្បែង (លែងដឹងពេលម៉ោងចាប់ផ្តើមដែលគួរលេង ឬមិនគួរ លែងគិតគូរអំពីចំនួន និងចង្វាក់នៃការលេង លែងសូវខ្វល់ខ្វាយនឹងរយៈពេលលេង លែងដឹងម៉ោងបញ្ចប់ និងលែងស្គាល់កាលៈទេសៈ)
- ផ្តល់អាទិភាពដល់ការលេងល្បែងវីដេអូ ច្រើនជាងសកម្មភាពការងារប្រចាំថ្ងៃ និងផលប្រយោជន៍ផ្សេងទៀតនៃជីវិត។
- បន្តលេង បើទោះបីជាដឹងថាមានផលវិបាកអវិជ្ជមាន
ជាចុងក្រោយ សូមចងចាំថា មិនមែនរយៈពេលលេងទេ ដែលកំណត់ថាជនណាម្នាក់ជាញៀនល្បែងវីដេអូ ឥរិយាបថនោះត្រូវមានលក្ខណៈធ្ងន់ធ្ងរខ្លាំង ដល់ថ្នាក់ផ្តាច់ ឬបាត់បង់ទំនាក់ទំនងជាមួយគ្រួសារ សង្គម ការសិក្សា ការងារ ឬសកម្មភាពផ្សេងទៀត។ បើតាមអង្គការសុខភាពពិភពលោក គេអាចរាប់ការញៀនហ្កេមជាជំងឺបាន លុះណាតែបុគ្គលនោះ មានអាការៈឬឥរិយាបថមិនប្រក្រតី ដូចរៀបរាប់ខាងលើ រយៈពេលយ៉ាងហោចណាស់មួយឆ្នាំ។
ល្បែងវីដេអូ ជាហ្កេមដ៏ពេញនិយមរបស់ក្មេង អាយុពី១០-១៥ឆ្នាំ និងភាគច្រើនជាក្មេងប្រុស។ ប៉ុន្តែមនុស្សធំពេញវ័យ មិនទាន់សូវចាស់ ឬចាស់ហើយ ក៏មានងប់ និងញៀននឹងហ្កេមនេះច្រើន មិនចាញ់ក្មេងប៉ុន្មានឡើយ។ ល្បេងវីដេអូ គឺជាប្រធានបទដ៏ចម្រូងចម្រាសបំផុតនៅក្នុងសង្គម ព្រោះថ្វីបើក្រុមគ្រូពេទ្យចិត្តសាស្ត្រយល់ថាជាបញ្ហា ចាត់ទុកជាជំងឺ ជាគ្រឿងញៀន ផ្តាច់មនុស្សពីជីវិតពិតជាក់ស្តែង អ្នកខ្លះទៀត យល់ថាល្បែងខ្លះ ក៏មានផ្តល់ផលវិជ្ជមាន ជួយដាស់សតិបញ្ហាមនុស្សឱ្យរវាសរវៃ ចេះមានយុទ្ធសាស្ត្រ ... តើមានន័យថា ល្បែងវីដេអូនេះល្អ ល្បែងវីដេអូនោះ ឆាប់ផ្តល់ការញៀនជាងឬ ?!
លោកវេជ្ជបណ្ឌិត Michaël Stora គ្រូពេទ្យឯកទេសចិត្តសាស្ត្រ និងរោគចិត្ត នៃវិទ្យាស្ថានVirtuel
« គេទំនងជាត្រូវចាប់ផ្តើមព្រួយបារម្ភនៅពេលណា ដែលអ្នកងប់នឹងល្បែងចាប់ផ្តាច់ខ្លួនពី សង្គម ពីសង្គមគ្រួសារ ! មិនមែនគិតតែអំពីចំនួនពេលម៉ោង លេងល្បែងតែមួយមុខនោះឡើយ។ ព្រោះថាជើងឯកផ្នែកហ្កេម គាត់អាចជួនកាលលេងប្រកួតគ្នាដល់ទៅ៤០ម៉ោងជាប់ក៏មានដែរ។ ប៉ុន្តែចំពោះក្មេងជំទង់ គេអាចចាត់ទុកថាមានការងប់ ញៀននឹងល្បែង នៅពេលណាដែលក្មេងនោះដល់ថ្នាក់គេចសាលា មិនចេះធ្វើអ្វី ផ្សេង ក្រៅតែអំពីលេងហ្កេម។ អាចហៅថាជាជំងឺញៀនបាន លុះណាតែ ជននោះបានងប់លេង ក្នុងទម្រង់ជាការងប់ងល់ តស៊ូ ស្វិតស្វាញ។ ល្បែងដែលធ្វើឱ្យក្មេងញៀនខ្លាំងបំផុតនោះ គឺការលេងល្បែងតាមអ៊ីធ័រនែត ភ្ជាប់បណ្តាញជាប់រហូត។ ល្បែងអនឡាញអាចល្អទេ ប៉ុន្តែ កម្មវត្ថុនៃល្បែង បានជំរុញឱ្យក្មេង កាន់ជក់ឡើងៗ ចង់ឈ្នះ ព្រោះជាពិភពដែលគ្មានទីបញ្ចប់ ...
គេសង្កេតឃើញថាអ្នកដែលញៀនបំផុតច្រើនតែជាក្មេងឆ្លាត ចេះមុនអាយុ ក្មេងដែលបានទទួលការអប់រំ បណ្តុះបណ្តាលឱ្យចេះតែចង់ឈ្នះ ឱ្យពូកែជាងគេ ខ្លាំងជាងគេ ...
ប៉ុន្តែទោះករណីណាក៏ដោយ ក៏ដំណោះស្រាយនៅតែមាន។ សូមចងចាំថា ការញៀនល្បែងវីដេអូ ញៀនហ្កេមលើអេក្រង់ ។ល។ និង។ល។ ក៏មានការព្យាបាលផ្តាច់វាដែរ។ នៅពេលព្យាបាលនោះការញៀនហ្កេមនោះ ក្មេងអាច មានជំងឺធ្លាក់ទឹកចិត្តធ្ងន់ធ្ងរមួយរំពេច ក្លាយមនុស្សមានចរិតកាច សាហាវ មានន័យថាក្មេងនោះរកទុក្ខវេទនាក្នុងចិត្តខ្លាំងណាស់ ។ ជាការព្យាបាលដោយប្រើវិធីសាស្ត្រមួយឈ្មោះថា Hier et l’expérience ដោយត្រូវធ្វើការផ្តាច់ល្បែងវីដេអូ រយៈពេលមួយសប្តាហ៍ បន្ទាប់មកត្រូវបន្តតាមដានរយៈពេល១១ខែ ដើម្បីជួយអ្នកញៀននោះឱ្យបានស្គាល់ភាពរីករាយ និងស្គាល់តម្រូវការនៃរាងកាយ នៃជីវិតពិតរបស់ខ្លួន។ »
អ្នកជាឪពុកម្តាយ មានតួនាទីសំខាន់ណាស់ ក្នុងកិច្ចការពារកូនទល់នឹងការញៀនល្បែង ប៉ុន្តែក៏ត្រូវប្រឈមនឹងភារកិច្ចដ៏លំបាកមួយ គឺការត្រូតពិនិត្យនិងគ្រប់គ្រងពេលវេលាលេងហ្កេម។ លេងហ្កេម តាមប្រព័ន្ធអ៊ីនធ័រណែត លើសពី១៥ម៉ោង ចាត់ទុកថាជ្រុលហួសហេតុ -៣០ម៉ោងក្នុងសប្តាហ៍ ថាជាជំងឺញៀនហ្កេមហើយ។ ដូច្នេះអ្នកជាឪពុកម្តាយត្រូវភ្ជាប់ទំនាក់ទំនង រកពេលវេលាជជែកពិភាក្សាជាមួយកូនឱ្យបានយល់អំពីផលវិជ្ជមាន និងហានិភ័យនៃការញៀនល្បែងវីដេអូ។ ការចេះជ្រើសរើសល្បែងជាមួយកូន ដើម្បីឱ្យស្របជាមួយអាយុរបស់កូនជាដំណោះស្រាយមួយ និងជាចុងក្រោយអ្នកជាឪពុកម្តាយត្រូវចេះប្រើអំណាចសម្រេចចិត្តថា ពេលណាម៉ោងណា រយៈពេលប៉ុន្មានកូនអាចលេងហ្កេមបាន។ នៅក្នុងកម្មវិធីសុខភាពរបស់យើងមុនៗ ក៏មានរៀបរាប់និងពន្យល់បញ្ជាក់អំពីរបៀបប្រើប្រាស់អេក្រង់ និងការលេងហ្កេម របស់ក្មេង ពីអាយុបីឆ្នាំទៅ១២ឆ្នាំ។ ក្មេងអាយុក្រោមពីរឆ្នាំ គួរតែត្រូវបានរស់ឆ្ងាយអំពីបច្ចេកវិទ្យាទំនើបបច្ចុប្បន្ន។
វិធីទប់ស្កាត់ការញៀនល្បែងវីដេអូ
វីដេអូហ្កេម ជាល្បែងលេងសម័យថ្មី សម័យអ៊ីនធ័រនែត ដែលមិនអាចបដិសេធធ្វើមិនដឹងមិនស្គាល់បានឡើយ ! ល្បែងវីដេអូ គឺជាបញ្ហាសុខភាពសាធារណៈពិតៗ ដែលអាចជះជាផលវិបាកផ្នែកអាកប្បករិយា ដល់គ្រួសារ ក្នុងសង្គម ផ្លូវចិត្ត ហិរញ្ញវត្ថុ និងផលវិបាកផ្នែកសិក្សា។ ប៉ុន្តែគេមិនអាចម៉ៅថាល្បែងវីដេអូ សុទ្ធតែអាក្រក់ និងធ្វើឱ្យកើតរោគងប់ញៀនឡើយ ប្រសិនបើគេចេះយកល្បែងវីដេអូមកប្រើដើម្បីចម្រើនបញ្ញាកូន។ នេះជាដំបូន្មាន៥យ៉ាង ដើម្បីទប់ស្កាត់ភាពញៀនល្បែងវីដេអូ ៖
ទីមួយ មិនត្រូវចេញបម្រាមហាមឃាត់កូនទាំងស្រុងទេ ៗ ! ក្មេងសម័យថ្មីចេះនិងស្គាល់អេក្រង់ ទូរស័ព្ទ អ៊ីនធ័រនែត និងហ្កេមច្បាស់ណាស់ បើហាមនៅផ្ទះ គេនឹងអាចលួចលេងនៅសាលា ជាមួយមិត្តភក្តិ នៅតូបហ្កេម។ ទីពីរ អ្នកជាឪពុកម្តាយ ក៏គួរតែរៀនលេងដែរដើម្បីឱ្យស្គាល់ហ្កេមនោះ ទើបងាយលើកអំពីចំណុចល្អនិងអាក្រក់ ហើយនិយាយពន្យល់កូនឈ្នះ បញ្ជាក់ថាយើងជាម្តាយឪពុកមិនមែនល្អ មិនដឹងអីឡើយ។ បើអាចចំណាយពេលលេងជាមួយកូនបានទៀតកាន់តែប្រសើរ ព្រោះអ្នកជាឪពុកម្តាយស្ថិតនៅជិតកូនជានិច្ច ស្រួលអូសទាញកូនមកវិញ កុំឱ្យជ្រុលជ្រួសទាន់។ ដាក់វិន័យកំណត់ពេលម៉ោងលេង ឱ្យបានសមស្រប អាចធ្វើបាន និង ទៅតាមវ័យ ទៅតាមពេលវេលា ពេលសម្រាកវិស្សមកាល ពេលបានទទួលលទ្ធផលសិក្សា ពិន្ទុល្អ ... ជជែកលេងជាមួយកូន អំពីល្បែងវីដេអូនោះ ដើម្បីកុំឱ្យកូនផ្តាច់ខ្លួនចេញពីសង្គមគ្រួសារ និងបានយល់ពីកូន។ ស្វែងយល់ថាហេតុអ្វីបានជាកូនចូលចិត្តល្បែងវីដេអូ មកពីអត់ពួកម៉ាក មានបញ្ហាផ្លូវចិត្ត មិនទុកចិត្តខ្លួនឯង ខ្វះភាពកក់ក្តៅ។ ជាចុងក្រោយ ផ្តល់អាទិភាពដល់សកម្មភាពកីឡា និងលំហែនៅ ក្រៅផ្ទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ