អ្នកវិភាគសេដ្ឋកិច្ច៖ បរិមាណឥណទានខ្ពស់នៅភ្នំពេញឆ្លុះបញ្ចាំងពីទំហំនៃចរន្តសេដ្ឋកិច្ចទីក្រុង
អ្នកវិភាគសេដ្ឋកិច្ចឯករាជ្យលើកឡើងថា ទីក្រុងភ្នំពេញដែលមានចំនួនឥណទានច្រើនជាងគេ អាចឆ្លុះបញ្ចាំងពីចរន្តសេដ្ឋកិច្ច និងទិដ្ឋភាពជាក់ស្តែងពីទីក្រុងទាំងមូល។ ការលើកឡើងបែបនេះធ្វើឡើងក្រោយពីការិយាល័យឥណទានកម្ពុជា បានចេញរបាយការណ៍មួយសម្រាប់ឆ្នាំ២០១៦ស្ដីពីទិន្នន័យឥណទានសរុប ទូទាំង ២៥ ខេត្ត រាជធានី កាលពីថ្ងៃទី១ សីហា ឆ្នាំ២០១៧នេះ។
ចុះផ្សាយនៅថ្ងៃ៖
ស្តាប់ - ០១:៥៩
អត្ថបទដោយ៖ ហេង ពុធីរៈ និង ទី កញ្ញា
លោក ច័ន្ទ សុផល អ្នកវិភាគសេដ្ឋកិច្ចឯករាជ្យ បានប្រាប់វិទ្យុបារាំងអន្តរជាតិ នៅថ្ងៃទី២ សីហានេះ ថា តួលេខនៃបរិមាណឥណទាននៅភ្នំពេញនេះគ្មានអ្វីគួរឲ្យភ្ញាក់ផ្អើលទេ ព្រោះវាសមស្របទៅនឹងផលិតផលក្នុងស្រុកសរុប (GDP) ក៏ដូចជាទឹដ្ឋភាពជាក់ស្តែង។ លោកបានបន្ថែមទៀតថា ចំនួនឥណទាននៅភ្នំពេញមានការកើនឡើងខ្ពស់ជាងគេ ដោយសារតែទីក្រុងនេះគឺជាកន្លែងដែលប្រមូលផ្តុំទីផ្សារសេដ្ឋកិច្ច ពាណិជ្ចកម្ម និង ក្រុមហ៊ុនធំៗ។
គិតត្រឹមខែធ្នូ ឆ្នាំ២០១៦ គ្រឹះស្ថានហិរញ្ញវត្ថុ ដែលជាសមាជិកការិយាល័យឥណទានកម្ពុជា(CBC-Credit Bureau Cambodia) បានផ្តល់ឥណទានសរុបចំនួន ១២៥០ លានដុល្លារ ដល់ប្រជាជនចំនួន ជាង២លាននាក់ នៅក្នុង ២៥ ខេត្ត រាជធានី។ ក្នុងនោះ រាជធានី ភ្នំពេញមានបរិមាណឥណទានច្រើនជាងគេប្រមាណ ៥ពាន់លានដុល្លារ ស្មើនឹង ៤២,៦ភាគរយនៃឥណទានសរុបទូទាំងប្រទេស និងមានអ្នកខ្ចីប្រាក់ចំនួន ២សែន៣ម៉ឺននាក់។ បន្ទាប់ពីទីក្រុងភ្នំពេញ គឺក្រុង សៀមរាប ដែលមានបរិមាណឥណទានចំនួន ៧៨៥លានដុល្លារ ស្មើនឹង៦,៣ភាគរយ និងមានចំនួនអ្នកខ្ចី ១សែន៣ម៉ឺននាក់។ នេះបើតាមរបាយការណ៍របស់ការិយាល័យឥណទានកម្ពុជា ចេញផ្សាយកាលពី ថ្ងៃទី១ សីហា ឆ្នាំ២០១៧។
តាមអ្នកវិភាគសេដ្ឋកិច្ចដដែល ភាគរយនៃឥណទានសរុបនេះ មិនផ្ដល់ផលអវិជ្ជមានឬវិជ្ជមានអ្វីដល់សេដ្ឋកិច្ចកម្ពុជាទេ ពោលគឺវាគ្រាន់តែអាចបង្ហាញពីទិដ្ឋភាពសេដ្ឋកិច្ចប៉ុណ្ណោះ។ ដោយរយៈពេលកន្លងមក ពីមួយឆ្នាំទៅមួយឆ្នាំ សេដ្ឋកិច្ចប្រទេសកម្ពុជាមានការកើនឡើងជាបន្តបន្ទាប់ ប៉ុន្តែក្នុងឆ្នាំ២០១៦ វាមានការធ្លាក់ចុះបន្តិចទៅវិញ ហើយលោករំពឹងថា ក្នុងឆ្នាំ២០១៧នេះ អាចនឹងមានការកើនឡើងវិញបន្តិច។
គួរបញ្ជាក់ថា ការិយាល័យឥណទានកម្ពុជា ដែលជាអ្នករៀបចំនិងចេញរបាយការណ៍ គឺជាក្រុមហ៊ុនឯកជនមួយ ដែលផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ ជាង១៣០ស្ថាប័ន ហើយក៏មានការគាំទ្រពីធនាគារជាតិនៃកម្ពុជាផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ