រុស្ស៊ី លើកលែងពន្ធនាំចូលទំនិញ ពីកម្ពុជា ចំនួន ៣ ពាន់ មុខទំនិញ
ចាប់ពីឆ្នាំ ២០១៧ តទៅ សហភាពរុស្ស៊ី សន្យាថានឹងនាំចូលផលិតផលប្រមាណជា ៣ ពាន់ ពីកម្ពុជា ក្រោមប្រព័ន្ធអនុគ្រោះពាណិជ្ជកម្ម ពន្ធនាំចូលសូន្យ។ កញ្ញា សឹង សុផារី អ្នកនាំពាក្យក្រសួងពាណិជ្ជកម្ម បានឱ្យដឹងថា ទំនិញជាអាទិភាពដែលកម្ពុជា នឹងនាំចេញទៅកាន់ប្រទេសរុស្ស៊ី មានដូចជា ផលិតផលកសិកម្ម អង្ករ ស្ករ និងកៅស៊ូ ជាដើម។ ក្រៅតែពីក៏ ភាគីទាំងពីរ រំពឹងថានឹងមានជើងយន្តហោះត្រង់ពីរស្ស៊ី (រដ្ឋធានីម៉ូស្គូ) មកកម្ពុជា (ក្រុងព្រះសីហនុ) បន្ទាប់ពីសេចក្តីសម្រេចជាផ្លូវការ រវាងព្រះរាជាណាចក្រកម្ពុជា និងសហព័ន្ធរស្ស៊ី។
ចុះផ្សាយនៅថ្ងៃ៖
នៅក្នុងជំនួបពិភាក្សារវាង លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និង លោក ឌីមីទ្រី ស្វេតកូវ ឯកអគ្គរដ្ឋទូតសហព័ន្ធរុស្ស៊ី ប្រចាំព្រះរាជាណាចក្រកម្ពុជា កាលពីថ្ងៃទី ២៨ ធ្នូ កន្លងទៅ រុស្ស៊ីបានយល់ព្រមតាមសំណើររបស់ភាគីកម្ពុជា ក្នុងការលើកលែងពន្ធនាំចូលទៅកាន់ប្រទេសមហាអំណាចមួយនេះ។
កញ្ញា សឹង សុផារី អ្នកនាំពាក្យក្រសួងពាណិជ្ជកម្ម បានឲ្យដឹងថា នេះជាសញ្ញាណវិជ្ជមានសម្រាប់កម្ពុជា ដើម្បីពង្រីកទំហំពាណិជ្ជកម្មរបស់ខ្លួនទៅកាន់ប្រទេសរុស្ស៊ី និង ការវិនិយោគ របស់ប្រទេសទាំងពីរ។ អ្នកនាំពាក្យរូបនេះ ទទួលស្គាល់ថា ទំនិញចំនួន ៣ ពាន់ មុខ នេះ មានបរិមាណច្រើន ក៏ប៉ុន្តែ នេះជាមហិច្ឆតា របស់កម្ពុជា ដើម្បីពង្រីកវិសាលភាពពាណិជ្ជកម្ម។
ជាការកត់សម្គាល់ នៅក្នុងឆ្នាំ ២០១៦ ក្រៅពីតែពីមានការអនុគ្រោះពន្ធនាំចូលផលិតផលកម្ពុជា ទៅសហភាពរុស្ស៊ី ក៏មានផងដែរ កាលពីខែ តុលា កន្លងទៅ វៀតណាម បានយល់ព្រមផ្តល់ភាពអនុគ្រោះពន្ធសូន្យភាគរយដូចគ្នានូវមុខទំនិញចំនួន ៣៩ ដល់ភាគីកម្ពុជាក្នុងនោះមានអង្ករចំនួន ៣០ ម៉ឺនតោនរៀងរាល់ឆ្នាំ និងសន្លឹកថ្នាំជក់ស្ងួត ៣ ០០០ តោនសម្រាប់ឆ្នាំ ២០១៦-២០១៧។ មិនត្រឹមតែប៉ុណ្ណោះ ភាគីទាំងពីរ គ្រោងនឹងពង្រីកទំហំពាណិជ្ជកម្ម ឱ្យកើនដល់៥ពាន់លានដុល្លារ នៅឆ្នាំខាងមុខ។
ដោយឡែក ក្នុងឆមាសទីមួយ ឆ្នាំ ២០១៦ តំណាងពាណិជ្ជកម្មសហរដ្ឋអាមេរិក បានប្រកាសការពង្រីកការអនុគ្រោះពន្ធផ្នែកពាណិជ្ជកម្មសម្រាប់កម្ពុជា និងប្រទេសដែលកំពុងអភិវឌ្ឍន៍ដទៃទៀតក្នុងពិភពលោក។ ដោយគ្មានការយកពន្ធលើទំនិញនាំចូលជាច្រើន។
ការពង្រីកប្រព័ន្ធនេះមិនត្រឹមតែផ្ដល់អោយកម្ពុជា នូវលទ្ធភាពនាំចូលទៅសហរដ្ឋអាមេរិក ដែលមានតម្លៃប្រមាណ ១០ពាន់លានដុល្លារអាមេរិកប៉ុណ្ណោះទេ វាថែមទាំងបានលើកទឹកចិត្តដល់ការអភិវឌ្ឍនៃឧស្សាហកម្មវាយនភណ្ឌរបស់កម្ពុជា ទៅក្នុងផ្នែកថ្មីៗនៃផលិតកម្មដែលផ្ដល់ការចំណេញទៀតផង។
ដោយឡែក កាលពីដើមខែ កក្កដា វិញ ស.រ.អា.បានប្រកាសអំពីការអនុគ្រោះពន្ធលើទំនិញសម្រាប់ការធ្វើដំណើរដែលផលិតនៅកម្ពុជាជាច្រើនប្រភេទដូចជាវ៉ាលីស កាបូបស្ពាយ កាបូបដៃ និងកាបូបលុយដាក់ក្នុងហោប៉ៅនឹងអាចនាំរបស់ទាំងនេះទៅកាន់សហរដ្ឋអាមេរិក។
ចំណែក ប្រទេសចិន នឹងបង្កើនកម្រិតកូតានាំចេញសម្រាប់ស្រូវអង្ករកម្ពុជា ឲ្យបានរហូតដល់២០ម៉ឺនតោនបន្ថែមទៀតនៅក្នុងឆ្នាំ២០១៧។ ភាគីចិន នឹងពិគ្រោះយោបល់ជាមួយស្ថាប័នពាក់ព័ន្ធនានាដើម្បីផ្តល់ការអនុគ្រោះពន្ធគយក្នុងកម្រិតរហូតដល់ ៩៧ភាគរយ នៃខ្សែបន្ទាត់ពន្ធគយសរុបក្រោមក្របខ័ណ្ឌអនុគ្រោះដោយឲ្យរួចពន្ធគយ និងគ្មានកូតាកំណត់ឲ្យបានឆាប់តាមដែលអាចធ្វើទៅបាន។ កម្ពុជា និងចិន បានដាក់ចេញទិសដៅសម្រេចទំហំពាណិជ្ជកម្មឱ្យបានដល់ ៥ពាន់លានដុល្លារអាមេរិកនៅក្នុងឆ្នាំ២០១៧ខាងមុខ៕
ដោយឡែក ផលិតផលទំនិញដែលនាំចេញពីកម្ពុជា ចូលទៅលក់ក្នុងទីផ្សារសហគមន៍អឺរ៉ុប ត្រូវបានអនុគ្រោះពន្ធទាំងអស់ លើកលែងតែគ្រឿងសព្វាវុធ។
សូមបញ្ជាក់ថា នៅក្នុងឆ្នាំ ២០១៦ ទំហំពាណិជ្ជកម្មកម្ពុជា កើនដល់១០.៦ពាន់លានដុល្លារ។ ការកើនឡើងនៃទំហំពាណិជ្ជកម្ម ឆ្នាំ ២០១៦ នេះ ដោយសារតែមានការកើនឡើងនូវការនាំចេញទំនិញក្នុងវិស័យវាយនភណ្ឌកាត់ដេរសម្លៀកបំពាក់ និងស្បែកជើង និងកសិ-ឧស្សាហកម្ម ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ