សប្ដាហ៍ទី ៣៤ នៃឆ្នាំ ២០១៦ ជំងឺគ្រុនឈាមមានការកើនឡើងប្រមាណ ៥%
ជំងឺគ្រុនឈាម មានការកើនឡើងក្នុងសប្ដាហ៍ទី ៣៤ ប្រមាណ ៥% បើប្រៀបធៀបនឹងពេលវេលាដូចគ្នាឆ្នាំ ២០១៥។ ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាលបានបញ្ជាក់ថា ការកើនឡើងនេះ ដោយសារតែឆ្នាំ ២០១៦ ជាឆ្នាំវដ្តដែលជំងឺគ្រុនឈាម ត្រូវកើនឡើង ការប្រែប្រួលអាកាសធាតុ និងការវិវត្តរបស់វីរុសគ្រុនឈាមផ្ទាល់។អត្ថបទដោយ ប៉ោ គីមហុក
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោក ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល ប្រាប់វិទ្យុបារាំងRFI នៅថ្ងៃនេះថា ក្នុងរយៈពេល ៣៤សប្ដាហ៍ឆ្នាំ ២០១៦ ករណីជំងឺគ្រុនឈាមមានការកើនឡើងប្រមាណជា ៥% បើប្រៀបធៀបជាមួយពេលវេលាដូចគ្នាក្នុងឆ្នាំ ២០១៥។ លោក ហ៊ុយ រ៉េកុល បញ្ជាក់ថាក្នុងរយៈពេល៣៤សប្ដាហ៍ឆ្នាំ ២០១៦នេះ មានជំងឺគ្រុនឈាម រហូតដល់ ៨២១៨ករណី និងស្លាប់ចំនួន ១៧នាក់ ចំណែកឯក្នុងរយៈពេលដូចគ្នាឆ្នាំ ២០១៥ មានត្រឹមតែ ៧៧៨៥ករណីប៉ុណ្ណោះ ហើយស្លាប់ចំនួន ២៦នាក់។
ទោះបីជាមានការកើនឡើង នូវករណីជំងឺគ្រុនឈាមនេះក៏ដោយ តែចំនួនអ្នកស្លាប់មានការថយចុះដោយលោក លើកហេតុផលថា ក្រសួងសុខាភិបាលបានដឹងជាមុនថានឹងមានការកើនឡើង ហើយបានត្រៀមខ្លួនជាស្រេចក្នុងការទប់ទល់នឹងជំងឺនេះ។ ការដឹងមុនបែបនេះហើយទើប ក្រសួងសុខាភិបាល បានរៀបចំផែនការតាំងពីចុងឆ្នាំ ២០១៥ ដោយមានការប្រើប្រាស់ថ្នាំ អាប៊ែត ថ្នាំត្រៀមសម្រាប់បាញ់សត្វល្អិត និងស៊ីរ៉ូមនៅតាមមន្ទីរពេទ្យផងដែរ។
ការកើនឡើងនៃ ចំនួនជំងឺគ្រុនឈាមនេះ ត្រូវបានប្រធានមជ្ឈមណ្ឌលរូមនេះ ពន្យល់បន្ថែមថា វាកើតឡើងដោយសារតែឆ្នាំ ២០១៦ នេះជាឆ្នាំវដ្តដែលជំងឺគ្រុនឈាមត្រូវកើនឡើងក្នុងរយៈពេល ៣ទៅ ៤ឆ្នាំម្ដងក្នុងប្រទេសកម្ពុជា។ លើសពីនេះ ការកើនឡើងក៏ដោយសារតែ ការប្រែប្រួលអាកាសធាតុ និងការវិវត្តិនៃ វីរុសគ្រុនឈាមនេះផងដែរ។
ទន្ទឹមនឹងមានការកើនឡើងនេះ លោកបានបញ្ជាក់ថា ដើម្បីទប់ស្កាត់ជំងឺគ្រុនឈាមបាន ត្រូវតែមានការចូលរួមពីសំណាក់ស្ថាប័នរដ្ឋ និងប្រជាពលរដ្ឋផ្ទាល់។ ដោយក្នុងនោះ ខាងក្រសួងសុខាភិបាល ត្រូវតែ មានការផ្គត់ផ្គង់ថ្នាំអាប៊ែត ថ្នាំបាញ់សម្លាប់សត្វល្អិត និងត្រៀមរួចជាស្រេចនូវបណ្ដាញសម្រាប់បញ្ជូនអ្នកជំងឺ ពីមណ្ឌលសុខភាពទៅកាន់មន្ទីរពេទ្យខេត្ត។ ហើយក្រៅពីនេះ ប្រជាជនផ្ទាល់ត្រូវតែយកចិត្តទុកដាក់ខ្ពស់ ចំពោះបញ្ហាអនាម័យក្នុងនិងជុំវិញផ្ទះរបស់ខ្លួន ដោយធ្វើយ៉ាងណាត្រូវកម្ចាត់ជំរកមូស និងការពារកុំឲ្យមូសខាំបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ