សុខភាពមាតានិងកុមារត្រូវបានលើកឡើង ក្នុងខួប៦០ឆ្នាំ នៃទំនាក់ទំនងការទូតរវាងកម្ពុជា និងសាធារណៈរដ្ឋឆែក
អត្រាមរណភាពទារកនៅតែមានកម្រិតខ្ពស់ គឺ ២៧នាក់ក្នុងចំណោម ១ពាន់នាក់ ខណៈដែលកុមារម្នាក់ក្នុងចំណោមកុមារបីនាក់មានអាយុក្រោម៥ឆ្នាំ មានបញ្ហាក្រេះក្រិន ឬកង្វះអាហារូបត្ថម្ភរ៉ាំរ៉ៃ។ នេះបើតាមសេចក្តីប្រកាសព័ត៌មានរួមរបស់សាធារណៈរដ្ឋឆេក និងអង្គការភីពផលអ៊ីននីដ ឬភីន ដែលបានចេញផ្សាយនៅក្នុងឱកាសប្រារព្ធខួបទី៦០ឆ្នាំនៃ កិច្ចសហប្រតិបត្តិការរវាងកម្ពុជានិងសាធារណរដ្ឋឆែកនៅថ្ងៃទី៣ មិថុនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
រឺម៉កកង់បីចំនួន១០០ ត្រូវបានប្រើប្រាស់សម្រាប់ការផ្សព្វផ្សាយសារអំពីសុខភាព និងអាហារូត្ថម្ភនេះ ក្នុងរយៈពេល៣ខែ ដែលចាប់ផ្តើមពីថ្ងៃទី ៣ មិថុនានេះតទៅ ហើយនិងមានចរាចរណ៍នៅជុំវិញទីក្រុងភ្នំពេញ។ យុទ្ធនាការនេះ ត្រូវបានបង្កើតឡើង ដើម្បីផ្សព្វផ្សាយលេខទូរសព្ទមួយ សម្រាប់ឲ្យស្រ្តីដែលមានផ្ទៃពោះ និងមាតាទាំងអស់នៅក្នុងប្រទេសកម្ពុជា ចុះឈ្មោះទៅកាន់ប្រព័ន្ធ បច្ចេកវិទ្យាមួយរបស់អង្គការភីន ឈ្មោះថា សេវាសហគមន៍គ្រួសារសុខភាពល្អ ដែលជាប្រព័ន្ធមួយប្រើប្រាស់ទូរសព្ទដៃ ដើម្បីអប់រំ និងផ្តល់ចំណេះដឹងអំពីសុខភាព។
សេចក្តីប្រកាសព័ត៌មានរួមបានឲ្យដឹងទៀតថា យុទ្ធនាការនេះត្រូវបានធ្វើឡើង ដើម្បីជាការលើកទឹកចិត្តឲ្យមានការសម្រាលកូននៅឯមណ្ឌលសុខភាព យល់ដឹងពីអត្ថប្រយោជន៍នៃការបំបៅកូនដោយទឹកដោះម្តាយ និងអាហារូបត្ថម្ភល្អជាដើម។ ស្ត្រីទាំងអស់ អាចហៅទូរសព្ទទៅកាន់លេខ ០៩៥ ៩៧៥៨០២ ដែលបានបង្ហាញនៅលើផ្ទាំងផ្សព្វផ្សាយលើរឺម៉កកង់បីទាំងអស់ ដើម្បីចុះឈ្មោះទៅក្នុងប្រព័ន្ធ។ បន្ទាប់ពីចុះឈ្មោះ ពួកគេ នឹងបានស្តាប់នូវសារសុខភាពសំខាន់ៗ ដែលបានបញ្ជូនទៅកាន់ទូរសព្ទដៃរបស់ពួកគេផ្ទាល់។
រូបភាពផ្សព្វផ្សាយនៅលើរឺម៉កកង់បីនោះ បង្ហាញពីស្ត្រីកំពុងតែសម្រាកនៅក្នុងមណ្ឌលសុខភាព ដែលមានការថែទាំពីក្រុមគ្រួសារ និងគ្រូពេទ្យជំនាញ បន្ទាប់ពីសម្រាលកូនរួច ក្រោមឃ្លាថា សូមស្នាក់នៅមណ្ឌលសុខភាពចំនួន៣ថ្ងៃ ក្រោយពីសម្រាលកូនរួច។ សម្រាប់ប្រជាជនដែលរស់នៅក្នុងទីក្រុងភ្នំពេញនឹងប្រទះឃើញផ្ទាំងរូបភាពផ្សព្វផ្សាយនេះ នៅផ្នែកខាងក្រោយរឺម៉កកង់បី ដែលចូលរួមក្នុងយុទ្ធនាការផ្សព្វផ្សាយក្នុងរយៈពេលបីខែ។
សូមជម្រាបជូនថា អត្រាមរណភាពទារកនៅតែមានកម្រិតខ្ពស់ គឺ ២៧នាក់ក្នុងចំណោម ១ពាន់នាក់ ខណៈដែលកុមារម្នាក់ក្នុងចំណោមកុមារបីនាក់មានអាយុក្រោម៥ឆ្នាំ មានបញ្ហាក្រេះក្រិន ឬកង្វះអាហារូបត្ថម្ភរ៉ាំរ៉ៃ។ ដូច្នេះ ដើម្បីលុបបំបាត់បញ្ហានេះ ភ្នាក់ងារអភិវឌ្ឍន៍សាធារណៈរដ្ឋឆែក បានជួយគាំទ្រដល់អង្គការភីន រៀបរៀងសារសុខភាពសំខាន់ៗ សំរាប់ស្ត្រីមានផ្ទៃពោះ និងម្តាយទើបតែសំរាលកូនរូចតាមរយៈការផ្សព្វផ្សាយនៅលើរឺម៉កកង់បីនេះឡើង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ