កងទ័ពវៀតណាមបំពេញបេសកកម្ម រកអដ្ឋិធាតុទាហានវៀតណាមនៅក្នុងខេត្តត្បូងឃ្មុំ
លោកសួន សេរីរដ្ឋា ប្រធានគណបក្សអំណាចខ្មែរ បានសរសេរ និងបង្ហោះរូបនៅលើទំព័រហ្វេសប៊ុក ផ្លូវការរបស់លោកកាលពីថ្ងៃទី ៦ មេសាម្សិលមិញនេះថា មានទាហាន វៀតណាមចូលមកបោះជំរុំស្នាក់នៅក្នុង វត្តត្រពាំងផ្លុង ក្នុងស្រុកពញាក្រែក ខេត្តត្បូងឃ្មុំ។ ប៉ុន្តែបើតាមលោកមេបញ្ជាការយោធាខេត្តត្បូងឃ្មុំ បានឲ្យដឹងថា វត្តមានកងទ័ពវៀតណាមនៅក្នុងខេត្តត្បូងឃ្មុំនៅពេលនេះ គឺស្ថិតក្រោមកិច្ចសហប្រតិបត្តិការណ៍ រវាងប្រទេសទាំងពីរ ដើម្បីស្វែងរកអដ្ឋិធាតុរបស់ទាហានវៀតណាម ដែលបានស្លាប់បាត់បង់ជីវិតក្នុងសម័យសង្គ្រាម នៅក្នុងទឹកដីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
លោកអ៊ាត ប៊ុនធឿន មេបញ្ជាការយោធាខេត្តត្បូងឃ្មុំ បានបញ្ជាក់ប្រាប់វិទ្យុបារាំងនៅថ្ងៃនេះថា វត្តមានរបស់កងទ័ពវៀត ណាមនៅក្នុងស្រុកពញាក្រែក ក្នុងខេត្តត្បូងឃ្មុំនៅពេលនេះ គឺជាវត្តមានស្របច្បាប់ ហើយធ្វើឡើងក្នុងជំនួយមនុស្សធម៌ ដើម្បីស្វែងរកឆ្អឹងរបស់ទាហានវៀតណាម ដែលបានស្លាប់នៅក្នុងសម័យសង្គ្រាមនៅក្នុងប្រទេសកម្ពុជា។
លោកមេបញ្ជាការបានបន្តទៀតថា កិច្ចសហប្រតិបត្តិការណ៍នេះគឺត្រូវបានធ្វើឡើងអស់រយៈពេលជាច្រើនឆ្នាំមកហើយ រវាងរដ្ឋាភិបាលកម្ពុជា និងវៀតណាម ហើយកន្លងមកក៏ធ្លាប់មានទាហានអាមេរិកចុះមកធ្វើបេសកកម្មស្វែងរកអដ្ឋិធាតុ របស់កងទ័ពខ្លួនផងដែរ។
ការឆ្លើយតបរបស់លោកមេបញ្ជាការយោធាខេត្តត្បូងឃ្មុំនៅពេលនេះ ត្រូវបានធ្វើឡើង បន្ទាប់ពីលោកសួន សេរីរដ្ឋា ប្រធានគណបក្សអំណាចខ្មែរ បានចុះទៅដល់ទឹកដីខេត្តត្បូងឃ្មុំ ហើយក្រុមការងាររបស់លោកក៏បានប្រទះឃើញ ទាហានវៀតណាមជាច្រើនកំពុងតែស្នាក់នៅក្នុងវត្តត្រពាំងផ្លុង។
លោកសួន សេរីរដ្ឋាបានសរសេរ និងបង្ហោះរូបទាហានវៀតណាមថា «សកម្មភាពដែលទាហានយួន លើកគ្នាចូលមកបោះជំរុំនៅក្នុងវត្តខ្មែរ ដីខ្មែរនេះ គឺរំលោភច្បាប់រដ្ឋធម្មនុញ្ញខ្មែរ ដែលជាការរំលោភអធិបតេយ្យភាព និងបូរណៈភាពទឹកដីខ្មែរ»។
ប្រធានគណបក្សអំណាចខ្មែររូបនេះក៏បានសួរព័ត៌មានពីអ្នកស្រុកចាស់ៗ នៅក្នុងភូមិនោះផងដែរថា ទាហានវៀតណាមទាំងអស់នេះ បានចូលមកស្នាក់នៅក្នុងវត្តនេះមានរយៈពេលជិត២មកហើយ ហើយទាហានទាំងអស់នេះនឹងត្រូវចេញទៅវិញក្នុងរយៈពេល១២០ថ្ងៃ។ បន្ទាប់មកនឹងមានក្រុមថ្មីមកជំនួសវិញ។ នេះបើតាមលោកសួន សេរីរដ្ឋាបានឲ្យដឹង នៅក្នុងទំព័រហ្វេសប៊ុកផ្លូវការរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ