សមាគមគ្រូបង្រៀន ស្នើលោកហ៊ុន សែន ផ្តល់ប្រាក់ឧបត្ថម្ភ ១៥ម៉ឺនរៀល ដើម្បីអបអរបុណ្យចូលឆ្នាំខ្មែរ
សមាគមគ្រូបង្រៀនកម្ពុជាឯករាជ្យ នៅថ្ងៃទី ២៣មីនានេះ បានផ្ញើលិខិតមួយទៅកាន់ខុទ្ទកាល័យលោកនាយករដ្ឋមន្ត្រីហ៊ុន សែន ដើម្បីស្នើសុំប្រាក់ឧបត្ថម្ភ ដល់គ្រូបង្រៀន មន្ត្រីរាជការ និងកងកម្លាំងប្រដាប់អាវុធទូទាំងប្រទេស ក្នុងម្នាក់ៗចំនួន ១៥ម៉ឺនរៀល អំឡុងពិធីបុណ្យចូលឆ្នាំថ្មីប្រពៃណីជាតិខ្មែរ។ យ៉ាងណាក៏ដោយ លោកនាយករដ្ឋមន្ត្រីហ៊ុន សែន នៅមិនទាន់មានប្រតិកម្មចំពោះសំណើនេះនៅឡើយទេ ដោយសារលោកពេលនេះ កំពុងចូលរួមកិច្ចប្រជុំ នៅប្រទេសចិន។
ចុះផ្សាយនៅថ្ងៃ៖
ស្តាប់ - ០២:០៩
សមាគមគ្រូបង្រៀនកម្ពុជាឯករាជ្យ បានបញ្ជាក់ថាទឹកប្រាក់ឧបត្ថម្ភ ១៥ម៉ឺនរៀល ដល់គ្រូបង្រៀន មន្ត្រីរាជការ និងកងកម្លាំងប្រដាប់អាវុធទូទាំងប្រទេស ក្នុងអំឡុងពេលបុណ្យចូលឆ្នាំថ្មីប្រពៃណីជាតិខ្មែរ ពិតជាមានសារៈសំខាន់ណាស់ ដើម្បីលើកស្ទួយទំនៀមទម្លាប់ និងសាសនារបស់កម្ពុជា។ សារៈសំខាន់ ដោយសារតែអំឡុងពេលនេះ តម្លៃទំនិញ ក៏ដូចជាសេវាដឹកជញ្ជូនក្នុងស្រុកជាដើម បានឡើងថ្លៃគុណ២ ដែលធ្វើឲ្យគ្រូបង្រៀន មន្ត្រីរាជការ និងកងកម្លាំងប្រដាប់អាវុធ ដែលមានប្រាក់បៀរវត្សតិចតួច ពិបាកចូលរួមអបអរសាទរ ក្នុងឱកាសបុណ្យជាតិមួយឆ្នាំមានម្តងនេះ។
អ្នកស្រីអ៊ុក ឆាយ៉ាវី ប្រធានស្តីទីនៃសមាគមគ្រូបង្រៀនកម្ពុជាឯករាជ្យ បានប្រាប់វិទ្យុបារាំងថា ទឹកប្រាក់ឧបត្ថម្ភ ១៥ម៉ឺនរៀលនេះ បើគិតទៅវាតិចតួចណាស់សម្រាប់អ្នកមានប្រាក់បៀរវត្សខ្ពស់ តែវាមានអត្ថប្រយោជន៍ច្រើនសម្រាប់អ្នកមានបៀរវត្សទាប។ អ្នកស្រី បានបញ្ជាក់ថា បច្ចុប្បន្នគ្រូបង្រៀនសរុបក្នុងប្រទេសកម្ពុជា មានប្រមាណជាង ១០ម៉ឺននាក់ ដូច្នេះរដ្ឋាភិបាល ទំនងជាមិនអាចចំណាយច្រើនពេកទេ គ្រាន់តែឧបត្ថម្ភប្រាក់ ១៥ម៉ឺនរៀលដល់ពួកគេក្នុងឱកាសនេះ។
យ៉ាងណាមិញ សមាគមគ្រូបង្រៀនកម្ពុជាឯករាជ្យ មិនបានបញ្ជាក់ពីចំនួនមន្ត្រីរាជការ និងកងកម្លាំងប្រដាប់អាវុធសរុបក្នុងប្រទេសនោះទេ។ ប៉ុន្តែអ្នកស្រី ឆាយ៉ាវី សង្ឃឹមថា ប្រាក់ឧបត្ថម្ភប៉ុណ្ណេះ ប្រហែលជាមិនអាចជាការចំណាយប្រាក់ជាតិច្រើននោះទេ។
សូមបញ្ជាក់ថា កាលពីឆ្នាំមុនសមាគមគ្រូបង្រៀនកម្ពុជាឯករាជ្យ ក៏បានធ្វើលិខិតស្នើសុំប្រាក់ឧបត្ថម្ភក្នុងអំឡុងបុណ្យចូលឆ្នាំខ្មែរ ទៅកាន់ប្រមុខរដ្ឋាភិបាលកម្ពុជា។ ហើយកាលណោះ លោកនាយករដ្ឋមន្ត្រីហ៊ុន សែន បានសម្រេចផ្តល់ប្រាក់ឧបត្ថម្ភចំនួន ៤ម៉ឺនរៀល ដល់គ្រូបង្រៀន មន្ត្រីរាជការស៊ីវិល និងកងកម្លាំងប្រដាប់អាវុធ នៅទូទាំងប្រទេសកម្ពុជា ដើម្បីអបអរក្នុងឱកាសពិធីបុណ្យចូលឆ្នាំថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ