ដំណើរការផ្សាយរបស់ទូរទស្សន៍ព្រះអាទិត្យ បន្តជាប់គាំងនៅត្រង់ការផ្ទេរកម្មសិទ្ធិដីធ្លី
មន្រ្តីគណបក្សសង្រ្គោះជាតិ បានបន្តស្តីបន្ទោសទៅលើនីតិវិធីនៃការផ្ទេរកម្មសិទ្ធិដីធ្លីនៅក្រុងតាខ្មៅថា បានធ្វើឲ្យរាំងស្ទះដល់ដំណើរការផ្សាយរបស់ទូរទស្សន៍ព្រះអាទិត្យរបស់គណបក្សប្រឆាំង។ គិតត្រឹមថ្ងៃទី១៣មករាឆ្នាំ២០១៦នេះ ឯកសារនៃការផ្ទេរកម្មសិទ្ធិដែលមានតម្លៃជាង១០ម៉ឺនដុល្លារអាមេរិកនោះនៅតែមិនទាន់ឆ្លងផុតពីមន្ទីរសូរិយោដីខេត្តកណ្តាលនៅឡើយ។
ចុះផ្សាយនៅថ្ងៃ៖
ស្តាប់ - ០២:៣៨
តាមគម្រោង ទូរទស្សន៍ព្រះអាទិត្យ (Sun TV) របស់គណបក្សសង្រ្គោះជាតិ ត្រូវដំណើរការផ្សាយនៅចុងឆ្នាំ២០១៥ រឺដើមឆ្នាំ២០១៦នេះ ក៏ប៉ុន្តែ ដំណើរការផ្សាយរបស់ស្ថានីយ៍ទូរទស្សន៍បក្សប្រឆាំងជាលើកដំបូងនេះ ត្រូវបានពន្យាពេលជាបន្តបន្ទាប់។ លោក តុ វ៉ាន់ច័ន្ទ សមាជិកគណៈកម្មាធិការអចិន្រ្តៃយ៍គណបក្សសង្រ្គោះជាតិទទួលបន្ទុកជំរុញដំណើរការផ្សាយរបស់ទូរទស្សន៍ព្រះអាទិត្យ បានស្តីបន្ទោសទៅលើភាពយឺតយ៉ាវនៃការផ្ទេរកម្មសិទ្ធិដីធ្លីសម្រាប់ដំឡើងស្ថានីយ៍ផ្សាយនៅក្នុង ភូមិដើមមាន ក្រុងតាខ្មៅ ខេត្តកណ្ដាលនោះថា បានធ្វើឲ្យអាក់ខានទៅដល់ដំណើរការរៀបចំបង្កើតទូរទស្សន៍ព្រះអាទិត្យរបស់គណបក្សសង្រ្គោះជាតិ។
លោក តុ វ៉ាន់ច័ន្ទ កំពុងពិនិត្យថា តើភាពយឺតយ៉ាវនៃការផ្ទេរកម្មសិទ្ធិដីធ្លីដែលគណបក្សសង្រ្គោះជាតិបានទិញក្នុងតម្លៃជាង ១០ម៉ឺន ៧ពាន់ដុល្លារអាមេរិកនេះ គឺជារឿងនយោបាយរឺយ៉ាងណា?
សូមបញ្ជាក់ថា គណបក្សសង្រ្គោះជាតិបានទិញដីទំហំជាង ១.២០០ម៉ែត្រការ៉េ នៅភូមិដើមមាន ក្រុងតាខ្មៅ ខេត្តកណ្ដាល ដើម្បីដំឡើងអង់តែន និងស្ទូឌីយោស្ថានីយ៏ទូរទស្សន៍នេះ ប៉ុន្តែគណបក្សសង្រ្គោះជាតិ នៅតែមិនអាចដំឡើងអង់តែន រឺសាងសង់ស្ទូឌីយោនៅលើដីនេះបាននៅឡើយទេ ដោយរងចាំការផ្ទេរកម្មសិទ្ធិដីធ្លីជាមុនសិន។
បើតាម លោក តុ វ៉ាន់ច័ន្ទ ការផ្ទេរកម្មសិទ្ធិដីធ្លីនេះ គឺជារឿងចាំបាច់ មុនពេលដែលគណបក្សសង្រ្គោះជាតិចាប់ផ្តើមដំណើរការសាងសង់ស្ទូឌីយោ រឺដំឡើងអង់តែនទូរទស្សន៍នេះ។
គួររំលឹកជូនថា គណបក្សសង្រ្គោះជាតិបានប្រកាសថា នឹងដំណើរការផ្សាយទូរទស្សន៍ព្រះអាទិត្យ (Sun TV) នៅមុនដំណាច់ឆ្នាំ ២០១៥នេះ បន្ទាប់ពីទទួលបានការអនុញ្ញាតិពីក្រសួងព័ត៌មានក្រោមកិច្ចព្រមព្រៀងនយោបាយជាមួយគណបក្សប្រជាជនកម្ពុជាកាលពីថ្ងៃទី២២កក្កដាឆ្នាំ២០១៤។ ប៉ុន្តែគម្រោងនៃដំណើរការផ្សាយរបស់ទូរទស្សន៍ព្រះអាទិត្យ ដែលគ្រោងចំណាយជាង៣លានដុល្លារនេះ បានពន្យាពេល ជាបន្តបន្ទាប់។
លោក តុ វ៉ាន់ច័ន្ទ មន្រ្តីទទួលបន្ទុកជំរុញការបង្កើតទូរទស្សន៍ព្រះអាទិត្យនេះ ក៏នៅមិនទាន់កំណត់ឲ្យបានប្រាកដប្រជានៅឡើយថា តើទូរទស្សន៍នេះ នឹងដាក់ឲ្យដំណើរការផ្សាយនៅពេលណា? ព្រោះថា អ្វីៗ វាស្ថិតនៅលើការផ្ទេរកម្មសិទ្ធិដីធ្លី ដែលគណបក្សបានទិញសម្រាប់ការសាងសង់ស្ថានីយ៍នៅក្រុងតាខ្មៅ ខេត្តកណ្តាលនេះ។ លោក តុ វ៉ាន់ច័ន្ទ បានបញ្ជាក់ថា បញ្ហាថវិកា មិនមែនជាបញ្ហានៃការបង្កើតទូរទស្សន៍ទៀតទេ។
ចំណែកឯលោក គី វណ្ណដារ៉ា អគ្គហិរញ្ញឹកគណបក្សសង្រ្គោះជាតិបានបញ្ជាក់ថា គណបក្សបានទទួលមូលនិធិប្រមាណជា៧០ម៉ឺនដុល្លារហើយពីប្រជាពលរដ្ឋ ដើម្បីបង្កើតទូរទស្សន៍ព្រះអាទិត្យនៅជំហ៊ានដំបូងនេះ។ ប៉ុន្តែការប្រមូលមូលនិធិក្នុងស្រុក បានផ្អាកកាលពី២ខែមុន ដោយសាររងចាំការសាងសង់ស្ថានីយ៍ផ្សាយនៅក្នុងជំហានទី២ នៅដើមឆ្នាំ២០១៦។ លោកបានបញ្ជាក់ថា ប្រសិនបើដំណើរការរបស់ទូរទស្សន៍ព្រះអាទិត្យត្រូវបានរំខានដោយបញ្ហាផ្លូវច្បាប់ នោះគណបក្សនឹងរៀបចំឲ្យមានការផ្សាយទូរទស្សន៍ព្រះអាទិត្យ នៅតាមប្រព័ន្ធ Onlineវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ