ដីសម្បទាននៅរតនៈគីរី៖ រដ្ឋាភិបាលថាបន្ថយដីពី៤ម៉ឺនហិកតាត្រូវកាត់បន្ថយសល់៤ពាន់ហិកតា
រដ្ឋាភិបាលកម្ពុជាកាលពីចុងឆ្នាំ២០១៥កន្លងទៅនេះ បានចេញសេចក្កីជូនដំណឹងស្តីពីការកាត់បន្ថយផ្ទៃដីសម្បទាន សេដ្ឋកិច្ចនៅជាប់ព្រំដែនក្នុងខេត្តរតនៈគីរី។ ជាសេចក្តីជូនដំណឹងដែលកាត់បន្ថយផ្ទៃដីសម្បទានដែលមានក្រុមហ៊ុន វៀតណាមជាភាគហ៊ុននោះពី៤ម៉ឺនហិកតាមកនៅត្រឹមជាង៤ពាន់ហិកតាតែ ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ដីវិនិយោគដីសម្បទានមហាសាលចំនួន៤ម៉ឺនហិកតានៅខេត្តរតនៈគីរីជាប់ព្រំដែនជាមួយនឹងប្រទេសវៀតណាមត្រូវបានកាត់បន្ថយនៅត្រឹមជាង៤ពាន់ហិកតា។ នេះបើតាមការបញ្ជាក់ពីលោក សយ សូណា ប្រធានមន្ទីរកសិកម្មខេត្តរតនៈគីរី។
លោកសយ សូណា បានទទួលស្គាល់ថាចំនួនដីទាំង៤ម៉ឺនហិកតានោះគឺទំហំផ្តល់ដីសម្បទានចាស់ដែលរដ្ឋាភិបាលបានឱ្យក្រុមហ៊ុនមុនការចុះអនុវត្តបទបញ្ជាលេខ០១របស់រដ្ឋាភិបាលកាលពីឆ្នាំ២០១២ និងការដោះស្រាយដីសម្បទានរបស់ក្រុមគណៈកម្មការអន្តរក្រសួងតែប៉ុណ្ណោះ។ ហើយលោកក៏បានទទួលស្គាល់ថាក្រុមហ៊ុនទាំង៤នោះ មានភាគហ៊ុនជាមួយនឹងកងទ័ពរបស់វៀតណាមពិតមែន។
ក្រុមហ៊ុនដែលទទួលបានដីសម្បទាននោះ មានចំនួន៤ គឺទី១ក្រុមហ៊ុន វាសនាអិនវេសមេនដែលទទួលបានដីសម្បទានចំនួន៥០៨០ហិកតា បច្ចុប្បន្នកាត់បន្ថយនៅត្រឹម១៥៤១ហិកតា។ ទី២ ក្រុមហ៊ុន Chea Chanrith Aphivath ទទួលបានដីសម្បទានចំនួន៥១២៤ ហិកតា បច្ចុប្បន្នកាត់បន្ថយនៅត្រឹម៩០០ហិកតា ទី៣ ក្រុមហ៊ុន Rama Khmer International ទទួលបានដីចំនួន២ម៉ឺនហិកតា ប៉ុន្តែបច្ចុប្បន្ននៅត្រឹម៩០០ហិកតា និតី៤ ក្រុមហ៊ុនDai Dong Duoungដែលទទួលបានដីសម្បទាន៩៣៨០ ហិកតា ប៉ុន្តែបច្ចុប្បន្នត្រូវកាត់បន្ថយមកនៅត្រឹម៨០០ហិកតា។ ដីសម្បទានទាំងនោះមានទីតាំងនៅក្នុងស្រុកអូយាដាវ ស្រុកអណ្តូងមាស និងស្រុកបរកែវ។
សូមបញ្ជាក់ថា បញ្ហាដីសម្បទានសេដ្ឋកិច្ចគឺជាចំណុចរស៊ើបរបស់រដ្ឋាភិបាលកម្ពុជាព្រោះថាដីសម្បទានទាំងនោះភាគច្រើនបានប៉ះពាល់ដីព្រៃសហគមន៍ និងដីកាន់កាប់របស់ប្រជាពលរដ្ឋ។ ទាក់ទងនឹងដីសម្បទានមហាសាលនៅខេត្តរតនៈគីរីនេះ ប្រធានគណបក្សសង្គ្រោះជាតិលោក សម រង្ស៊ី ក៏បានបង្ហោះទំព័រហ្វេសប៊ុករបស់លោកផងដែរ ដោយបានអត្ថាធិប្បាយវាយប្រហារមកកាន់រដ្ឋាភិបាលថែមទៀតផង។ យ៉ាងណាក៏ដោយ ចំពោះដីសម្បទានដ៏មហាសាលនេះរដ្ឋាភិបាលបានកាត់បន្ថយពី៤ម៉ឺនហិកតា មកនៅត្រឹម៤ពាន់ហិកតា តាំងពីចុងឆ្នាំ២០១៥ ដោយកំពុងឱ្យក្រុមហ៊ុនទាំងអស់ចុះបញ្ជីឡើងវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ