លោក ហ៊ុន សែន៖ ប្រជាជនកម្ពុជាឆ្លងឆ្នាំថ្មី ដោយគ្មានការភ័យខ្លាចនៃការវាយប្រហារភេវរកម្ម
មួយថ្ងៃក្រោយពីប្រជាពលរដ្ឋកម្ពុជាបានចូលរួមអបអរសាទរថ្ងៃឆ្លងឆ្នាំសកល (២០១៥-២០១៦) កាលពីរំលងអធ្រាត្រយប់មិញនេះ លោកនាយករដ្ឋមន្រ្តីហ៊ុន សែន បានវាយតម្លៃជាទូទៅថា ប្រជាជនកម្ពុជា បានចូលរួមយ៉ាងសប្បាយរីករាយ ដោយគ្មានការភ័យខ្លាចនៃការវាយប្រហារភេវរកម្មនោះទេ ខណៈដែលប្រទេសមួយចំនួននៅលើពិភពលោក កំពុងប្រឈមនឹងបញ្ហានេះ។ បើតាមរដ្ឋមន្រ្តីក្រសួងទេសចរណ៍ មានប្រជាពលរដ្ឋកម្ពុជាចន្លោះពី២ទៅ៧ម៉ឺននាក់បានចូលរួមអបអរសាទរនៅក្នុងខេត្តគោលដៅមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
«ឆ្នាំចាស់២០១៥បានកន្លង! ឆ្នាំថ្មី២០១៦ បានមកជំនួស ជាមួយនឹងក្តីរីករាយរបស់ប្រជាជន។ សុខសន្តិភាពបានផ្តល់ជូនជាតិ និងប្រជាជនយើងនូវការសប្បាយរីករាយក្នុងការឆ្លងឆ្នាំ ដោយគ្មានការភ័យខ្លាចនៃការវាយប្រហារភេវរកម្មដែលប្រទេសមួយចំនួនកំពុងប្រឈមនោះឡើយ»។ នេះគឺជាសាររបស់ប្រមុខរដ្ឋាភិបាលកម្ពុជាលោក ហ៊ុន សែន កាលពីព្រឹកព្រលឹម ថ្ងៃទី១ ខែមករា ឆ្នាំ២០១៦។ ជាសារលើកដំបូងរបស់លោកនាយករដ្ឋមន្រ្តី នៅក្នុងឆ្នាំថ្មី ឆ្នាំ២០១៦នេះ បន្ទាប់ពីប្រជាពលរដ្ឋកម្ពុជាភាគច្រើន បានចូលរួមអបអរសាទរ ដោយគ្មានបញ្ហាណាមួយកើតឡើងនោះទេ។
ពីខេត្តព្រះសីហនុ ជាទីដែលលោកនាយករដ្ឋមន្រ្តីហ៊ុន សែន បានចំណាយពេលវេលាសំរាកលំហែកាយជាមួយក្រុមគ្រួសាររបស់លោក, លោក ហ៊ុន សែន បានវាយតម្លៃជាទូទៅថា ប្រជាជនកម្ពុជា ពិតជាបានចូលរួមយ៉ាងសប្បាយរីករាយ នៅក្នុងថ្ងៃឆ្លងឆ្នាំ ដោយគ្មានការភ័យខ្លាចនៃការវាយប្រហារភេវរកម្ម ខណៈដែលប្រទេសមួយចំនួននៅលើពិភពលោក កំពុងប្រឈមនឹងបញ្ហានេះឡើយ។
សូមបញ្ជាក់ថា មានប្រជាពលរដ្ឋកម្ពុជាចន្លោះពី២ទៅ៧ម៉ឺននាក់ បានចូលរួមអបអរសាទរក្នុងរាត្រីឆ្លងឆ្នាំ នៅតាមខេត្តគោលដៅមួយចំនួន ដូចជា ខេត្តព្រះសីហនុ មានប្រជាពលរដ្ឋចូលរួមច្រើនជាងគេជាង៧ម៉ឺននាក់។ នេះបើយោងតាមការបញ្ជាក់ពីលោក ថោង ខុន រដ្ឋមន្រ្តីក្រសួងទេសចរណ៍កម្ពុជា។ បន្ទាប់មកគឺខេត្តសៀមរាម ទីក្រុងភ្នំពេញ ខេត្តបាត់ដំបង និងខេត្តកំពតជាដើម។ ក្រៅពីនេះ នៅមានខេត្តក្រុងមួយចំនួនទៀត ក៏បានរៀបចំអបអរសាទរ នៅថ្ងៃឆ្លងឆ្នាំ ដោយមានការតុបតែងលំអភ្លើងពណ៌គ្រប់ប្រភេទ រួមទាំងការប្រគុំតន្រ្តីរបស់ស្ថានីយ៍ទូរទស្សន៍ក្នុងស្រុកចំនួនផង។ បើតាមលោករដ្ឋមន្រ្តី ប្រជាពលរដ្ឋកម្ពុជាម្នាក់ បានចំណាយថវិកាម្នាក់ប្រមាណជា២០ម៉ឺនរៀលឡើងទៅ ដើម្បីចូលរួមអបអរសាទរ នៅក្នុងយប់ឆ្លងឆ្នាំថ្មីនេះ។
ចំណែកឯក្រុមអ្នកធ្វើការខាងទីភ្នាក់ងារទេសចរណ៍ឯកជនវិញ បានកត់សំគាល់ថា ក្នុងរយៈពេល៥ឆ្នាំចុងក្រោយនេះ ប្រជាពលរដ្ឋកម្ពុជាកាន់តែច្រើនឡើង បានចូលរួមអបអរសាទរថ្ងៃឆ្លងឆ្នាំសកលនេះ។ មានប្រជាពលរដ្ឋកម្ពុជាខ្លះ ថែមទាំងបានចេញទៅចូលរួមឆ្លងឆ្នាំនៅបរទេសផងដែរ ដូចជា ប្រទេសថៃ ម៉ាឡេស៊ី ហុងកុង សិង្ហបុរី និងមួយចំនួនទៀតនៅតំបន់អឺរ៉ុប និងតំបន់មជ្ឈឹមបូព៌ា។
ប៉ុន្តែយ៉ាងណាក៏ដោយ ការប្រារព្ធពិធីឆ្លងឆ្នាំសកល២០១៥-២០១៦នេះ នៅបណ្តាប្រទេសមួយចំនួននៅតំបន់អឺរ៉ុប បានប្រារព្ធឡើងជាមួយនឹងក្តីព្រួយបារម្ភនៃការវាយប្រហារភេរវកម្ម។ តួយ៉ាងដូចជា ទីក្រុងប្រុចស៊ែលប្រទេសប៊ែលស៊ិក, ទីក្រុងប៉ារីសប្រទេសបារាំង, ទីក្រុងអង់ការ៉ា រដ្ឋធានីប្រទេសតួកគី និងទីក្រុងម៉ូស្គូ ប្រទេសរុស្ស៊ីជាដើម ដែលបានលុបចោលការបាញ់កាំជ្រូចអបអរឆ្នាំថ្មី និងខ្លះទៀតបានបង្កើនការយាមកាមយ៉ាងតឹងរឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ