ប្រជាជនកម្ពុជាកាន់តែច្រើនឡើងនាំគ្នាប្រារព្ធពិធីបុណ្យឆ្លងឆ្នាំសកល
ពីមួយឆ្នាំទៅមួយឆ្នាំ ប្រជាជនកម្ពុជាកាន់តែច្រើនឡើងៗ នាំគ្នាប្រារព្ធពិធីបុណ្យឆ្លងឆ្នាំសកល ដូចបណ្តាប្រជាជននានា ទៅទូទាំងពិភពលោកដែរ។ នៅក្នុងឱកាសបុណ្យឆ្លងឆ្នាំសកល២០១៥ ចូល២០១៦នេះ ប្រជាជនកម្ពុជាជាច្រើនបាននាំគ្នាឈប់សំរាកការងារ ធ្វើដំណើរកំសាន្តទៅកាន់តំបន់ទេសចរណ៍សំខាន់ៗដូចជាតំបន់ប្រាសាទអង្គវត្ត មាត់សមុទ្រ និងតំបន់ប៉ែកឦសានជាដើម។ ដោយឡែកនៅក្នុងទីក្រុងភ្នំពេញវិញ ក៏នឹងមានប្រជាជនច្រើនចូលរួមឆ្លងឆ្នាំផងដែរ ដោយសារតែភោនីយដ្ឋាននៅតាមបណ្តោយដងទន្លេនានាសុទ្ធតែទទួលការកក់ទុកជាមុន ពេញៗអស់តែម្តង។
ចុះផ្សាយនៅថ្ងៃ៖
ក្នុងឱកាសឆ្លងឆ្នាំសកល២០១៥ ចូល ២០១៦នេះ នឹងមានការដុតកាំជ្រួចអបអរសាទរនៅក្នុងទីក្រុងភ្នំពេញ ហើយក៏មានការប្រគុំតន្ត្រីនៅសួនច្បារមុខវត្តបុរទមដែរ។ លោកឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ប្រាប់វិទ្យុបារាំងថា សាលាក្រុងមិនបានរៀបចំពិធីជាផ្លូវការណាមួយដើម្បីចូលរួមក្នុងពិធីបុណ្យចូលឆ្នាំសកលនេះទេ ក្រៅពីដាក់ក្លោងទ្វារស្វាគមន៍ចូលឆ្នាំសកលចំនួន៤កន្លែងទៅវិមានឯករាជ្យ នៅវត្តភ្នំ មាត់ទន្លេ និងក្បែរសម្តេចសង្ឃជួន ណាត ហើយនិងការតុបតែងភ្លើងពណ៌លម្អនៅតាមដងវិថីនានាក្បែរតំបន់មាត់ទន្លេនោះ។
រីឯនៅខេត្តសៀមរាបវិញ មានការប្រារព្ធពិធីបុណ្យឆ្លងឆ្នាំសកលនេះដូចរៀងរាល់ឆ្នាំដែរ គឺមាននៅព្រះរាជដំណាក់ នៅអង្គឃ្យុងយូរ និងនៅPup street ដែលជាកន្លែងប្រមូលផ្តុំទេសចរចំរុះជាតិសាស ហើយក៏មានការដុតកាំជ្រួចនៅវេលាម៉ោង១២យប់ ដើម្បីចូលរួមអបអរសាទរផងដែរ។
នៅក្នុងខេត្តព្រះសីហនុវិញមានការប្រគុំតន្ត្រីនិងតាំងពិព័រណ៌រយៈពេល៣ថ្ងៃមកហើយដើម្បីត្រៀមអបអរបុណ្យឆ្លងឆ្នាំសកលនេះ។ លោកឧកញ៉ា សុខ សុង អនុប្រធានសភាពាណិជ្ជកម្មខេត្តព្រះសីហនុ បានបញ្ជាក់ប្រាក់វិទ្យុបារាំងឲ្យដឹងថា យប់នេះនឹងមានការប្រគុំតន្ត្រីផ្សាយបន្តផ្ទាល់តាមរយៈទូរទស្សន៍ក្នុងស្រុកចាប់ពីម៉ោង ៩យប់ដល់ម៉ោង១២ ដើម្បីរងចាំឆ្លងឆ្នាំហើយនិងមានការដុតកាំជ្រួច នៅទីតាំងឆ្នេរអូឈើទាល។ នៅទីនោះផងដែរ ក៏មានស្តង់ទំនិញជាង១០០ស្តង់ ដោយមានទាំងផលិតផលក្នុងស្រុកនិងក្រៅស្រុកដាក់លក់និងតាំងបង្ហាញភ្ញៀវទេសចរទាំងជាតិនិងអន្តរជាតិ។
សូមបញ្ជាក់ផងដែរថា តាំងពីបុរាណកាលមកប្រជាជនខ្មែរប្រារព្ធពិធីបុណ្យចូលឆ្នាំតែម្តងគត់គឺ បុណ្យចូលឆ្នាំប្រពៃណីខែ្មរ ដែលត្រូវធ្វើឡើងក្នុងខែចេត្រ ឬត្រូវនឹងខែមេសា។ ប៉ុន្តែបច្ចុប្បន្ននេះ ក្រៅពីពិធីបុណ្យចូលឆ្នាំខ្មែរ ប្រជាជននៅក្នុងប្រទេសកម្ពុជាក៏ប្រារព្ធផងដែរ ពិធីបុណ្យចូលឆ្នាំចិន វៀតណាម និងបុណ្យចូលឆ្នាំសកលនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ