ពន្លាជាតិកម្ពុជាទទួលបាន«ពានរង្វាន់ប្រាក់»ក្នុងពិព័រណ៍ពិភពលោកឆ្នាំ២០១៥ នៅទីក្រុងមីឡង់ប្រទេសអ៊ីតាលី
ពន្លាជាតិកម្ពុជា ដែលត្រូវបានបែងចែកជាបីផ្នែកសំខាន់ៗ មានបង្ហាញពីប្រាង្គប្រាសាទនានា តំបន់កសិកម្ម និងតំបន់ពាណិជ្ជកម្ម បានទទួលពានរង្វាន់ប្រាក់ ក្នុងពិព័រណ៍ពិភពលោកឆ្នាំ២០១៥ នៅទីក្រុងមីឡង់ប្រទេសអ៊ីតាលី រយៈពេល៦ខែ ចាប់ពីថ្ងៃ១ឧសភា ដល់ថ្ងៃទី៣១ តុលាឆ្នាំ២០១៥កន្លងទៅនេះ។ រដ្ឋលេខាធិការ ក្រសួងពាណិជ្ជកម្មបានបង្ហាញ នៅក្នុងសន្និសីទសារព័ត៌មាននៅព្រឹកថ្ងៃទី២៤ ធ្នូនេះ នៅក្រសួងពាណិជ្ជកម្មថា ពន្លាជាតិកម្ពុជាទទួលបានភ្ញៀវ ចូលរួមទស្សនាប្រមាណជាង២លាននាក់ ក្នុងឱកាសតាំងពិព័រណ៍នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ជាមួយនឹងប្រធានបទ «ដំណាំស្រូវ ដាំលើដែនដីវប្បធម៌ដ៏ចំណាស់» កម្ពុជាបានបង្ហាញឲ្យពិភពលោកដឹងថា កម្ពុជាជាប្រទេសមួយសម្បូរទៅដោយសម្បត្តិវប្បធម៌ និងទំនៀមទំលាប់ប្រពៃណីល្អ តែក៏ជាប្រទេសមួយបានដើរតួនាទីដ៏សំខាន់ក្នុងការផលិតអង្ករសម្រាប់ផ្គត់ផ្គង់ពិភពលោកផងដែរ។ តាមរយៈការរៀបចំប្រធានបទ និងការរៀបចំពន្លាជាតិ បានធ្វើឲ្យកម្ពុជា ក្លាយជាប្រទេសតែមួយគត់ក្នុងតំបន់អាស៊ាន មានមោទនភាពទទួលបាន «ពានរង្វាន់ប្រាក់មួយគ្រឿង (Silver Awards)» លើប្រធានបទអភិវឌ្ឍន៍ ពីគណៈកម្មការ រៀបចំពិព័រណ៍ពិភពលោកឆ្នាំ២០១៥ ទីក្រុងមីឡង់ ប្រទេសអ៊ីតាលី និងការិយាល័យពិព័រណ៍អន្តរជាតិ BIE។ នេះបើតាមការបញ្ជាក់របស់លោក ឈួន ដារ៉ា រដ្ឋលេខាធិការ ក្រសួងពាណិជ្ជកម្ម នៅក្នុងសន្និសីទសារព័ត៌មាននៅព្រឹកថ្ងៃព្រហស្បតិ៍នេះ។
ពន្លាជាតិកម្ពុជាត្រូវបានសាងសង់ឡើងនៅក្នុងទីតាំង Rice Cluster ដែលជាតំបន់ស្រូវអង្ករ ហើយមានប្រទេស៦ចូលរួមនៅក្នុងតំបន់នោះ មានដូចជាកម្ពុជា បង់ក្លាដេស ឡាវ មីយ៉ាន់ម៉ា សេរ៉ាឡេអូន និងបាស្មាទីឥណ្ឌា។ ពន្លាជាតិកម្ពុជាត្រូវបានបែងចែកជាបីផ្នែកសំខាន់ៗ ដោយផ្នែកទីមួយត្រូវបានតុបតែងរចនាពីវប្បធម៌ អរិយធម៌ ដែលបង្ហាញពីប្រាង្គប្រាសាទនានា។ ផ្នែកទីពីរត្រូវបានតុបតែងជាតំបន់កសិកម្ម ដើម្បីឲ្យស្របទៅតាមប្រធានបទនៃពិព័រណ៍ពិភពលោក ដែលផ្តោតសំខាន់ទៅលើដំណាំស្រូវ។ និងផ្នែកទីបី ត្រូវបានរៀបចំឡើងជាតំបន់ពាណិជ្ជកម្ម ដោយមានការដាក់តាំងបង្ហាញ និងលក់នូវផលិតផលសិប្បកម្ម វត្ថុអនុស្សាវរីយ៍ និងមានការរៀបចំឆាកសម្តែងសិល្បៈផងដែរ។
សូមបញ្ជាក់ថាពិព័រណ៍ពិភពលោកឆ្នាំ២០១៥ ក្រោមប្រធានបទ «ចិញ្ចឹមភពផែនដី ផ្តល់ថាមពលសម្រាប់ជីវិត» ត្រូវបានសម្ពោធជាផ្លូវការកាលពីថ្ងៃទី១ឧសភា ឆ្នាំ២០១៥កន្លងទៅនេះ ក្រោមអធិបតីភាពលោកនាយករដ្ឋមន្ត្រីអ៊ីតាលី Matteo Renzi និងមានការចូលរួមពីបណ្តាគណៈប្រតិភូនៃប្រទេសជាសមាជិក BIE និងអង្គការអន្តរជាតិនានា។ ពិព័រណ៍នោះមានបណ្តាប្រទេសចំនួន១៤៥នៅលើពិភពលោក និងអង្គការអន្តរជាតិធំៗចំនួន៣ បានចូលរួម ហើយទទួលបានអ្នកទស្សនារហូតដល់ជាង ២០លាននាក់មកពីទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ