តំណាងរាស្ត្របក្សប្រឆាំងដែលរងការវាយដុំ ព្រួយបារម្ភពីសន្តិសុខ ពេលវិលត្រលប់មកវិញ
លោក គង់ សភា និងលោក ញ៉យ ចំរើន អ្នកតំណាងរាស្ត្រគណបក្សសង្គ្រោះជាតិ នឹងវិលត្រលប់មកកាន់ប្រទេសកម្ពុជាវិញ នៅថ្ងៃទី២៤ខែវិច្ឆិកាខាងមុខនេះ បន្ទាប់ពីសម្រាកព្យាបាលរបួសនៅទីក្រុងបាងកកប្រទេសថៃអស់រយៈពេលជិត១ខែ។ ស្ថានភាពមុខរបួសបានធូrស្រាល ហើយក្រុមគ្រូពេទ្យក៏បានអនុញ្ញាតឲ្យចេញពីមន្ទីរពេទ្យបានដែរ។ ក៏ប៉ុន្តែអ្វីដែលសំខាន់ គឺបញ្ហាសន្តិសុខ និងសុវត្ថិភាព សំរាប់អ្នកតំណាងរាស្ត្រ ព្រោះថា ជនដៃដល់មិនទាន់ត្រូវបានចាប់ខ្លួន ពីសំណាក់អាជ្ញាធរនៅឡើយទេ ក្រៅតែពីអ្នកចេញមុខមកសារភាព៣នាក់។
ចុះផ្សាយនៅថ្ងៃ៖
ស្តាប់ - ០២:០០
បើតាមគម្រោង លោក គង់ សភា និងលោក ញ៉យ ចំរើន នឹងមកដល់រាជធានីភ្នំពេញនៅម៉ោងប្រមាណ ២និង៤០នាទីរសៀល ថ្ងៃទី២៤ខែវិច្ឆិកាសប្តាហ៍ក្រោយនេះ។ នេះបើយោងតាមគណនេយ្យហ្វេសប៊ុករបស់លោក គង់ សភា ដែលបានប្រកាសឲ្យដឹងនៅថ្ងៃទី២២វិច្ឆិកា។ លោក គង់ សភា បានសរសេរថា ស្ថានភាពមុខរបួសរបស់លោកទាំងពីរបានធូរស្បើយបន្តិចហើយ បន្ទាប់ពីក្រុមគ្រូពេទ្យបានពិនិត្យយ៉ាងយកចិត្តទុកដាក់។ លោក គង់ សភា និងលោក ញ៉យ ចំរើន បានចំណាយពេល២៨ថ្ងៃ ក្នុងការព្យាបាលរបួសនៅក្នុងមន្ទីរពេទ្យប្រទេសថៃ។
ទន្ទឹមគ្នានឹងដំណឹងនៃការវិលត្រលប់នេះ អ្នកតំណាងរាស្ត្រទាំងពីររូប ក៏បានបង្ហាញការព្រួយបារម្ភពីបញ្ហាសន្តិសុខ និងសុវត្ថិភាពនៅពេលវិលត្រលប់មកដល់ប្រទេសកម្ពុជាវិញដែរ។ លោក គង់ សភា ក៏បានអំពាវនាវឲ្យអាជ្ញាធរកម្ពុជា បន្តស្វែងរកចាប់ខ្លួនជនដៃដល់ឲ្យមានប្រសិទ្ធិភាព និងឆាប់រហ័ស ដើម្បីធានាសុវត្ថិភាពដល់អ្នកតំណាងរាស្ត្រទាំងមូល។
លោក ឈាង វុន អ្នកនាំពាក្យសភាជាតិ មិនបានចាត់ទុកដំណឹងនៃការវិលត្រលប់របស់អ្នកតំណាងរាស្ត្រទាំងពីររូប ថា ជារឿងគួរឲ្យភ្ញាក់ផ្អើលនោះទេ ហើយរដ្ឋសភា ក៏មិនចាំបាច់ធ្វើអ្វីពិសេសណាមួយនោះដែរ។
គួរជំរាបជូនថា លោក គង់ សភា អ្នកតំណាងរាស្ត្រមណ្ឌលខេត្តស្វាយរៀង និងលោក ញ៉យ ចំរើន អ្នកតំណាងរាស្ត្រមណ្ឌលខេត្តកំពង់ចាម ត្រូវបានក្រុមបាតុករវាយឲ្យរងរបួសធ្ងន់ធ្ងរ នៅក្នុងបាតុកម្មទំលាក់លោក កឹម សុខា ពីតំណែងអនុប្រធានទី១នៃរដ្ឋសភា កាលពីថ្ងៃទី២៦ខែតុលាឆ្នាំ២០១៥។ កាលណោះ លោក គង់ សភា បានរងរបួសបាក់ឆ្អឹងខ្ទង់ច្រមុះ និងរហែកក្រដាសត្រចៀក ដែលត្រូវតែវះកាត់ជាបន្ទាន់។ ចំណែកឯលោក ញ៉យ ចំរើន បានរងរបួស បាក់ឆ្អឹងកដៃខាងស្ដាំ និងបាក់ឆ្អឹងរង្វង់ភ្នែកខាងស្ដាំ ដែលត្រូវឆ្លងកាត់ការវះកាត់ដូចគ្នា។ បើយោងតាមរូបភាពនៅថ្ងៃនេះ ដៃខាងស្តាំរបស់លោក ញ៉យ ចំរើន នៅមិនទាន់ជាសះស្បើយនៅឡើយទេ។
គួរជម្រាបជូនដែរថា ក្រោយពីអំពើហិង្សាវាយដំលើអ្នកតំណាងរាស្ត្របក្សប្រឆាំងទាំងពីររូបនេះមក មានតែជនដៃដល់៣នាក់ប៉ុណ្ណោះ ដែលបានចេញមុខមកសារភាព បើទោះបីជារដ្ឋាភិបាលបានបង្កើតគណៈកម្មការស៊ើបអង្កេតពិសេសមួយក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ