ហើម-ក-ជើង ស្ពឹកស្រពន់នៅកំភួនជើង ជើងធ្ងន់ ឈឺចុកចាប់ មេឃកាន់តែក្តៅ អវៈយវៈក្រោមទាំងទ្វេ កាន់តែធ្ងន់ តឹង ណែន មានអារម្មណ៍ឆាប់នឿយហត់ជើងខ្លាំងមែនទែន។ អាការៈធ្ងន់ជើងនេះ ច្រើនកើតមានឡើងចំពោះស្ត្រី (៧០%) និងច្រើនតែមានពាក់ព័ន្ធនឹងបញ្ហាចរន្តឈាមរត់មិនស្រួល នៅសរសៃវ៉ែន សរសៃដែលនាំឈាមទៅបេះដូង។តើនេះជាអ្វី ? ត្រូវធ្វើយ៉ាងណា ទើបបានធូរស្រាល ?
នៅក្នុងខ្លួនប្រាណមនុស្សមានឈាមរត់កាត់ឆ្វាត់ឆ្វែង តាមសរសៃ ៖ ជាសរសៃអាទែ និងសរសៃវែន។ សរសៃអាទែ ជាអ្នកនាំដឹកជញ្ជូនឈាមពីបេះដូង ទៅចិញ្ចឹមសរីរាង្គនិងជាលិកាផ្សេងៗរបស់យើង។ គឺជាឈាមក្រហមដែលសម្បូរទៅដោយអ៊ុកស៊ីសែន និងជីវជាតិ។ នៅពេលចែកចាយអុកស៊ីសែន និងជីវជាតិអស់ហើយ ឈាមនេះក៏ហូរវិលបកមកបេះដូងវិញ តាមសរសៃវែន។ សរសៃវែននាំឈាមទៅបេះដូងវិញនេះមាន ឬហៅថាសរសៃឈាមខ្មៅ ផ្ទុកទៅដោយឧស្ម័នកាបូនិក និងកាកសំណល់ ដែលត្រូវបំផ្លាញចោលក្នុងដំណើរហូរត្រលប់ទៅបេះដូងវិញ។
ហេតុអ្វីបានជាជើងស្ពឹកស្រពន់ ?
ការហូរត្រលប់ឡើងទៅលើ (ទៅបេះដូង)នេះហើយ ដែលមានទាក់ទងខ្លាំងនឹងអាការៈធ្ងន់ស្ពឹកស្រពន់ជើង។ ខុសពីសរសៃឈាមក្រហមអាទែផ្ទៃនៃសរសៃឈាមវែនរួមរឹតដោយសរសៃសាច់ដុំ។ ដូច្នេះវាមិនអាចកន្ទ្រាក់ជួយធាក់ឈាមឱ្យហូរឡើងទៅបេះដូងទេ។ ប៉ុន្តែសរសៃវែនមានបំពាក់ដោយប្រព័ន្ធសន្ទះដូចត្រចៀកទ្វារ បើកឱ្យឈាមហូរឡើងតែបិទមិនឱ្យឈាមហូរបកក្រោយទេ។ សម្ពាធបាតជើង និងការកន្ទ្រាក់សាច់ដុំកំភួនជើង ក៏បានរួមចំណែកជួយច្រានឈាមឱ្យហូរឡើងទៅបេះដូងវិញដែរ ដែលនេះមានន័យដោយខ្លីថា ការដើរគឺជាលំហាត់ដ៏ប្រពៃសម្រាប់ជំនួយដំណើរវិលត្រលប់ទៅកាន់បេះដូងរបស់ឈាម។
កាលណាប្រព័ន្ធនេះទន់ខ្សោយ ឬដោយហេតុតែភាពស្រណុកសុខស្រួលមិនសូវដើរ ឬដោយការងារជំរុញឱ្យស្ថិតក្នុងជំហរឈរច្រើនម៉ោងមួយថ្ងៃៗ នោះដំណើរឈាមក្នុងសរសៃវែន ពិតជាត្រូវជួបការលំបាក។ អារម្មណ៍ថាមានជើងធ្ងន់ ស្ពឹកស្រពន់ នឹងអាចងាយកើតឡើងជាប្រាកដ ជំងឺខ្សោយសរសៃវែននឹងរាតត្បាតបន្តិចម្តងៗ។
លោកវេជ្ជបណ្ឌិត Ariel Toledano ឯកទេសផ្នែកសរសៃឈាមវ៉ែន ៖
“មានមូលហេតុច្រើនដែលបង្កឱ្យមានជំងឺធ្ងន់ជើង។ ប៉ុន្តែការស្ពឹកធ្ងន់ជើង ច្រើនតែមានវដ្តរបស់វា។ ចំពោះស្ត្រីពេលមុនមកធ្លាក់រដូវ ជាដំណាក់កាលដែលស្រ្តីច្រើនឈឺចុកណែនជើង។ ក្នុងករណីនេះ គេអាចជួយព្យាបាលបាន។ ជើងធ្ងន់អាចបណ្តាលមកពីដំណើរប្រែប្តូរទំរង់អាហារនៅក្នុងរាងខ្លួន ដោយឱ្យតែមានបញ្ហាអាកាសធាតុ មេឃក្តៅខ្លាំង សីតុណ្ហភាពឡើងខ្ពស់ ប្តូរអាកាសធាតុ ប្តូររដូវ ជើងក៏ផ្តល់អារម្មណ៍ប្រែប្រួលចុកណែន តឹងឈឺទៅតាមនោះដែរ។
សកម្មភាពការងារ ក៏អាចជាភ្នាក់ងារបង្កឱ្យមានបញ្ហាណែនជើងដែរ ជាពិសេសចំពោះការងារដែលនាំឱ្យឈរ ឬអង្គុយយូរ ច្រើនម៉ោងជាប់គ្នា ក្នុងមួយថ្ងៃៗ។ គេនាំគិតព្រួយបារម្ភច្រើនចំពោះអ្នកឈរធ្វើការ តែតាមការពិតអ្នកអង្គុយនៅក្នុងការិយាល័យ ក៏មានហានិភ័យច្រើននឹងជួបបញ្ហាធ្ងន់ជើងដែរ។”
ផលវិបាកនៃការខ្សោយសរសៃឈាម
ដំណើរហូរឈាមត្រលប់ទៅបេះដូងវិញ មិនត្រឹមតែបង្កឱ្យមានអារម្មណ៍ថាឈឺរំខាន ណែន តឹង មិនស្រណុកនៅនឹងជើង ការឡើងហើម ភាពស្ពឹកស្រពន់ ធ្ងន់លើកមិនរួចនៃជើង តែអាចមាន ហានិភ័យ និងការលាក់ជំងឺដ៏ធ្ងន់ធ្ងរ គួរឱ្យព្រួយបារម្ភខ្លាំង។ នៅពេលឃើញមានឡើងសរសៃឈាមវ៉ែនរីក ប៉ោង ទល់មើលឃើញនៅលើស្បែក ជើងប្តូររូបភាពខាងក្រៅ រមាស់ គួរតែគិតគូរទៅពិគ្រោះជាមួយគ្រូពេទ្យឯកទេស ព្រោះអនាគតយូរទៅ អាការៈនេះអាចនឹងស្តែងចេញជាផលវិបាកធ្ងន់ធ្ងរ។
« មានអាការៈធ្ងន់ជើងយូរៗទៅ យើងអាចនឹងមានភាពមិនធម្មតានៅលើស្បែក ដោយអាចនឹងគ្រោះកើតដំបៅ ហើយកាន់តែធ្ងន់ធ្ងរទៅទៀត នឹងអាចមានការបង្កដុំឈាមតូចៗ នៅតាមសរសៃឈាម។ ផលិវិបាកទាក់ទងនឹងសរសៃឈាមវ៉ែន ដែលក្រុមគ្រូពេទ្យព្រួយបារម្ភនិងខ្លាចជាងគេបំផុត គឺការរលាកសរសៃឈាម។ ជំងឺនេះ នឹងអាចកើតមានបាន នៅពេលណាដុំកំណកឈាម ទៅតោងជាប់នៅលើផ្ទៃនៃសរសៃវ៉ែន ឬសរសៃអាទែ ព្រោះតែចរន្តឈាមរត់មិនស្រួល។
ហើយប្រសិនបើដុំកំណកឈាម ដាច់អាចហូរឡើងតាមសរសៃឈាមដល់សួត នោះនឹងអាចកើតមានករណីស្ទះប្រហោងសរសៃឈាម។ ការស្ទះបែបនេះ អាចនឹងធ្វើឱ្យអ្នកជំងឺស្លាប់បាន។ »
វិធីការពារ និងសម្រួលការស្ពឹកស្រពន់ជើង
ដើម្បីថែរក្សាសុខភាពជើង និងសាកល្បងកាត់បន្ថយរោគសញ្ញាឈឺចុកចាប់ ធ្ងន់ ក្តៅក្រហាយជើង យើងអាចមានដំណោះស្រាយច្រើន។ ដើម្បីសម្រួល កុំឱ្យមានអាការៈសញ្ញាធ្ងន់ធ្ងរខ្លាំង សេចក្តីណែនាំទីមួយ គឺទាក់ទងនៅទម្លាប់រស់នៅប្រចាំថ្ងៃ សូមកុំស្លៀកពាក់ខោអាវតឹងៗ ដែលរំខានដល់ចលនារត់របស់ឈាម។ ស្រោចទឹកជើងញយៗ ជាមួយទឹកត្រជាក់ស្រេប។ បើនៅស្រុកត្រជាក់ អាចប្រើក្រណាត់សើមទឹក មកស្អប់ឬគ្របជើងក៏បាន។ ធ្វើចលនាសាច់ដុំ ជើង ការដើរជាលំហាត់និងជាមធ្យោបាយដ៏ប្រសើរបំផុតដែលជួយឈាមឱ្យមានចរន្តហូរត្រលប់ទៅវិញស្រួល។ ព្រោះនៅពេលដើរ បាតជើងជាន់ដី បោះជំហាន បង្កើតជាសម្ពាធ និងជាកន្ទ្រាក់សាច់ដុំកំភួនជើង ជួយធាក់ឈាមឱ្យហូរឡើងបញ្ច្រាសទៅបេះដូងវិញ។
នៅពេលយប់ ឬពេលត្រលប់ចូលផ្ទះសម្រាកពីការងារ យើងអាចទម្រេតខ្លួន ឬសំរាន្តដោយលើងកល់ចុងជើងនឹងខ្នើយឱ្យខ្ពស់ជាងក្បាល បញ្ច្រាសសកម្មភាពពេលថ្ងៃ ដែលជើងសំយ៉ុងចុះក្រោមរហូត ឈាមពិបាករត់ឡើងមកវិញ។
ពេលធ្វើដំណើរឆ្ងាយ ត្រូវអង្គុយសំយ៉ុងជើងក្នុងរថយន្ត ឬយន្តហោះយូរថ្ងៃ មធ្យោបាយដ៏ប្រសើរ សម្រាប់បញ្ជ្រៀសផលវិបាកនៃការធ្ងន់ស្ពឹកជើង គឺត្រូវពាក់ស្រោមជើង ផលិតឡើងសម្រាប់ជំនួយចរន្តឈាម និងទទួលស្គាល់តាមបែបវេជ្ជសាស្ត្រវិទ្យាសាស្ត្រនិងរូបកាយសាស្ត្រត្រឹមត្រូវ ដែលភាសាបារាំងហៅថា bas de contention។
សម្រាប់អ្នកចូលចិត្តនិយមលេបថ្នាំ គេអាចរកថ្នាំនៅតាមឱសថស្ថានបាន។ ជាថ្នាំ គ្រាប់ដែលផលិតឡើងសម្រាប់ជំនួយកម្លាំងសរសៃឈាមតូចៗ បើករន្ធឱ្យឈាមងាយរត់ទៅរត់មក។ ជាលទ្ធផលអាការៈខ្សោយសរសៃឈាមនឹងបានធូរស្រាល ការឈឺចុកចាប់ធ្ងន់ជើង ក៏បានចុះថយ។ ឬពុំនោះទេ លោកអ្នកក៏អាចរកជែល ឬក្រែម ដែលលាបទៅបានត្រជាក់ជើង ក៏អាចជួយសម្រួលបានមួយភ្លែតៗដែរ។
ធ្វើម៉ាស្សាសម្រួលលំហូរឈាម និងទឹករងៃ
ម៉ាស្សា ច្របាច់ធ្វើសរសៃ ក៏ត្រូវបានណែនាំឱ្យអនុវត្តដែរ ! ជាពិសេសការធ្វើម៉ាស្សាជើង ! អ្នកវេជ្ជសាស្ត្របានទទួលស្គាល់អំពីភាពប៉ិនប្រសព្វរបស់ពលរដ្ឋអាស៊ី ក្នុងការម៉ាស្សាជើង។ ការច្របាច់ ម៉ាស្សានេះ មិនត្រូវបានចាត់ទុកជាវិធីបង្ការដ៏មានប្រសិទ្ធិភាព កុំឱ្យមានបញ្ហាសរសៃឈាមខ្សោយទេ។ ប៉ុន្តែនៅពេលមានរោគសញ្ញាហើយ ម៉ាស្សាអាចសម្រួលការឈឺចុកចាប់ស្ពឹកស្រពន់បានយ៉ាងជាក់ស្តែង ប្រសិនបើជាម៉ាស្សាត្រឹមត្រូវប្រកបដោយបច្ចេកទេស ឱ្យអ្នកជំងឺធ្វើចលនាដង្ហើមស៊ីគ្នា។ ហើយដើម្បីទាញប្រសិទ្ធិភាពបានពេញលេញ ត្រូវធ្វើមាស្សាជើងម្ខាងៗ កន្លះម៉ោង ជាធម្យម ក្នុងកន្លែងនិងអារម្មណ៍ស្ងប់ស្ងាត់ ជាច្រើនដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ