ក្រសួងបរិស្ថានត្រៀមបើកធ្វើយុទ្ធនាការត្រួតពិនិត្យបរិស្ថានក្នុងរោងចក្រ
ក្រុមការងាររបស់ក្រសួងបរិស្ថាន សហការជាមួយអាជ្ញាធរក្នុងតំបន់ និងរោងចក្រ នឹងធ្វើយុទ្ធនាការ សំអាតរោងចក្រ នៅក្នុងពេលឆាប់ៗនេះ ។ យុទ្ធនាការនេះមានគោលដៅត្រួតពិនិត្យបរិស្ថានក្នុងរោងចក្រដើម្បីបញ្ចៀសផលប៉ះពាល់សុខភាពរបស់និយោជិត។ រោងចក្រទាំងអស់ក៏ត្រូវបានបញ្ជាអោយធ្វើការវាយ តម្លៃផលប៉ះពាល់បរិស្ថានផងដែរ។ នេះបើតាមប្រសាសន៍របស់ លោក សាយ សំអាល់ រដ្ឋមន្ត្រីក្រសួងបរិស្ថានដែលបានថ្លែងនៅក្នុង សន្និសីទសារព័ត៌មាន នាព្រឹកថ្ងៃទី ០៩ មីនា នេះនៅឯទីស្តីការក្រសួងបរិស្ថាន។
ចុះផ្សាយនៅថ្ងៃ៖
ស្តាប់ - ០១:៣៣
ការត្រួតពិនិត្យ រចនាសម្ពន្ធ័ លំហូរខ្យល់ ជាតិពុល ការបញ្ចេញចោលកាកសំណល់ នៅក្នុងរោងចក្រ នឹងត្រូវធ្វើឡើងជាជំហានដំបូង នៅក្នុង រាជធានីភ្នំពេញ និង ខេត្តកណ្តាល។ នេះបើតាមការអោយដឹងពីលោក រដ្ឋមន្ត្រីក្រសួងបរិស្ថាន។
លោក សាយសំអាល់ មានប្រសាសន៍ថា ក្រសួងបានចាត់តាំងក្រុមការងាររួចរាល់អស់ហើយដើម្បីទៅត្រួតពិនិត្យនៅតាមរោងចក្រនានាក្នុងពេលឆាប់ៗខាងមុខនេះ ដោយមានការសម្របសម្រួលពីអាជ្ញាធរក្នុងតំបន់និងរោងចក្រ។
លោកបន្តថា នៅក្នុងការត្រួតពិនិត្យនេះប្រសិនបើមានរចនាសម្ពន្ធ័ណាមួយបង្កផលប៉ះពាល់ដល់បរិស្ថាន ឬក៏សុខភាពកម្មករនោះ រោងចក្រត្រូវតែធ្វើការកែសំរួលរចនាសម្ពន្ធ័នោះ ហើយក្នុងរយៈពេល៦ខែក្រសួងនឹងចុះមកត្រួតពិនិត្យម្តងទៀត។ ផ្ទុយទៅវិញ បើរោងចក្រមិនព្រមកែសម្រួលទេ វិធានការ គឺក្រសួងនឹងកែសំរួលរចនាសម្ពន្ធ័នោះដោយផ្ទាល់ ហើយគិតប្រាក់ពីរោងចក្រវិញ ។
នៅក្នុងសន្និសីទសារព័ត៌មាននាព្រឹកថ្ងៃទី០៩ មីនានេះ លោកបានថ្លែងទៀតថា ក្រសួងបរិស្ថានបានចេញលិខិតអោយក្រុមហ៊ុនទាំងអស់ធ្វើEIA ឬការវាយតម្លៃផលប៉ះពាល់បរិស្ថាន។ លិខិតនេះ ធ្វើឡើងគឺក្នុងគោលដៅ អោយរោងចក្រទាំងអស់ ចៀសវាងមុនអោយហើយ ឬកែសម្រួល នូវរាល់កំហុសឆ្គងណាមួយដែលបំពុលបរិស្ថាន ព្រោះក្រសួងមិនចង់អោយមានការធ្វើខុសហើយទើបទៅចាប់ដាក់ទោសនោះទេ។
សូមបញ្ជាក់ថា កន្លងមកនេះ បញ្ហាបរិយាកាសក្នុងរោងចក្រ គ្មានខ្យល់ចេញចូលគ្រប់គ្រាន់ និង មានក្លិនមិនល្អ គឺជាផ្នែកមួយដែលបណ្តាលអោយ កម្មករនៅក្នុងរោងចក្រមួយចំនួនបានដួលសន្លប់។ ចំនែក បញ្ហាកាកសំណល់ជាតិពុលចេញពីរោងចក្រ គឺជាក្តីកង្វល់បរិស្ថាននៅជុំវិញពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ