អតីតគរុនិស្សិត ដាក់ ញត្តិទៅក្រសួងអប់រំ ដើម្បីទាមទារប្រាក់អាហារូបករណ៍៨ខែ
អតីតគរុនិស្សិតមន្ដ្រីរាជការ កម្រិតឧត្តម ជំនាន់ទី១៩ នៃវិទ្យាស្ថានជាតិអប់រំ ជាង៤០០នាក់ បានដាក់ញត្តិទៅកាន់ក្រសួងអប់រំនៅថ្ងៃចន្ទនេះ ដើម្បីទាមទារប្រាក់អាហារូបករណ៍ចំនួន៨ខែ។ បើតាមគរុនិស្សិត ប្រាក់អាហារូបករណ៍នោះ ត្រូវបានក្រសួងសេដ្ឋកិច្ចនិងហិរញ្ញវត្ថុ បដិសេធមិនផ្ដល់ជូនទេ។ ការបដិសេធនេះ ត្រូវបានក្រុមគរុនិស្សិតអះអាងថា ផ្ទុយពីខ្លឹមសារនៃអនុក្រឹត្ររបស់រាជរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
នៅព្រឹកថ្ងៃចន្ទ ទី០២ខែមីនានេះ តំណាងអតីតគរុនិស្សិតកម្រិតឧត្តមជំនាន់ទី១៩ នៃវិទ្យាស្ថានជាតិអប់រំ បានយកញត្តិទៅដាក់នៅក្រសួងអប់រំ យុវជន និងកីឡា ដើម្បីឲ្យក្រសួងធ្វើអន្តរាគមណ៍ទៅក្រសួងសេដ្ឋកិច្ចនិងហិរញ្ញវត្ថុ ទាមទារផ្ដល់ប្រាក់អាហារូបករណ៍ដល់គរុនិស្សិតចំនួន៤៦១នាក់។
បើតាមញត្តិដែលវិទ្យុបារាំងអន្ដរជាតិទទួលបាន អតីតគរុនិស្សិតបានអះអាងថា នៅក្នុងឆ្នាំសិក្សា២០១៣ ២០១៤ រាជរដ្ឋាភិបាលកម្ពុជាបានចេញអនុក្រឹត្រលេខ១៧៤ អនក្រ បក ចុះថ្ងៃទី០៥ខែឧសភាឆ្នាំ២០១៤។ ជាអនុក្រឹត្រ ស្ដីពីការផ្ដល់អាហារូបករណ៍ចំនួន៨ម៉ឺនរៀលក្នុងមួយខែ ជូនគរុសិស្ស និងគរុនិស្សិតជាមន្ដ្រីរាជការគ្រប់ប្រភេទ ដែលក្រសួងស្ថាប័នអនុញ្ញាតឲ្យទៅទទួលការបណ្ដុះបណ្ដាលរយៈពេលវែង។ ញត្តិដដែលបានបន្តថា នៅក្នុងឆ្នាំ២០១៣ វិទ្យាស្ថានជាតិអប់រំ បានបើកប្រាក់អាហារូបករណ៍ដល់អតីតគរុនិស្សិតជំនាន់ទី១៩ ចំនួន២ខែរួចហើយ គឺខែវិច្ឆិកា និងខែធ្នូ។ ប៉ុន្តែចាប់ពីខែមករា រហូតដល់ខែសីហា ឆ្នាំ២០១៤ វិទ្យាស្ថានជាតិអប់រំ មិនបានបើកប្រាក់អាហារូបករណ៍ឲ្យអតីតគរុនិស្សិតនោះទេ។
បើតាមតំណាងអតីតគរុនិស្សិត លោក ងិន សុផល វិទ្យាស្ថានជាតិអប់រំបានអះអាងថា ប្រាក់អាហារូបករណ៍ប្រចាំខែជូនគរុនិស្សិតជាមន្ដ្រីរាជការ មិនត្រូវបានបើកជូនទេ ដោយយោងតាមសេចក្ដីសម្រេចរបស់ក្រសួងសេដ្ឋកិច្ច និងហិរញ្ញវត្ថុ។ ប្រភពដដែលបញ្ជាក់ថា សេចក្ដីសម្រេចនេះ អនុវត្តតែចំពោះអតីតគរុនិស្សិតជាមន្ដ្រីរាជការដែលបណ្ដុះបណ្ដាលនៅវិទ្យាស្ថានជាតិអប់រំតែប៉ុណ្ណោះ ចំណែកនៅតាមបណ្ដាគរុកោសល្យភូមិភាគផ្សេងៗវិញ គឺមិនបានអនុវត្តទេ។ លោក ងិន សុផល ថា សេចក្ដីសម្រេចរបស់ក្រសួងសេដ្ឋកិច្ចនេះ គឺផ្ទុយពីខ្លឹមសារនៃអនុក្រឹត្ររបស់រាជរដ្ឋាភិបាល និងស្នើឲ្យក្រសួងអប់រំ ធ្វើអន្តរាគមន៍ជុំវិញរឿងនេះ។
រហូតមកទល់ម៉ោង១១ ព្រឹកថ្ងៃចន្ទទី០២ខែមីនានេះ ញត្តិរបស់ក្រុមអតីតគរុនិស្សិតត្រូវបានតំណាងរដ្ឋបាលនៃក្រសួងអប់រំទទួលយកហើយ ហើយបានសន្យាថា នឹងធ្វើការបំភ្លឺ ក្នុងពេល៧ថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ