ផ្សារអូរឬស្សីបើកលក់ជាធម្មតា បន្ទាប់ពីទទួលរងអគ្គីភ័យកាលពីយប់មិញ
បន្ទាប់ពីទទួលរងអគ្គីភ័យកាលពីវេលាម៉ោងជាង១០ យប់ថ្ងៃអាទិត្យម្សិលមិញ នៅព្រឹកថ្ងៃចន្ទ ទី០៩កុម្ភៈនេះ ផ្សារអូរឬស្ស៊ីបានបើកដំណើរការជាធម្មតាវិញហើយ។ នៅព្រឹកថ្ងៃចន្ទនេះ អាជីវករដែលជាម្ចាស់តូបខូចខាត កំពុងតែធ្វើការជាមួយអាជ្ញាធរខណ្ឌ ដើម្បីបូកសរុបការខូចខាត។ ប៉ុន្តែរបាយការណ៍លម្អិតទាក់ទងនឹងការខូចខាតថាមានទំហំប៉ុណ្ណានោះ គឺនៅមិនទាន់មាននៅឡើយទេ។ នេះបើតាមការឲ្យដឹងពីអាជ្ញាធរមានសមត្ថកិច្ចរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៨
កាលពីវេលាម៉ោងប្រមាណ១០និង៣០នាទី យប់ថ្ងៃអាទិត្យ ទី០៨ខែកុម្ភៈ អគ្គីភ័យបានឆាបឆេះតូបលក់ដូរមួយចំនួននៅជាន់ផ្ទាល់ដីនៃផ្សារអូរឬស្សី ក្នុងតំបន់លក់ម្ហូបអាហារ។ ឆ្លងកាត់តាមការស្រាវជ្រាវ អាជ្ញាធរបានសន្និដ្ឋានជាបឋមថា អគ្គីភ័យនេះ កើតចេញពីតូបលក់បបរសាមចូក។ តូបលក់បបរសាមចូកដែលប្រហែលជាពុំបានពន្លត់រងើកភ្លើងចង្ក្រានឲ្យបានត្រឹមត្រូវ មុននឹងបិទតូប។ នេះបើតាមលោកឡុង ឌីម៉ង់ អ្នកនាំពាក្យសាលារាជធានីភ្នំពេញ ដែលបានថ្លែងប្រាប់វិទ្យុបារាំងអន្ដរជាតិនៅព្រឹកថ្ងៃចន្ទ ទី០៩កុម្ភៈនេះ។
អ្នកនាំពាក្យរូបនេះបានឲ្យដឹងបន្ថែមថា បន្ទាប់ពីឆាបឆេះអស់ជាង១ម៉ោង អគ្គីភ័យត្រូវបានពន្លត់ទាំងស្រុងនៅម៉ោងប្រមាណ១១និង៣០នាទីយប់ ដោយប្រើប្រាស់បំពង់ពន្លត់អគ្គីភ័យអស់៧១បំពង់ និងទឹកអស់១៨ឡាន។ ក្រោយពីពន្លត់អគ្គីភ័យរួច កងកម្លាំង ក៏ដូចជាអាជ្ញាធរមានសមត្ថកិច្ច បានបោសជូត សម្អាតកន្លែងកើតហេតុ ព្រមទាំងរៀបចំរបៀបរៀបរយឲ្យបានល្អប្រសើរឡើងវិញ។ ហើយនៅព្រឹកថ្ងៃចន្ទនេះ ផ្សារអូរឬស្សីបានបើកដំណើរការជាធម្មតាវិញហើយ។
យ៉ាងណាក៏ដោយ អាជ្ញាធរនៅមិនទាន់មានរបាយការណ៍លម្អិត អំពីការខូចខាតថាមានទំហំប៉ុណ្ណានៅឡើយទេ។ ប៉ុន្តែរបាយការណ៍បឋមឲ្យដឹងថា អគ្គីភ័យកាលពីយប់ថ្ងៃអាទិត្យ បានធ្វើឲ្យខូចខាតតូបលក់ដូររបស់អាជីវករ សរុបទាំងអស់ចំនួន១០តូប។ ដោយក្នុងនោះ តូបលក់កាហ្វេគុយទាវចំនួន៣តូប តូបលក់បាយ១តូប តូបលក់នំបញ្ចុក១តូប តូបលក់ចាប់ហួយ២តូប តូបលក់នំស្បោង១តូប និងតូបលក់គ្រឿងជ័រក្មេងលេងចំនួន២តូប។
បើតាមលោកឡុង ឌីម៉ង់ ដោយសារតែការខូចខាតពីអគ្គីភ័យនៅផ្សារអូរឬស្សីនេះ មិនមានលក្ខណៈធំដូចការខូចខាតពីអគ្គីភ័យនៅផ្សារចាស់ ទើបការដោះស្រាយនានាត្រូវធ្លាក់ទៅក្នុងបន្ទុករបស់អាជ្ញាធរខណ្ឌ៧មករា។ ដោយនៅព្រឹកថ្ងៃចន្ទនេះ អាជីវករដែលជាម្ចាស់តូបខូចខាត កំពុងតែធ្វើការជាមួយអាជ្ញាធរខណ្ឌ ដើម្បីបូកសរុបការខូចខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ