សាលាឧទ្ធរណ៍ សម្រេចមិនដោះលែងសកម្មជនម្នាក់ របស់គណបក្សសង្គ្រោះជាតិ
ទីបំផុតទៅ នៅព្រឹកថ្ងៃទី១២វិច្ឆិកានេះ ចៅក្រមតុលាការសាលាឧទ្ធរណ៍ បានសម្រេច មិនអនុញ្ញាតឲ្យលោក ស៊ុំ ពុទ្ធី សមាជិកក្រុមប្រឹក្សាខណ្ឌច្បារអំពៅ របស់គណបក្សសង្គ្រោះជាតិ នៅក្រៅឃុំឡើយ។ លោក ស៊ុំ ពុទ្ធី ជាប់ចោទ ក្នុងរឿងចូលរួមធ្វើបាតុកម្ម បង្កជាអំពើហិង្សា នៅស្ពាននាគ ក្បែរទីលានប្រជាធិបតេយ្យ កាលពីព្រឹកថ្ងៃទី១៥ ខែកក្កដា ឆ្នាំ២០១៤។ ចំណែកមេធាវីការពារក្តីលោក មាជ សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយរបស់គណបក្សសង្គ្រោះជាតិ កំពុងរង់ចាំចៅក្រម តុលាការសាលាដំបូង រាជធានីភ្នំពេញ សេចក្តីសម្រេចលើពាក្យស្នើសុំនៅក្រៅឃុំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សកម្មជនគណបក្សសង្គ្រោះជាតិ លោក ស៊ុំ ពុទ្ធី សមាជិកក្រុមប្រឹក្សាខណ្ឌច្បារអំពៅ ដែលត្រូវបានប៉ូលិសចាប់ខ្លួន កាលពីខែតុលា គឺនៅព្រឹកថ្ងៃទី១២វិច្ឆិកានេះ ចៅក្រមតុលាការសាលាឧទ្ធរណ៍ បានបដិសេធ មិនដោះលែងឲ្យនៅក្រៅពន្ធនាគារជាបណ្តោះអាសន្ននោះទេ។
ចៅក្រម បានចោទប្រកាន់សកម្មជនគណបក្សសង្គ្រោះជាតិ ក្នុងរឿងបាតុកម្ម រំដោះទីលានប្រជាធិបតេយ្យ ថ្ងៃ១៥កក្កដា ៣ បទល្មើស រួមមាន៖ ទី១-បទផ្តើមគំនិតដោយមានស្ថានទម្ងន់ទោសហិង្សាដោយចេតនា តាមមាត្រា ២៨ និងមាត្រា ២១៨ ទី២-បទញុះញង់ឲ្យប្រព្រឹត្តបទឧក្រិដ្ឋ តាមមាត្រា ៤៩៥ និងទី៣-ដឹកនាំចលនាកុបកម្ម មាត្រា ៤៥៩ នៃក្រមព្រហ្មទណ្ឌ។ មាត្រា ៤៥៩ កំណត់ទោសពន្ធនាគារ ដល់ទៅ ៣០ ឆ្នាំ។
គិតដល់ថ្ងៃ ១២វិច្ឆិកានេះ មានមន្ត្រី និងសកម្មជនគណបក្សសង្គ្រោះជាតិ ១៤ នាក់ ត្រូវបានចាប់ខ្លួន ពាក់ព័ន្ធនឹងអំពើហិង្សា នៅទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។ ក្នុងនោះ មានមន្ត្រី និងសកម្មជនគណបក្សសង្គ្រោះជាតិចំនួន ៤ នាក់ ត្រូវបានឃុំខ្លួន ដោយអាជ្ញាធរ រួមមាន៖ លោក អ៊ុក សំណាង លោក ស៊ុំ ពុទ្ធី និងលោក មាជ សុវណ្ណារ៉ា និងលោក កែ ឃីម។
លោក មាជ សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយរបស់គណបក្សសង្គ្រោះជាតិ ព្រមទាំងលោក កែ ឃីម សកម្មជនគណបក្សសង្គ្រោះជាតិ ត្រូវបានចាប់ខ្លួន កាលពីរសៀលថ្ងៃទី១១វិច្ឆិកា ពាក់ព័ន្ធនឹងសំនុំរឿងបាតុកម្ម រំដោះទីលានប្រជាធិបតេយ្យ កាលពីថ្ងៃទី១៥ កក្កដា ឆ្នាំ២០១៤។
លោក ចាន់ ចេង មេធាវីការពារលោកមាជ សុណ្ណារ៉ា បានឲ្យដឹងនៅព្រឹកថ្ងៃទី១២វិច្ឆិកាថា ក្រោយការចាប់ខ្លួនលោក មាជសុវណ្ណារ៉ា កាលពីថ្ងៃទី១១វិច្ឆិកា លោកមេធាវី បានដាក់ពាក្យស្នើសុំឲ្យកូនក្តីលោក បាននៅក្រៅឃុំជាបណ្តោះអាសន្ន។ ប៉ុន្តែចៅក្រម មិនទាន់ឆ្លើយតបបែបណានៅឡើយទេ។ ចៅក្រម មានពេលយ៉ាងយូរ ៥ថ្ងៃ ដើម្បីឆ្លើយតបនឹងការស្នើសុំនៅក្រៅឃុំ។ លោកមេធាវី ក៏បានប្រកាសថា ត្រៀមដាក់ពាក្យស្នើសុំ នៅក្រៅឃុំ ទៅកាន់តុលាការសាលាឧទ្ធរណ៍ បើសិនជាចៅក្រមសាលាដំបូង រាជធានីភ្នំពេញ មិនអនុញ្ញាតឲ្យលោក មាជ សុវណ្ណារ៉ា នៅក្រៅឃុំទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ