សមូហកម្មអក្សរសិល្ប៍នូ ហាច រៀបចំវេទិកាពិភាក្សា និងប្រគល់រង្វាន់ដល់ជ័យលាភីស្នាដៃអក្សរសិល្ប៍
សមូហកម្មអក្សរសិល្ប៍នូ ហាច នៅរសៀលថ្ងៃសៅរ៍ទី១២កក្កដានេះ នឹងរៀបចំវេទិកាពិភាក្សាក្រោមប្រធានបទ «អនាគតអក្សរសិល្ប៍ខ្មែរ» នៅសាលអង្គរគីហ្សូណា នៃមជ្ឈមណ្ឌលសហប្រតិបត្តិការកម្ពុជាជប៉ុន ហៅកាត់ថា CJCC។ ជារៀងរាល់ឆ្នាំ សមូហកម្មអក្សរសិល្ប៍នូហាច តែងតែរៀបចំវេទិកានេះ ដើម្បីឲ្យអ្នកនិពន្ធ និងអ្នកស្រឡាញ់ការតែងនិពន្ធ បានជួបជុំ ផ្លាស់ប្ដូរយោបល់គ្នា និងជាពិសេស ដើម្បីប្រគល់រង្វាន់ដល់ជ័យលាភីស្នាដៃអក្សរសិល្ប៍នូហាច ផងដែរ។
ចុះផ្សាយនៅថ្ងៃ៖
ស្តាប់ - ០១:៣៣
វេទិកាពិភាក្សាអំពីអក្សរសិល្ប៍ ត្រូវបានសមូហកម្មអក្សរសិល្ប៍នូ ហាច រៀបចំឡើងជារៀងរាល់ឆ្នាំ ហើយនៅឆ្នាំនេះ វេទិកាពិភាក្សាត្រូវរៀបចំឡើងក្រោមប្រធានបទ «អនាគតអក្សរសិល្ប៍ខ្មែរ»។ អ្នកនិពន្ធល្បីៗដូចជា លោកគឹម ចាន់ណា លោកជិន មាស លោកស្រីអ៊ុំ សុផានី លោកឃឹម ច័ន្ទសុអហំ និងលោកសុខ ចាន់ផលជាដើម នឹងចូលរួមចែករំលែកបទពិសោធ ផ្លាស់ប្ដូរយោបល់ នៅក្នុងវេទិកាពិភាក្សានោះ។
ក្រៅពីវេទិកាពិភាក្សានេះ អង្គពិធីក៏ចូលរួមអបអរសាទរដល់កវីអ្នកនិពន្ធចំនួន៦រូប ដែលជាជ័យលាភីអក្សរសិល្ប៍នូ ហាច ផងដែរ។ កញ្ញាញឹម សុខនា ជំនួយការប្រធានគម្រោង នៃសមូហកម្មអក្សរសិល្ប៍នូ ហាច ថ្លែងប្រាប់វិទ្យុបារាំងអន្ដរជាតិ នៅថ្ងៃសៅរ៍ ទី១២កក្កដានេះថា ការប្រកួតស្នាដៃអក្សរសិល្ប៍ឆ្នាំនេះ ចែកចេញជា៣ផ្នែក គឺរឿងខ្លី កំណាព្យ និងប្រលោមលោកខ្នាតខ្លី។
បើតាមកញ្ញាញឹម សុខនា គណៈកម្មការដាក់ពិន្ទុ រកឃើញតែជ័យលាភីផ្នែកស្នាដៃរឿងខ្លី និងស្នាដៃកំណាព្យប៉ុណ្ណោះ។ គ្មានទេ ជ័យលាភីផ្នែកប្រលោមលោកខ្លី។ នោះក៏ដោយសារតែ ស្នាដៃប្រលោមលោកខ្នាតខ្លីដែលដាក់ប្រកួតមានចំនួនតិច និងគ្មានលក្ខណៈសម្បត្តិល្អគ្រប់គ្រាន់។
នេះជាឱកាសដែលអ្នកចូលរួម ដែលភាគច្រើនជាអ្នកស្រឡាញ់ការតែងនិពន្ធ បានជួបជជែកដោយផ្ទាល់ជាមួយអ្នកនិពន្ធ ព្រមទាំងមានឱកាសទិញសៀវភៅពីគ្រឹះស្ថានបោះពុម្ពសៀវភៅ និងអ្នកនិពន្ធ នៅក្នុងតម្លៃពិសេសផងដែរ។ កម្មវិធីនេះ ប្រព្រឹត្តទៅនៅសាលអង្គរគីហ្សូណា នៃមជ្ឈមណ្ឌលសហប្រតិបត្តិការកម្ពុជា ជប៉ុន ហៅកាត់ថា CJCC ចាប់ពីម៉ោង១២និង៣០នាទីរសៀល ដល់ម៉ោង៥ល្ងាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ