ក្រសួងពាណិជ្ជកម្មអញ្ជើញពាណិជ្ជករ និងអាជីវករ ឱ្យចូលរួមធ្វើពិព័រណ៍ផលិតផល
ពិព័រណ៍ផលិតផលនាំចេញ នាំចូល និងពិព័រណ៍ខេត្តមួយ ផលិតផលមួយ លើកទី៩ នឹងត្រូវរៀបចំធ្វើ ពីថ្ងៃទី១៥ ដល់ថ្ងៃទី១៨ ខែធ្នូ ឆ្នាំ២០១។ ក្រសួងពាណិជ្ជកម្មបានជូនដំណឹងអំពីគម្រោងនេះ ឱ្យសាធារណជន ពាណិជ្ជករ និងអាជីវករ បានជ្រាប គាំទ្រ និងចូលរួមយ៉ាងសកម្ម។ ព្រឹត្តិការណ៍ ដែលគ្រោងធ្វើនៅកោះពេជ្រនោះ នឹងពោរពេញដោយកម្មវិធីសំខាន់ៗជាច្រើនទៀតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ថ្វីត្បិតតែនៅសល់ពេលច្រើនដល់ទៅ៦ខែទៀតក្តី ក៏ក្រសួងពាណិជ្ជកម្មកម្ពុជា បានរួសរាន់ផ្សព្វផ្សាយអំពីការធ្វើពិព័រណ៍ផលិតផលនាំចេញ នាំចូល និងពិព័រណ៍ខេត្តមួយ ផលិតផលមួយ លើកទី៩ ចាប់តាំងពីឥឡូវនេះដែរ។ ក្នុងរយៈពេលប៉ុណ្ណេះ ពាណិជ្ជករ ឬអាជីវករទាំងឡាយណា ដែលចាប់អារម្មណ៍នឹងការចូលរួមក្នុងព្រឹត្តិការណ៍ ពីថ្ងៃទី១៥ ដល់ថ្ងៃទី១៨ ខែធ្នូ ឆ្នាំ២០១៤ អាចមានលទ្ធភាពរៀបចំបង្ហាញផលិតផលរបស់ខ្លួនបានហើយ។
មិនត្រឹមតែសម្រាប់ការបង្ហាញផលិតផលរបស់ខ្លួនចំពោះមហាជនប៉ុណ្ណោះទេ បើតាមសេចក្តីជូនដំណឹងរបស់ក្រសួងពាណិជ្ជកម្ម ឱកាសនោះក៏អំណោយផលដល់ការជជែកពិភាក្សាអំពីបរិយាកាសពាណិជ្ជកម្ម និងការអភិវឌ្ឍគម្រោងពណិជ្ជកម្មផងដែរ។ នេះក៏ព្រោះតែកម្មវិធីសំខាន់ៗជាច្រើនត្រូវបានត្រៀមសម្រាប់ពេលធ្វើពិព័រណ៍ ក្នុងនោះមានជាអាទិ៍វេទិកាស្តីពីវិនិយោគ និងធុរកិច្ច សិក្ខាសាលាស្តីពីការជម្រុញសកម្មភាពពាណិជ្ជកម្ម ជំនួបពាណិជ្ជកម្ម និងកម្មវិធីចុះហត្ថលេខាលើកិច្ចសន្យាពាណិជ្ជកម្ម និងវិនិយោគ។
ក្រសួងពាណិជ្ជកម្ម បានអំពាវនាវឱ្យពាណិជ្ជករ និងអាជីវករទាំងឡាយ គាំទ្រ និង«ចូលរួមយ៉ាងសកម្ម» ក្នុងពិព័រណ៍ផលិតផលនាំចេញ នាំចូល និងពិព័រណ៍ខេត្តមួយ ផលិតផលមួយ «កុំបីខាន»។ សេចក្តីជូនដំណឹង ចុះថ្ងៃទី០១ ខែកក្កដា បញ្ជាក់ថា៖ «ការរៀបចំព្រឹត្តិការណ៍នេះគឺក្នុងគោលបំណងជម្រុញសកម្មភាពពាណិជ្ជកម្ម និងវិនិយោគនៅកម្ពុជា ជាពិសេសបង្កើនសកម្មភាពនាំចេញ(...) ជម្រុញឱ្យបរិយាកាសពាណិជ្ជកម្មក្នុងស្រុកមានសន្ទុះឡើង និងបង្កើតការតភ្ជាប់ពាណិជ្ជកម្មក្នុងស្រុករវាងរាជធានី ខេត្ត ទូទាំងប្រទេសកម្ពុជា និងរវាងកម្ពុជា និងពាណិជ្ជករបរទេស»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ