បណ្តាញព្រះសង្ឃ ផ្តើមយុទ្ធនាការ ដើម្បីរក្សាដីពុទ្ធសាសនបណ្ឌិត្យ
បណ្តាញព្រះសង្ឃ ដែលមានឈ្មោះថា “បណ្តាញព្រះសង្ឃឯករាជ្យ ដើម្បីយុត្តិធម៌សង្គម” បានប្រកាស ចាប់ផ្តើមយុទ្ធនាការ ជួបជុំ ដាក់ញត្តិតវ៉ា ទៅកាន់ក្រសួងធម្មការ និងសាសនា ព្រមទាំងមន្ទីរធម្មការ និងសាសនា តាមបណ្តាខេត្តនានា។ គោលបំណង គឺព្រះសង្ឃ ទាមទារ មិនឲ្យក្រុមហ៊ុនណាហ្គាវើល យកដីមួយផ្នែក របស់ពុទ្ធសាសនបណ្ឌិត្យ នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ក្រុមបណ្តាញព្រះសង្ឃ បានជួបជុំ ប្រកាសក្នុងសន្និសីទកាសែត នៅព្រឹកថ្ងៃទី១៨មិថុនានេះ អំពីការរំលោភបំពានដីវិទ្យាស្ថានពុទ្ធសាសនបណ្ឌិត្យ ដែលស្ថិតនៅជាប់រដ្ឋសភា។ ដីទំហំ ៣០ ម៉ែត្រ គុណនឹង ១០០ ម៉ែត្រ ត្រូវបានក្រុមហ៊ុន ណាហ្គាវើល ហ៊ុំព័ទ្ធរបង ក្រោមកិច្ចសន្យាជួល។
ទីតាំងពុទ្ធសាសនបណ្ឌិត្យ ក៏ត្រូវក្រុមហ៊ុនណាហ្គាវើល វាយកម្ទេចរបង និងក្លោងទ្វារ ផ្នែកខាងជើង កាលពីខែឧសភា។ ក្លោងទ្វារ និងរបងពុទ្ធសាសនបណ្ឌិត្យនោះ ទើសទាល់ដល់ដំណើរការសាងសង់ផ្លូវក្រោមដី របស់ក្រុមហ៊ុនបនល្បែង ណាហ្គាវើល។
ព្រះតេជព្រះគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម បានក្រើនរម្លឹកដល់ក្រសួងធម្មការ និងសាសនា ឲ្យចាត់វិធានការ ដកហូត យកដីពុទ្ធសាសនាបណ្ឌិត្យ មកពីក្រុមហ៊ុន ណាហ្គាវើល មកវិញ។ ក្នុងការទាមទាររក្សាដីទីកន្លែងសក្ការៈ ដែលបង្កើតឡើងតាំងពីឆ្នាំ១៩២១ ហើយបានវិវឌ្ឍជាវិទ្យាស្ថានពុទ្ធសាសនបណ្ឌិត្យ នៅទីតាំងសព្វថ្ងៃ កាលពីឆ្នាំ១៩៩៨ ត្រូវបានព្រះតេជព្រះគុណ ប៊ុត ប៊ុនតិញ និងក្រុមបណ្តាញព្រះសង្ឃ គ្រោងនឹងជួបជុំ ដាក់ញត្តិនៅមន្ទីរធម្មការ និងសាសនា តាមបណ្តាខេត្តមួយចំនួន រួមមាន នៅខេត្តបាត់ដំបង សៀមរាប កំពង់ចាម និងខេត្តកំពង់ឆ្នាំង។
ក្រៅពីនេះ ព្រះសង្ឃ ក៏នឹងធ្វើយុទ្ធការ ស្វែងរកការគាំទ្រតាមអនឡាញ រួមទាំងទំនាក់ទំនងទៅកាន់សាសនាគ្រឹះ និងសាសនាឥស្លាម នៅទូទាំងពិភពលោក ដោយយកលំនាំតាមការតស៊ូមតិ ដូចនៅប្រទេសស្វីស ដើម្បីរួមគ្នា ការពារដីរបស់ពុទ្ធសាសនបណ្ឌិត្យ។
ក្នុងលិខិតចុះថ្ងៃទី៧ ខែឧសភា ឆ្នាំ២០១៤ ផ្ញើទៅកាន់ក្រុមហ៊ុនណាហ្គាវើល លោក មិន ឃិន រដ្ឋមន្ត្រីក្រសួងធម្មការ និងសាសនា បានអនុញ្ញាតឲ្យក្រុមហ៊ុន ណាហ្គា វើល វាយរបង និងខ្លោងទ្វារពុទ្ធសាសនបណ្ឌិត្យ ដើម្បីបង្កលក្ខណៈឲ្យដំណើរការសាងសង់ផ្លូវក្រោមដី ប្រកបដោយសុវត្ថិភាព។ តែក្រុមហ៊ុនណាហ្គាវើល ត្រូវសាងសង់របង និងក្លោងទ្វារថ្មីឡើងវិញ តាមរចនាបថដើម ក្រោយពីបញ្ចប់ការដ្ឋានរបស់ខ្លួន ដែលនៅចំពីមុខបរិវេណពុទ្ធសាសនបណ្ឌិត្យ។
ប៉ុន្តែកាលពីរសៀលថ្ងៃទី២៨ ខែឧសភា ឆ្នាំ២០១៤ បណ្ដាញព្រះសង្ឃឯករាជ្យដើម្បីយុត្តិធម៌សង្គម បានជួបជុំ ដាក់ញត្តិជូនលោក មិន ឃិន រដ្ឋមន្ត្រីក្រសួងធម្មការ និងសាសនា ដើម្បីទាមទារឲ្យបញ្ឈប់ការរុះរើរបង និងខ្លោងទ្វារពុទ្ធសាសនបណ្ឌិត្យ និងបញ្ឈប់ការជួលដីពុទ្ធសាសនបណ្ឌិត្យ ឲ្យក្រុមហ៊ុនណាហ្គាវើល។
ជុំវិញការតវ៉ានោះ លោក មិន ឃិន រដ្ឋមន្ត្រី និងលោក សេង សុមុនី អ្នកនាំពាក្យ ក្រសួងធម្មការ និងសាសនា មិនលើកទូរស័ព្ទទេ នៅព្រឹកថ្ងៃទី១៨មិថុនា។ ចំណែកលោក ផន ថាវី ប្រធានមន្ទីរធម្មការ និងសាសនា រាជធានីភ្នំពេញ ឲ្យដឹងថា មន្ទីរ មិនទាន់ទទួលញត្តិតវ៉ាពីក្រុមព្រះសង្ឃទេ ហើយម្យ៉ាងទៀត ពុទ្ធសាសនបណ្ឌិត្យ ស្ថិតក្រោមការគ្រប់គ្រងរបស់ក្រសួង ដែលផុតពីសមត្ថកិច្ចរបស់មន្ទីរធម្មការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ