កោះត្រល់បន្តកក្រើកក្នុងចំណោមអ្នកនយោបាយ
ការលើកឡើងពីបញ្ហាបាត់កោះត្រល់ បានរាលដាលដល់ការឆ្លងឆ្លើយគ្នាក្នុងចំណោមអ្នកនយោបាយនៃគណបក្សប្រឆាំងគ្នាទាំងពីរ។ប្រធានបទកោះត្រល់ដែលវៀតណាមដាក់ឈ្មោះ កោះភូគុក ត្រូវបានផ្សព្វផ្សាយនៅលើទំព័រហ្វេសប៊ុករបស់មេដឹកនាំបក្សប្រឆាំងជាមួយនឹងសុទិដ្ឋិនិយមថា កម្ពុជាអាចនឹងយកវិញបានតាមផ្លូវច្បាប់។ ក៏ប៉ុន្តែសមាជិកសភាគណបក្សកាន់អំណាច បានស្នើឲ្យមានការវិនិច្ឆ័យពីការទទួលខុសត្រូវនិងការបាត់បង់កោះត្រល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
បញ្ហាកោះត្រល់ហាក់ដូចជាចាប់ផ្តើមកក្រើកឡើងវិញរយៈពេលប៉ុន្មានសប្តាហ៍ចុងក្រោយនេះ ហើយ ប្រធានបទនេះត្រូវបានឆ្លើយឆ្លងគ្នារវាងអ្នកនយោបាយផងដែរ។ នៅក្នុងលិខិតមួយចេញផ្សាយកាលពីថ្ងៃទី៩មិថុនា ម្សិលមិញ លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានរដ្ឋសភា បានសរសរថា លោកបានស្នើឲ្យប្រព័ន្ធផ្សព្វផ្សាយព័ត៌មានជាតិ និងអន្តរជាតិ ព្រមទាំងខ្មែរកម្ពុជាក្រោមធ្វើការ វិនិច្ឆ័យថា តើការបាត់បង់កោះត្រល់ជាកំហុសរបស់គណបក្សប្រជាជនកម្ពុជា ឬកំហុសរបស់លោកនាយករដ្ឋមន្ត្រី ហ៊ុន សែន ឬជាកំហុសរបស់យើងទាំងអស់គ្នាដែលកើតក្រោយឆ្នាំ១៩៤៩ ឬយ៉ាងណា។
អមដោយឯកសារពីមជ្ឈមណ្ឌលឯកសារកម្ពុជាក្រោមចំណងជើងថា «កោះត្រល់ក្នុងសម័យខ្មែរក្រហម» លោក ឈាង វុន បានបន្តថា លោកស្នើឲ្យបងប្អូនខ្មែរនិងអ្នកនយោបាយមួយចំនួនដែលគេយល់ថា អាចទៅដណ្តើមកោះត្រល់មកវិញបាននោះ សុំពិចារណាទៅនឹងអ្វីដែលពួកប៉ុលពតបានអនុវត្តនៅពេលដែលពួកគេកាន់អំណាចនៅឆ្នាំ១៩៧៥ដល់ឆ្នាំ១៩៧៨។ អត្ថបទដែលមានពីរទំព័របង្ហាញពីភាពបរាជ័យរបស់ទាហានខ្មែរក្រហមដែលបានប៉ុនប៉ងដណ្តើមកោះត្រល់របស់ខ្មែរ ពីប្រទេសវៀតណាមមកវិញ។
សមាជិកសភាជាន់ខ្ពស់គណបក្សប្រជាជនរូបនេះ បញ្ជាក់ដោយអក្សរដិតច្បាស់ៗថា«បាត់បង់
ទឹកដីនៃមាតុភូមិ គឺយើងទាំងអស់គ្នាមានការឈឺចាប់ណាស់ តែជម្រុញឲ្យប្រជាពលរដ្ឋរងទុក្ខវេទនាខ្លោចផ្សារថែមទៀត គឺចាំបាច់ត្រូវចៀសវាង។
ក៏ប៉ុន្តែ នៅក្នុងទំព័រហ្វេសប៊ុករបស់លោក កឹម សុខា មេដឹកនាំគណបក្សប្រឆាំងរូបនេះ សរសេរថា កោះត្រល់បានបាត់ទៅហើយដោយសារការដឹកនាំរបស់លោកហ៊ុន សែន ហើយគ្មានថ្នាក់ដឹកនាំជាតិណាម្នាក់បានប្រគល់កោះត្រល់ទៅឲ្យយួនដូចការអះអាងរបស់លោកហ៊ុនសែនឡើយ។ លោក កឹម សុខា ជឿថាបញ្ហាកោះត្រល់ បើយើងពិនិត្យផ្លូវច្បាប់មានអ្នកឯកទេសច្បាប់ យើងអាចនឹងប្ដឹងទាមទារយកមកវិញបាន។
ជាមួយគ្នានោះ លោក កឹម សុខា ក៏បានបង្ហាញរូបភាពដែលជាសៀវភៅសិក្សាមុខវិជ្ជា«ភូមិវិទ្យា» ដែលបោះពុម្ពដោយគ្រឹះស្ថានបោះពុម្ពផ្សាយក្រសួងអប់រំឆ្នាំ ១៩៨៥ ត្រូវគេសរសេរឲ្យសិស្សរៀនតាមថា កោះត្រល់គឺជាកោះដែលស្ថិតនៅឯនាយ ស្ទើរកោះវាលរេញ។ហើយការបង្ហោះតាមហ្វេសប៊ុកនេះក៏មានអ្នកចុច Like ជិត៣ពាន់នាក់ និង ចុច Share ជាង៧០០នាក់។
សូមបញ្ជាក់ថា ចលនាទាមទារកោះត្រល់ ត្រូវគេកត់សម្គាល់ថា ជាប្រធានបទដ៏មុតស្រួចនៅពេលដែលមានការឃោសនារកសម្លេងឆ្នោតម្តងៗ របស់គណបក្សប្រឆាំង ជាពិសេសអំឡុងពេលដែលកម្ពុជាជាប់គាំងនយោបាយ ក៏ប៉ុន្តែ រដ្ឋាភិបាលយល់ថានោះគឺជារឿងដែលមិនអាចទៅរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ