អត្តសញ្ញាណប័ណ្ណខ្មែរ ផុតកំណត់អាចប្រើបានរហូតដល់ឆ្នាំ ២០១៨
លោកនាយករដ្ឋមន្ត្រីហ៊ុន សែន បានចេញអនុក្រឹត្យថ្មីមួយ ដោយសម្រេចថា អត្តសញ្ញាណប័ណ្ណសញ្ជាតិខ្មែរដែលផុតកំណត់ ត្រូវបន្តសុពលភាព រហូតដល់ថ្ងៃទី៣១ ខែធ្នូឆ្នាំ២០១។ ការបន្តសុពលភាពនេះ ត្រូវបានរដ្ឋាភិបាលពន្យល់ថា ដើម្បីជួយសម្រួលដល់ដំណើរនានា របស់ប្រជាពលរដ្ឋក្នុងការប្រើប្រាស់អត្តសញ្ញាណប័ណ្ណ ប៉ុន្តែសង្គមស៊ីវិលបានសម្តែងមតិផ្សេងៗគ្នាចំពោះការពន្យាពេលផ្តល់សុពលភាពនេះ។
ចុះផ្សាយនៅថ្ងៃ៖
ស្តាប់ - ០២:២៦
អនុក្រឹត្យ ស្តីពី ការកែសម្រួលមាត្រា៤ នៃអនុក្រឹត្យលេខ ១៣២ អនក្រ.បក ចុះថ្ងៃទី ២៣ ខែមិថុនា ឆ្នាំ ២០១១ ស្តីពីការផ្តល់អត្តសញ្ញាញប័ណ្ណសញ្ជាតិខ្មែរ ទុតិយតា ត្រូវបានសម្រេចនឹង ចុះហត្ថលេខាដោយលោក ហ៊ុន សែន នៅថ្ងៃទី ០៤ មិថុនាឆ្នាំ ២០១៤នេះ។
លោក ចាន់ គីមសេង អគ្គនាយករង នៃ អគ្គនាយករដ្ឋានអត្តសញ្ញាណកម្ម ពន្យល់ថា ការពន្យាពេលផ្តល់សុពលភាពដល់ អត្តសញ្ញាញប័ណ្ណដែលផុតកំណង់រហូតទៅដល់ឆ្នាំ ២០១៨ នោះដោយសារតែ បច្ចុប្បន្នអគ្គនាយកដ្ឋានផ្តល់អតិភាពដល់អ្នកដែលមិនទាន់មានអត្តសញ្ញាណប័ណ្ណសោះ ឬក៏អ្នកដែលទើបតែគ្រប់អាយុធ្វើអត្តសញ្ញាណប័ណ្ណ។ ប៉ុន្តែលោកក៏បានបញ្ជាក់ថា ប្រសិនបើអ្នកប្រើប្រាស់អត្តសញ្ញាណប័ណ្ណហួសកំណត់ ហើយចង់ធ្វើថ្មីនោះ ក៏អាចធ្វើបានដែរ មុនឆ្នាំ២០១៨នោះ។
លោកចាន់ គីមសេងបានបន្តថា ការបន្តផ្តល់សុពលភាពនេះ ក៏ដើម្បីផ្តល់ភាពងាយស្រួលដល់ប្រជាពលរដ្ឋ នៅក្នុងការប្រើប្រាស់ឯកសារច្បាប់នានា ដែលទាក់ទងនឹងអត្តសញ្ញាញប័ណ្ណរបស់ពួកគាត់ដូចជា កិច្ចសន្យាទិញលក់ ប័ណ្ឌកម្មសិទ្ធដីធ្លី និងការប្រើប្រាស់នៅក្នុងធនាគារជាដើម។
លោក គល់ បញ្ញា នាយកប្រតិបត្តិអង្គការខុមហ្វ្រែល បានសម្តែងសាទរចំពោះការពន្យាពេលនេះ ហើយថាកត្តានេះនឹងអាចជួយសម្រួលបន្ទុកមួយដល់ប្រជាពលរដ្ឋ និងជួយលើកទឹកចិត្តឲ្យពួកគាត់អាចចូលរួមបោះឆ្នោតនៅឆ្នាំ ២០១៧ និង ២០១៨ ខាងមុខនេះ។ ហើយលោកក៏បានបញ្ជាក់ថា ប្រសិនបើរដ្ឋាភិបាលកម្ពុជា អាចផ្តល់អត្តសញ្ញណប័ណ្ណមួយ ដែលអាចប្រើប្រាស់បានមួយជីវិតជូនដល់ប្រជាជនខ្មែរបាននោះ គឺរឹតតែល្អថែមទៀត ព្រោះប្រជាពលរដ្ឋនឹងមិនចាំបាច់ចំណាយលុយ និងពេលវេលាដើម្បីធ្វើ អត្តសញ្ញាណប័ណ្ណសារជាថ្មី ដោយគ្រាន់តែមានការផ្លាស់ប្តូររូបថតនៅក្នុងរយៈពេលណាមួយទៅបានហើយ។
យ៉ាងណាក៏ដោយលោក ហង្ស ពុទ្ធា នាយកប្រតិបតិ្តអង្គការនិចហ្វិក បានលើកឡើងថា ការបន្តផ្តល់សុពលភាពដល់អត្តសញ្ញាណប័ណ្ឌដែលហូសកំណត់នេះ គឺបង្ហាញពីភាពយឺតយ៉ាងរបស់មន្ត្រីរាជការ ដែលធ្វើការងារខាងផ្តល់អត្តសញ្ញាណប័ណ្ណជូនប្រជាពលរដ្ឋ ហើយវាជាឱកាសមួយដែល មន្ត្រីថ្នាក់ក្រោមអាចឆ្លៀតប្រព្រឹត្តិអំពើពុករលួយ ប្រសិនបើ ប្រជាពលរដ្ឋមិនបានយល់ដឹងច្បាស់ពីការបន្តផ្តល់សុពលភាពនេះ។ ហើយលោក បានអំពាវនាវដល់រដ្ឋាភិបាលផ្តល់អត្តសញ្ញាញប័ណ្ណជូនដល់ប្រជាពលរដ្ឋឲ្យបានឆាប់រហ័ស ព្រោះកន្លងមកមានភាពយឺតយ៉ាងខ្លាំងនៅក្នុងការចេញអត្តសញ្ញាណប័ណ្ណនេះ។
សូមបញ្ជាក់ថា ការបន្តផ្តល់សុពលភាពដល់អត្តសញ្ញាណប័ណ្ឌផុតកំណត់នេះ ធ្លាប់បានដាក់ចេញម្តងរួចមកហើយ កាលពីមុនការបោះឆ្នោត ឆ្នាំ ២០១៣ ដែលត្រូវបន្តសុពលភាព រហូតដល់ថ្ងៃទី៣១ ខែធ្នូ ឆ្នាំ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ