ចៅក្រមតុលាការសាលាដំបូង កោះហៅគ្រួសារមានជម្លោះមកសួរផ្ទាល់មាត់ ទាក់ទងនឹងបញ្ហាដីធ្លី ជាមួយក្រុមហ៊ុន ឃុន សៀ ក្នុងតំបន់បឹងកក់
លោក លី ស្រ៊ា ខេង ដែលមានជម្លោះដីធ្លីជាមួយក្រុមហ៊ុន ឃុន សៀ ត្រូវបានចៅក្រមសាលាដំបូង កោះហៅដើម្បីចូលរួមនិតិវិធីទាញហេតុផលផ្ទាល់មាត់ នា ថ្ងៃទី ០៦ ខែមិថុនា ខាងមុខនេះ ទាក់ទងទៅនឹងបណ្តឹងដែលក្រុមហ៊ុន បានចោទប្រកាន់លោក ថាបានរស់នៅលើដីដែលជាកម្មសិទ្ធិក្រុមហ៊ុន។ មន្ត្រីមជ្ឈមណ្ឌលសិទ្ធិមនុស្សបានអោយដឹងថា មេធាវីកំពុងរៀបចំឯកសារដើម្បីស្នើពន្យាពេលសវនាទាញហេតុផលផ្ទាល់មាត់នេះ។
ចុះផ្សាយនៅថ្ងៃ៖
ស្តាប់ - ០១:៤០
ដីការកោះហៅលោក លី ស្រ៊ា ខេង ដើម្បីសាកសួរផ្ទាល់មាត់នេះត្រូវបានធ្វើឡើង ក្រោយពីក្រុមហ៊ុន ឃុន សៀ កាលពីខែមេសា ឆ្នាំ២០១៣ បាន ដាក់ពាក្យបណ្តឹងទៅតុលាការ ដោយចោទថា លោកលី ស្រ៊ាខេង និង គ្រួសារ២ទៀត បានស្នាក់នៅលើដីរបស់ក្រុមហ៊ុន ។
លោក វ៉ាន់ សូផាត មន្ត្រី សម្របសម្រួលគម្រោងកំណែទម្រង់ដីធ្លីម្នាក់របស់មជ្ឈមណ្ឌលសិទ្ធិ មនុស្សកម្ពុជា បានប្រាប់វិទ្យុបារាំងនៅថ្ងៃអង្គារ ទី 0៣ មិថុនានេះថា មេធាវីទើបបានស្នើសុំអោយតុលាការពន្យាពេលនិតីវិធីទាញហេតុផលផ្ទាល់មាត់ ដោយសារតែ ហេតុផលសុខភាព របស់លោក លី ស្រ៊ា ខេង។ តុលាការមិនទាន់ឆ្លើយតបនោះទេ ប៉ុន្តែ មន្ត្រីសិទ្ធិមនុស្សរូបនេះអោយដឹងថា បើតាមនិតិវិធី ចំពោះការកោះហៅបែបនេះ តុលាការត្រូវយល់ព្រមពន្យាពេលតាមការស្នើ។ យ៉ាងណាក៏ដោយ ការពន្យាពេលនេះមានរយៈពេលយ៉ាងច្រើនត្រឹមមួយខែប៉ុណ្ណោះ។
គ្រួសារលោក លី ស្រ៊ា ខេង ដែលកំពុងមានជម្លោះ ដីធ្លីជាមួយក្រុមហ៊ុនឃុនសៀ នៅក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ធ្លាប់បានទទួលរងការគំរាមកំហែងជាច្រើន ពីសំណាក់ក្រុមក្មេងស្ទាវ ដែលចូលមក វាយដំ និងគំរាមកំហែងគ្រប់រូបភាព ហើយលោកបានអះអាងថាក្រុមគ្រួសាររបស់លោក តែងតែស្វែងការអន្តរាគមន៍ពី អាជ្ញាធរ តែអាជ្ញាធរមិនអើពើនោះទេ។ លោក បានចោទប្រកាន់ថាទាំងអស់នេះគឺជាការយាយីពីសំណាក់ក្រុមហ៊ុន ឃុនសៀ ។
ជុំវិញបញ្ហានេះ មន្ត្រីសិទ្ធិមនុស្ស លោក វ៉ាន់ សូផាត ក៏ធ្លាប់ត្រូវបានក្រុមក្មេងស្ទាវ គំរាមកំហែងដល់អាយុជីវិតដែរ ខណៈលោកចុះទៅបំពេញបេសកកម្មឃ្លាំមើលបញ្ហាជម្លោះ ដីធ្លីតំបន់នោះ កាលពីថ្ងៃទី ០៩ ខែ ឧសភា ។លោក អោយដឹងថា មេធាវីបាននិងកំពុងតែរៀបចំឯកសារ ហើយនឹងដាក់ពាក្យប្តឹងជនទាំងនោះ ទៅតុលាការតាមផ្លូវច្បាប់នាពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ