សមាគមវៀតណាមនៅកម្ពុជាគ្រោងចេញញតិ្តអំពាវនាវឲ្យរដ្ឋាភិបាលចិន និងវៀតណាមដោះស្រាយជម្លោះដោយសន្តិវិធី
សមាគមវៀតណាមប្រចាំនៅកម្ពុជាគ្រោងនឹងចេញញតិ្តជាសាធារណៈមួយអំពាវនាវឲ្យរដ្ឋាភិបាលចិន និងវៀតណាមចរចាគ្នាដោយសន្តិវិធីដើម្បីស្វែងរកសន្តិភាពនៅសមុទ្រចិនខាងត្បូង។ នេះបើតាមការបញ្ជាក់ឲ្យដឹងរបស់លោក ស៊ឹម ជីប្រធានសមាគមសហព័ន្ធខ្មែរ វៀតណាមប្រចាំនៅកម្ពុជា។ លោក ក៏បានបញ្ជាក់ផងដែរថា សមាគមវៀតណាមនៅកម្ពុជាមិនមានគម្រោងធ្វើបាតុកម្មប្រឆាំងចិននៅលើទឹកដីកម្ពុជានោះទេ។
ចុះផ្សាយនៅថ្ងៃ៖
ស្តាប់ - ០២:៣០
បន្ទាប់ពីបញ្ចប់កិច្ចប្រជុំផ្ទៃក្នុងពេញមួយថ្ងៃនៅថ្ងៃព្រហស្បតិ៍ទី ១៥ ឧសភានេះ សមាគមសហព័ន្ធខ្មែរ វៀតណាមប្រចាំនៅកម្ពុជាបានសម្រេចគ្រោងនឹងចេញញតិអំពាវនាវឲ្យរដ្ឋាភិបាលវៀតណាម និង ចិនអង្គុយចរចគ្នាដោយសន្តិវិធីអំពីបញ្ហាជម្លោះនៅសមុទ្រចិនខាងត្បូង។
លោក ស៊ឹម ជី ប្រធានសមាគមសហព័ន្ធខ្មែរ វៀតណាមប្រចាំនៅកម្ពុជា បានបញ្ជាក់ប្រាប់វិទ្យុបារាំងអន្តរជាតិ RFI ថា សមាគមរបស់លោកនឹងចេញញតិអំពាវនាវឲ្យរដ្ឋាភិបាលមានជម្លោះទាំងពីរអង្គុយចរចារគ្នាស្វែងរកដំណោះស្រាយជម្លោះនៅសមុទ្រចិនខាងត្បូងដោយសន្តិវិធី។
លោកបន្តថា លោកគ្មានគម្រោងដឹកនាំធ្វើបាតុកម្ម ឫធ្វើសកម្មភាពណាមួយប្រឆាំងរដ្ឋាភិបាលចិននៅលើទឹកកម្ពុជានោះទេ។ ជាមួយគ្នានេះដែរ លោក ស៊ឹម ជីបានអំពាវនាវឲ្យប្រជាជនវៀតណាម និងចិនដែលកំពុងរស់នៅក្នុងប្រទេសកម្ពុជារក្សាចំណងមិត្តភាពរវាងគ្នា និងគ្នាដដែលបើទោះប្រទេសទាំងពីរមានជម្លោះនឹងគ្នាដ៏ដោយ។
កាលពីថ្ងៃពុធ ម្សិលមិញ ប្រជាជនចិននៅក្នុងប្រទេសវៀតណាមចំនួនប្រមាណជាង ៦០០ នាក់បានសម្រុកចូលមកកាន់ប្រទេសកម្ពុជាតាមច្រកព្រំដែនបាវិត ខេត្តស្វាយរៀង ដើម្បីគេចពីការធ្វើទុក្ខបុកម្នេញពីសំណាក់ប្រជាជនវៀតណាមដែលកំពុងមានកំហឹងធ្វើបាតុកម្មប្រឆាំងទង្វើរបស់ចិននៅសមុទ្រចិនខាងត្បូង។នេះបើតាមការបញ្ជាក់ឲ្យដឹងរបស់ លោក គៀត ច័ន្ធថារិទ្ធ អ្នកនាំពាក្យអគ្គស្នងការនគរបាលជាតិនៅថ្ងៃនេះ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានចាត់ទុកថា ការភៀសខ្លួនរបស់ជនជាតិចិនទាំងនោះ ជាការស្វែងរកទីកន្លែងសុវត្ថិភាពមួយរយៈពីការធ្វើបាតុកម្មហើយពួកគេនឹងត្រឡប់ទៅវិញនៅពេលមានស្ថានភាពល្អ។អ្នកនាំពាក្យរូបនេះបានបន្តថា ជនជាតិចិនទាំងនោះ ចូលមកកម្ពុជាដោយប្រើប្រាស់លិខិតឆ្លងដែនត្រឹមត្រូវ ហើយអាជ្ញាធរនឹងការពារសុវត្ថិភាពដល់ពួកគេដូចជនបរទេសដទៃទៀតផងដែរ។យ៉ាងណាក៏ដោយ លោក ខៀវ សុភ័គបានបញ្ជាក់ថា កម្ពុជាមិនអនុញ្ញាតឲ្យប្រជាជនណាធ្វើបាតុកម្ម ឫសកម្មភាពអ្វីមួយប្រឆាំងនឹងប្រទេសណាមួយនៅលើទឹកដីកម្ពុជានោះទេ។
សូមបញ្ជាក់ថា បញ្ហារវាងចិន និងវៀតណាមនៅសមុទ្រចិនខាងត្បូងកំពុងឡើងកម្តៅដល់ចំណុចកំពូល។ ដល់ចំណុចកំពូលដោយសារតែ ចិនបានបញ្ជូននាវារបស់ខ្លូនទៅខួងប្រេងនៅតំបន់មានជម្លោះក្នុងសមុទ្រចិនខាងត្បូង ហើយកាលពីថ្ងៃចន្ទដើមសប្តាហ៍នេះ នាវារបស់ចិន និង វៀតណាមបានបាញ់ទឹកដាក់គ្នាដើម្បីបញ្ឈប់សកម្មភាពខួងប្រេង។
ជាមួយគ្នានេះ ប្រជាជនវៀតណាមបានធ្វើបាតុកម្មប្រឆាំងនឹងចិនរហូតវាយកម្ទេចក្រុមហ៊ុនចិនមួយចំនួននៅក្នុងប្រទេសវៀតណាមផងដែរ។ តាមសេចក្តីរាយការណ៍ មានអ្នកស្លាប់និងរងរបួសជាច្រើននៅក្នុងសកម្មភាពធ្វើបាតុកម្មរបស់ប្រជាជនវៀតណាមនេះ។ ស្របពេលជាមួយគ្នានដែរ ចិនក៏បានប្រកាសព្រមានដល់អ្នកទេសចររបស់ខ្លួនកុំឲ្យធ្វើដំណើរទៅកាន់ប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ