ប្រជារាស្ត្រខ្មែររំលឹកពីព្រះរាជកិច្ចព្រះមហាក្សត្រ នរោត្តម សីហមុនី
នៅក្នុងឱកាសនៃបុណ្យចំរើនព្រះជន្មព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃប្រទេសកម្ពុជា គម្រប់ ៦១យាងចូល ៦២វស្សា ប្រជារាស្ត្រខ្មែរព្រមទាំងមន្ត្រីរាជការ បានអបអរសាទរ លើកសរសើរពីព្រះរាជកិច្ច និងបានឈប់សម្រាកយ៉ាងរីករាយ។ ក្នុងរយៈពេល ១០ឆ្នាំ នៃការគ្រងរាជ្យ របស់ព្រះអង្គ ព្រះមហាក្សត្រសីហមុនី បានបំពេញនូវព្រះរាជកិច្ចជាច្រើន តាមគន្លងរបស់ព្រះបិតាព្រះអង្គ គឺព្រះមហាវីរក្សត្រ នរោត្តម សីហនុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
នៅក្នុងឱកាសនៃពិធីបុណ្យចំរើនព្រះជន្មព្រះមហាក្សត្រព្រះបាទសម្តេចព្រះបរមនាថ នរោត្តមសីហមុនី គម្រប់៦១ យាងចូល ៦២វស្សា មន្ត្រីរាជការ សិស្សានុសិស្ស ក្រុមហ៊ុនសហគ្រាសឯកជននានា បានទទួលការឈប់សម្រាករយៈពេលបីថ្ងៃ គឺចាប់ពីថ្ងៃទី ១៣ ដល់ថ្ងៃទី១៥ឧសភា។ អស់រយៈពេល ១០ឆ្នាំនៃការគ្រងរាជ្យបល្ល័ង្គព្រះមហាក្សត្រ សីហមុនី តែងមានការកោតសរសេរពីប្រជារាស្ត្រថា ជាព្រះមហាក្សត្រ ដែលបានបំពេញព្រះរាជកិច្ចសម្រាប់ជាតិ និងប្រជារាស្ត្រ ប្រកបដោយភាពវិជ្ជមានច្រើនជាងការរិះគន់។
ក្រុមមន្ត្រី បណ្ឌិតបញ្ញវន្ត អ្នកប្រវត្តិសាស្ត្រ និងអ្នកវិភាគសង្គម ភាគច្រើន បានវាយតម្លៃទៅលើព្រះរាជសកម្មភាព របស់ព្រះមហាក្សត្រ ថាបានបំរើព្រះរាជកិច្ចយ៉ាងរស់រវើកជាពិសេស ផ្នែកសង្គមកិច្ច វប្បធម៌ និងសិល្បៈ ដោយយកគំរូតាមព្រះបិតាព្រះអង្គ។ ទោះជាយ៉ាងនេះក្តី ភាគច្រើននៃអ្នកផ្តល់ទស្សនៈទាំងនោះ យល់ឃើញថា ព្រះរាជសកម្មភាព របស់ព្រះមហាក្សត្របច្ចុប្បន្នពិតជា នៅមិនទាន់ អាចប្រៀបធៀបទៅនឹងព្រះរាជសកម្មភាព របស់ព្រះបិតាព្រះអង្គបាននៅឡើយ ជាពិសេសព្រះរាជសកម្មភាពទាក់ទងទៅនឹងការសម្របសម្រួលផ្នែកនយោបាយ។
ប្រសូត្រ នៅថ្ងៃទី១៥ខែឧសភា ឆ្នាំ១៩៥៣ ព្រះករុណាព្រះបរមនាថសីហមុនី ទ្រង់បានសិក្សានៅសាលាព្រះនរោត្តម និងវិទ្យាល័យដេកាតក្រុងភ្នំពេញ នៅអំឡុងឆ្នាំ១៩៥៩ ដល់ឆ្នាំ១៩៦២។
យោងតាមព្រះរាជជីវប្រវត្តិ, នៅឆ្នាំ១៩៦២ ដល់ឆ្នាំ១៩៧៥ ព្រះអង្គ បានទៅសិក្សា នៅបរទេសទៀត គឺនៅប្រទេសឆេកូស្លូវ៉ាគី នៅទីនោះ ព្រះអង្គ សិក្សាពីសិល្បៈរបាំ តន្ត្រី និងល្ខោន នៅបណ្ឌិតសភាមួយនាទីក្រុងប្រាគ ដោយទទួលបាននិទ្ទេសល្អគ្រប់មុខវិជ្ជា។ បន្ទាប់មក ព្រះករុណា ក៏បានចងក្រងនិក្ខេបបទមួយ ដោយជោគជ័យ គឺនិយាយពី ទស្សនៈទាន និងការគ្រប់គ្រងនៅសាលាវិចិត្រសិល្បៈនៅកម្ពុជា។
ជាបន្តបន្ទាប់ព្រះមហាក្សត្រសីហមុនី បានទទួលព្រះកិត្តិយសលើការងាររាជកិច្ចសំខាន់ៗដូចជា ធ្វើជាព្រះលេខាផ្ទាល់ព្រះវររាជបិតាសម្តេចឳ, សាស្ត្រចារ្យផ្នែករបាំបុរាណនៅវិទ្យាស្ថានធំៗប្រទេសបារាំង, ប្រធានសមាគមរបាំខ្មែរ នៅប្រទេសបារាំង និងជាអគ្គនាយកនិងជានាយកសិល្បៈនៃក្រុមរបាំបាលេ «DEVA»។ លើសពីនេះ ព្រះករុណាព្រះបរមនាថសីហមុនី ត្រូវបានតែងតាំង ដោយឧត្តមក្រុមប្រឹក្សាជាតិ ជាតំណាងជាន់ខ្ពស់កម្ពុជា នៅអង្គការសហប្រជាជាតិ បន្ទាប់ពីមាន កិច្ចព្រមព្រៀងសន្តិភាព ក្រុងប៉ារីស ប្រទេសបារាំង នៅឆ្នាំ១៩៩១ ខណៈនោះ ប្រទេសកម្ពុជា ត្រូវបានប្រកាសជាអន្តរជាតិថា ជាប្រទេស ដែលបានបញ្ចប់សង្គ្រាមស៊ីវិល។
បន្ទាប់ពីការបោះឆ្នោតសាកល នៅឆ្នាំ ១៩៩៣ នៅក្រោមការចាត់ចែង ដោយអង្គការសហប្រជាជាតិ ពោលគឺនៅ១៩៩៣ ដល់ឆ្នាំ២០០៣ ព្រះអង្គ ត្រូវបានតែងតាំង ជាឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំអង្គការUNESCO នៅទីក្រុងប៉ារីស ហើយនៅថ្ងៃទី១៤ ខែតុលា ឆ្នាំ២០០៤ ព្រះអង្គត្រូវ បានក្រុមប្រឹក្សារាជបល្ល័ង្ក ជ្រើសតាំងជាឯកច្ឆ័ន្ទ ជាព្រះមហាក្សត្រនៃប្រទេសកម្ពុជា ជំនួសបិតា របស់ព្រះអង្គ ដែលបានដាក់រាជ្យនៅឆ្នាំ២០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ