ខុមហ្វ្រែល៖ មានការរំលោភច្បាប់ និងជ្រែតជ្រែកនយោបាយ ក្នុងយុទ្ធនាការឃោសនាបោះឆ្នោតក្រុមប្រឹក្សាអាណត្តិទី២
អង្គការខុមហ្វ្រែល កាលពីថ្ងៃចន្ទម្សិលមិញ បានចេញរបាយការណ៍របស់ខ្លួនស្តីពីយុទ្ធនាការឃោសនាបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌថា មានការជ្រៀតជ្រែកពីនយោបាយ និងការរំលោភផ្លូវច្បាប់ពីរដ្ឋាភិបាលនៃគណបក្សកាន់អំណាច។ ខុមហ្វ្រែលបានលើកឡើងពីបញ្ហាជាច្រើនដូច ជាការហាមការជួបជុំនៅទីលានប្រជាធិបតេយ្យដោយមិនមានយោងតាមច្បាប់ជាដើម។ ប៉ុន្តែមន្ត្រីរដ្ឋាភិបាលបានឆ្លើយតបតបថា របាយការណ៍របស់ខុមហ្វ្រែលគឺគ្រាន់តែជាយោបល់មនុស្សក្រុមមួយតែប៉ុណ្ណោះ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
មានការរំលោភច្បាប់ និងការជ្រៀតជ្រែកនយោបាយក្នុងដំណើរការឃោសនាបោះឆ្នោតជ្រើសរើសក្រុមប្រឹក្សារាជធានីខេត្តក្រុងស្រុកខណ្ឌក្នុងអាណត្តិទី២នេះ។ នេះបើតាមការអះអាងរបស់អង្គការខុមហ្វ្រែល។ ក្នុងសេចក្តីប្រកាសព័ត៌មានរបស់ខ្លួន ខុមហ្វ្រែលបានលើកឡើង ពីការរិតបន្តឹងសេរីភាពពីអាជ្ញាធររដ្ឋាភិបាលដូចជាការចេញបម្រាមមិនឱ្យជួបជុំនៅទីលានប្រជាធិបតេយ្យពីសំណាក់អាជ្ញាធរក្រុងភ្នំពេញ និងក្រសួងមហាផ្ទៃ។ខុមហ្វ្រែលបានសង្កត់ធ្ងន់ថា បម្រាមទាំងនេះបានប្រាសចាកពីច្បាប់ និង គ្មានមូលដ្ឋានច្បាស់លាស់។ ដោយឡែកការប្រើប្រាស់កម្លាំងសន្តិសុខមិនផ្លូវការ ប្រព្រឹត្តអំពើហិង្សាដល់តំណាងរាស្ត្រគណបក្សប្រឆាំង អ្នកសារព័ត៌មាន និងប្រជាពលរដ្ឋជាដើមនោះ ក៏ត្រូវបានខុមហ្វ្រែលបានលើកឡើងផងដែរ។
អង្គការខុមហ្វ្រែល បានចោទប្រកាន់រដ្ឋាភិបាលដែលដឹកនាំដោយគណបក្សប្រជាជនកម្ពុជាថាបានរំលោភរដ្ឋធម្មនុញ្ញនៃព្រះរាជាណាចក្រកម្ពុជាត្រង់មាត្រា ទី៣៧ និង ៤១ និងកតិកាសញ្ញាអន្តរជាតិស្តីពីសិទ្ធពលរដ្ឋដែលកម្ពុជាជាប្រទេសហត្ថលេខី។ ជាការចោទប្រកាន់ដែលខុមហ្វ្រែលបានសង្កត់ធ្ងន់លើការបិទទីលានប្រជាធិបតេយ្យ និងការបន្តនិតិវិធីស៊ើបអង្កេតរបស់តុលាការមកសំអាង។ ក្រៅពីនេះ ខុមហ្វ្រែលបានលើកឡើងក្នុងរបាយការណ៍របស់ខ្លួនទៀតថា រដ្ឋាភិបាលនៃគណបក្សប្រជាជនកម្ពុជាតាមរយៈក្រសួងមហាផ្ទៃបានជ្រៀតជ្រែកខាងនយោបាយដោយបញ្ឈប់ក្រុមប្រឹក្សាថ្នាក់ក្រោមជាតិនៃគណបក្សចូលរួមការប្រកួតប្រជែងក្នុងការបោះឆ្នោតនេះផងដែរ។ ខុមហ្វ្រែលបានលើកយកលិខិតរបស់ក្រសួងមហាផ្ទៃ ដែលចេញកាលពីថ្ងៃទី២០ មីនា ស្តីពីការអនុវត្តន៍គោលការណ៍ និងនីតិវិធីក្នុងការឈរឈ្មោះរបស់បេក្ខជនមកសង្កត់។
យ៉ាងណាក៏ដោយ អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានឆ្លើយតបថា របាយការណ៍ខុមហ្វ្រែល គឺគ្រាន់តែជាទស្សនៈមួយជ្រុងតែប៉ុណ្ណោះ។ ហើយថា ខុមហ្វ្រែលមិនមានជាមេធាវីដែរដែលរដ្ឋាភិបាលត្រូវធ្វើតាមនោះ។
លោកអ្នកនាំពាក្យបានចោទអង្គការខុមហ្វ្រែលថា មានភាពលំអៀងទៅកាន់គណបក្សប្រឆាំង ដោយអង្គការនេះមិនដែលរិះគន់ឡើយចំណុចខ្វះខាតរបស់បក្សប្រឆាំង។ ពោលគឺចាំចាប់កំហុសតែបក្សកាន់អំណាចតែប៉ុណ្ណោះ។ សូមរំលឹកជូនថាការចេញរបាយការណ៍របស់ខុមហ្វ្រែលនេះ គឺធ្វើឡើងនៅទន្ទឹមនឹងយុទ្ធនាការឃោសនានិងការបោះឆ្នោតក្រុមប្រឹក្សារាជធានីក្នុងអាណត្តិទី២នេះ នឹងចូលមកដល់នៅសល់តែប៉ុន្មានថ្ងៃទៀតតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ