អ្នកអាជីព៖ សារព័ត៌មានប្រពៃណីកំពុងប្រឈមនឹងឥទ្ធិពលសារព័ត៌មានបែបថ្មី
អ្នកជំនាញសារព័ត៌មានជើងចាស់នៅកម្ពុជាបាន មើលឃើញថាប្រព័ន្ធផ្សព្វផ្សាយបែបប្រពៃណីដូចជាទូរទស្សន៍ វិទ្យុ និងការសែតនោះ គឺកំពុងតែប្រឈមនឹងការបាត់បង់ប្រជាប្រិយភាពរបស់ខ្លួនចំពោះអតិថិជន ប្រឈមនឹងការងើបឡើងដ៏មានសក្តានុពលនៃសារព័ត៌មានលើប្រព័ន្ធអ៊ិនធឺណែត។ ប៉ុន្តែ អ្នកជំនាញខ្លះបានលើកឡើងថា ស្ថាប័នសារព័ត៌មានប្រពៃណី នឹងនៅតែមានទីផ្សារ ព្រោះថាជាការរាយការណ៍លំអិត និងមានគុណភាពជាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
កាសែត វិទ្យុ និងទូរទស្សន៍ ដែលជាប្រព័ន្ធផ្សព្វផ្សាយបែបប្រពៃណី កំពុងប្រឈមនឹងការបាត់បង់ឥទ្ធិពល និងកម្លាំងចែកចាយដ៏មានសក្តានុពលរបស់ខ្លួន ប្រឈមការប្រកួតប្រជែង ដំណឹងតាមបណ្តាញព័ត៌មានអនឡាញ។ ជាការប្រឈមដែលសារព័ត៌មានបែបប្រពៃណី កំពុងជួបក្នុងសង្គមកម្ពុជាបច្ចុប្បន្ន និងទៅអនាគត។ នេះជាខ្លឹមសារដែលបានលើកឡើងក្នុងកិច្ចពិភាក្សាតុមូល ពេញមួយព្រឹក រវាងអ្នកជំនាញអាជីពសារព័ត៌មាន នៅថ្ងៃអង្គារនេះ។
ការប្រឈមដែលប្រធានស្ថាប័នសារព័ត៌មានទាំងអស់មើលឃើញនេះ គឺល្បឿននៃការប្រកួតប្រជែងនៃការផ្សព្វផ្សាយដំណឹង និងនិន្នាការរបស់មនុស្សនាពេលបច្ចុប្បន្ន ដែលបានជ្រើសរើសដំណឹងតាមរយៈបណ្តាញព័ត៌មានគេហទំព័រ ដែលកំពុងឡើងប្រជាប្រិយភាពខ្លាំង។
ថ្លែងទៅកាន់អ្នកកាសែតប្រមាណ៤០នាក់ មកពីគ្រប់ស្ថាប័ន នៅសណ្ឋាគារកាំបូឌីយ៉ាណា លោកប៉ែន សមិទ្ធិ ប្រធានក្លឹបអ្នកកាសែតកម្ពុជា បាននិយាយសម្តីធ្ងន់ៗថា សារព័ត៌មានបែបប្រពៃណីនឹងស្លាប់ (បាត់បង់ទីផ្សាររបស់ខ្លួន) ប្រសិនបើមិនធ្វើទំនើបកម្ម ឲ្យទៅជាសារព័ត៌មានចម្រុះដែលភាសាអង់គ្លេសហៅថា Multi Media ដែលមានទាំងអត្ថបទ សំឡេង និងរូបភាពវីដេអូនោះទេ។
បន្ថែមពីលើនេះ ប្រធានគេហទំព័រថ្មីៗ លោក គី សុខលីម បានបញ្ជាក់ថា បច្ចុប្បន្ន និន្នាការនៃអានព័ត៌មានលើអនឡាញនោះ គឺជារសជាតិជីវិតបែបថ្មីរបស់យុវជនកម្ពុជា និងជាការទំនាក់ទំនងពីរផ្លូវ រវាងប្រិយមិត្តអ្នកអាន និងស្ថាប័នសារព័ត៌មានផ្ទាល់តែម្តង។
ដោយឡែក លោកកៃ គឹមសុង និពន្ធនាយកនៃកាសែតភ្នំពេញប៉ុស្តិ៍ភាសារខ្មែរ ក៏បានទទួលស្គាល់ពីការដណ្តើមទីផ្សាររបស់បណ្តាញព័ត៌មានបែបថ្មីនោះដែរ។ ប៉ុន្តែ លោកសង្កត់ធ្ងន់ថា ស្ថាប័នកាសែតនឹងមិនដួលរលំទេ សម្រាប់និន្នាការរយៈពេលប្រមាណ១ទសវត្សរ៍ទៅមុខនេះ។ លោកបន្ថែមថា ខ្លឹមសារនៃអត្ថបទកាសែតគឺមានគុណភាពជាង និងសុក្រិតភាពជាងបណ្តាញព័ត៌មានលើប្រព័ន្ធអ៊ិនធឺណែតដែលប្រើប្រាស់រយៈពេលខ្លី សម្រាប់ផលិតអត្ថបទព័ត៌មានរបស់ខ្លួននោះ។
ភាពលឿនពេកនៃការផលិតអត្ថបទដែលប្រជែងជាមួយនឹងពេលវេលានោះ គឺប៉ះពាល់ដល់គុណភាពអត្ថបទដែលនឹងនាំដល់ការមិនទុកចិត្តពីសំណាក់អ្នកអាន។ នេះជាការបន្ថែមរបស់លោក គង់ សុឋានរិទ្ធ ប្រធានក្រុមឆ្លើយឆ្លងព័ត៌មានរបស់វិទ្យុសំឡេងសហរដ្ឋអាមេរិក។
បើទោះបីជាមានការប្រឈមខ្លាំងពីសារព័ត៌មានបែបទំនើបក៏ដោយ ក៏អ្នកជំនាញបានលើកឡើងថា សារព័ត៌មានប្រពៃណី នឹងនៅតែមានតំណែងក្នុងទីផ្សារ ល្គិកណាអត្ថបទចេញផ្សាយទាំងអស់ មានខ្លឹមសារជ្រៅជ្រះ លំអិតស៊ីជម្រៅ និងមាតិកាសម្បូរបែប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ