បារាំងផ្ដល់កម្ចីសម្បទាន១៥លានដុល្លារ ដើម្បីគាំទ្រគម្រោងផ្គត់ផ្គង់ទឹកស្អាត និងអគ្គីសនីនៅតំបន់ជនបទ
ទីភ្នាក់ងារអភិវឌ្ឍន៍បារាំង ហៅកាត់ថា AFD ផ្ដល់កម្ចីសម្បទានចំនួន១៥លានដុល្លារ ដល់ធនាគារពាណិជ្ជកម្មក្រៅប្រទេសនៃកម្ពុជា FTB ដើម្បីជួយសម្រួលដល់អង្គភាពផ្គត់ផ្គង់ទឹកស្អាត និងអគ្គីសនី នៅតាមតំបន់ជនបទ និងជាយក្រុង។ កិច្ចព្រមព្រៀងផ្ដល់កម្ចីនេះ ត្រូវបានចុះហត្ថលេខាកាលពីថ្ងៃទី២៨មេសា នៅទីស្ដីការក្រសួងសេដ្ឋកិច្ច និងហិរញ្ញវត្ថុ ក្រោមអធិបតីភាពលោកអូន ព័ន្ធមុន្នីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ និងលោកអាឡាំង ហ្វកតាំង ភារធារីស្ថានទូតបារាំងប្រចាំកម្ពុជា។
ចុះផ្សាយនៅថ្ងៃ៖
ជាមួយជំនួយថ្មីចំនួន១៥លានដុល្លារនេះ ទីភ្នាក់ងារអភិវឌ្ឍបារាំង នឹងបន្តសកម្មភាពរបស់ខ្លួន ដើម្បីលើកស្ទួយលទ្ធភាពក្នុងការទទួលបានទឹកស្អាត និងអគ្គីសនីនៅជនបទ ក៏ដូចជាជួយគាំទ្ររដ្ឋាភិបាលកម្ពុជា ឲ្យសម្រេចគោលដៅដែលខ្លួនបានកំណត់ នៅក្នុងវិស័យនេះ។
ការពង្រីកបណ្ដាញទឹក និងអគ្គីសនីនៅតាមជនបទ និងជាយក្រុង នឹងអនុញ្ញាតឲ្យប្រជាជនប្រមាណ៥ម៉ឺនគ្រួសារបន្ថែមទៀត ទទួលបានទឹកស្អាតប្រើប្រាស់។ ហើយប្រជាជនប្រមាណ៣ម៉ឺន៥ពាន់គ្រួសារ ទទួលបានអគ្គីសនី តាមរយៈអង្គភាពផ្គត់ផ្គង់ទឺក និងអគ្គីសនីជាង៥០។
សូមជម្រាបថា ទីភ្នាក់ងារអភិវឌ្ឍបារាំង ធ្វើអន្តរាគមន៍នៅកម្ពុជា ចាប់តាំងពីឆ្នាំ១៩៩៣មកម្ល៉េះ ក្នុងគោលដៅលើកកំពស់លទ្ធភាពទទួលបានឥណទាននៅតាមតំបន់ជនបទ និងលើកស្ទួយការអភិវឌ្ឍសហគ្រាសធុនតូច នៅតាមតំបន់ដាច់ស្រយាល។
ដើមឡើយ ទីភ្នាក់ងារអភិវឌ្ឍបារាំង ធ្វើអន្តរាគមន៍តាមរយៈការផ្ដល់ហិរញ្ញប្បទានដល់ស្ថាប័នមីក្រូហិរញ្ញវត្ថុ។ ប៉ុន្តែបច្ចុប្បន្ន ទីភ្នាក់ងារនេះ បានផ្ដល់ហិរញ្ញប្បទានទៅធនាគារពាណិជ្ជវិញ ដើម្បីផ្ដល់កម្ចីបន្តដល់សហគ្រាសខ្នាតកាន់តែធំជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ