គណបក្សសង្គ្រោះជាតិ ប្រារព្ធខួបរម្លឹកថ្ងៃ១៧មេសាដោយគ្មានវត្តមានលោកសមរង្ស៊ី និងលោកកឹមសុខា
គណបក្សសង្គ្រោះជាតិ នឹងប្រារព្ធខួបរម្លឹក ថ្ងៃ១៧មេសា ថ្ងៃខ្មែរក្រហម ឡើងកាន់អំណាច កាលពីឆ្នាំ១៩៧៥ នាំឲ្យមនុស្សបាត់បង់ជីវិតជិត ២ លាននាក់។ ប៉ុន្តែកម្មវិធីជួបជុំ បង្សុកូល រាប់បាត្រ ឧទ្ទិសកុសល ជូនដល់វិញ្ញាណក្ខន្ធ អ្នកដែលបាត់បង់ជីវិត ក្នុងរបបខ្មែរក្រហម នាព្រឹកថ្ងៃព្រហស្បតិ៍ ទី១៧មេសា នៅសារមន្ទីរឧក្រិដ្ឋកម្មប្រល័យពូជសាសន៍ជើងឯក ជាយរាជធានីភ្នំពេញ នឹងមិនមានវត្តមានរបស់លោកសមរង្ស៊ី និងលោកកឹមសុខា នោះទេ។ មេដឹកនាំគណបក្សប្រឆាំងទាំងពីរ ស្ថិតនៅអាមេរិក និងអឺរ៉ុប តាំងពីមុនបុណ្យចូលឆ្នាំមកម្លេះ។
ចុះផ្សាយនៅថ្ងៃ៖
ស្តាប់ - ០២:៣៩
ពិធីជួបជុំ បង្សុកូល រាប់បាត្រ ឧទ្ទិសកុសល ជូនដល់វិញ្ញាណក្ខន្ធ អ្នកដែលបាត់បង់ជីវិត ក្នុងរបបខ្មែរក្រហម នឹងប្រព្រឹត្តទៅនៅសារមន្ទីរឧក្រិដ្ឋកម្មប្រល័យពូជសាសន៍ ជើងឯក នាព្រឹកព្រលឹម ថ្ងៃព្រហស្បតិ៍ ទី១៧មេសា។ ថ្ងៃ១៧មេសា ឆ្នាំ១៩៧៥ ជាថ្ងៃខ្មែរក្រហម ឡើងកាន់អំណាច។ រយៈពេល ៣ ឆ្នាំ ៨ ខែ និង ២០ ថ្ងៃ រហូតដល់ថ្ងៃទី៧មករា ឆ្នាំ១៩៧៩ ត្រូវបានគេកត់ត្រាថា មានអ្នកបាត់បង់ជីវិតជិត ២ លាននាក់។
គណបក្សសង្គ្រោះជាតិ របស់លោកសមរង្ស៊ី តែងតែប្រារព្ធពិធីជួបជុំ តាមព្រះពុទ្ធសាសនា រម្លឹកដល់ថ្ងៃជាប្រវត្តិសាស្ត្រនោះ ជារៀងរាល់ឆ្នាំ។ ប៉ុន្តែនៅថ្ងៃ១៧មេសា ឆ្នាំនេះ លោកសមរង្ស៊ី និងលោកកឹមសុខា នឹងមិនចូលរួមពិធីបុណ្យឡើយ។ ប្រធាន និងអនុប្រធានគណបក្សសង្គ្រោះជាតិ បានចេញទៅក្រៅប្រទេស តាំងពីមុនបុណ្យចូលឆ្នាំខ្មែរ ហើយគ្រោងនឹងវិលមកកម្ពុជាវិញ នៅសប្តាហ៍ក្រោយ។
ទោះជាមិនមានមេបក្សទាំងពីរ តែគណបក្សសង្គ្រោះជាតិ នឹងរៀបចំពិធីជួបជុំ នៅជើងឯក តាមការគ្រោងទុក ក្រោមអធិបតីភាពលោក គង់ គាំ ទីប្រឹក្សានយោបាយជាន់ខ្ពស់របស់គណបក្សសង្គ្រោះជាតិ និងលោក អ៊ូ ច័ន្ទឫទ្ធិ ប្រធានស្តីទីគណបក្សសង្គ្រោះជាតិ ព្រមទាំងថ្នាក់ដឹកនាំជាច្រើនទៀតរបស់គណបក្សសង្គ្រោះជាតិ។ នេះបើតាមការបញ្ជាក់របស់លោក ម៉ៅ មុនីវណ្ណ ប្រធានស្តីទីគណៈកម្មការប្រតិបត្តិ របស់គណបក្សសង្គ្រោះជាតិ។
លោក ម៉ៅ មុនីវណ្ណ បានបន្តថា លោកសមរង្ស៊ី និងលោកកឹមសុខា ដែលកំពុងស្ថិតនៅក្រៅប្រទេស គ្រោងនឹងថ្លែងការណ៍ផ្ទាល់មាត់ មកចូលរួមក្នុងពិធីជួបជុំ នាព្រឹកថ្ងៃទី១៧មេសា តាមរយៈវិដេអូអ៊ិនថឺណេត កម្មវិធី Skype។
ក្រៅពីរម្លឹកដល់ថ្ងៃកាប់សម្លាប់មនុស្ស ក្នុងពេលខ្មែរក្រហមឡើងកាន់អំណាច ពិធីជួបជុំ នាថ្ងៃទី១៧មេសា ក៏ត្រូវបានលោក ម៉ៅ មុនីវណ្ណ បញ្ជាក់ថា គណបក្សសង្គ្រោះជាតិ ក៏ផ្ញើសារជំរុញឲ្យតុលាការចម្រុះ កាត់ទោសមេខ្មែរក្រហម បន្តដំណើរការកាត់ក្តី លើអតីតមេខ្មែរក្រហមបន្ថែមទៀត ដើម្បីផ្តល់យុត្តិធម៌ដល់វិញ្ញាណក្ខន្ធអ្នកស្លាប់ និងជនរងគ្រោះ ឲ្យទទួលបានយុត្តិធម៌។ ពោលគឺមិនមែនត្រឹមតែសំណុំរឿង០០១ និងសំណុំរឿង០០២ទេ តែតុលាការ ត្រូវបន្តដល់សំណុំរឿង០០៣ និង ០០៤ តទៅទៀត។
សំណុំរឿង០០៣ និង០០៤ ដែលមានជនជាប់ចោទជាអតីតមេខ្មែរក្រហម ៥ នាក់ផ្សេងទៀត កំពុងស្ថិតក្នុងភាពចម្រូងចម្រាស់។ ភាគីកម្ពុជា រាប់ចាប់នាយករដ្ឋមន្ត្រី រហូតដល់ចៅក្រម និងព្រះរាជអាជ្ញា មិនចង់ឲ្យសាលាក្តីខ្មែរក្រហម ចាត់ការលើសំណុំរឿង ០០៣ និង ០០៤ ទេ ដោយសំអាងលើការបែកបាក់សង្គម។ ប៉ុន្តែភាគីអន្តរជាតិ មកដល់ពេលនេះ កំពុងដំណើរការ ស៊ើបអង្កេតជាសំងាត់លើសំណុំរឿងក្តី ០០៣ និង ០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ