វិបត្តិនយោបាយកម្ពុជា៖ លោកសម រង្ស៊ី ស្វែងរកអន្តរាគមន៍ពីប្រទេសអូស្ត្រាលី
មេបក្សប្រឆាំងកម្ពុជា លោក សម រង្សី បានជួបជាមួយសមាជិកព្រឹទ្ធសភាអូស្ត្រាលីកាលពីថ្ងៃទី ១៨ មីនានៅទីក្រុង Canberra។ លោកក៏គ្រោងជួបជាមួយរដ្ឋមន្ត្រីការបរទេសអូស្ត្រាលី លោកស្រី Julie Bishop ផងដែរនៅថ្ងៃពុធនេះ។ គោលបំណងគឺដើម្បីស្វែងរកអន្តរាគមន៍ពីប្រទេសអូស្ត្រាលីឲ្យជួយដោះស្រាយវិបត្តិនយោបាយ និងជួយដាក់សម្ពាធលើរដ្ឋាភិបាលលោកនាយករដ្ឋមន្ត្រី ហ៊ុន សែនឲ្យដោះស្រាយតាមការទាមទារបស់បក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:០៤
ក្នុងជំនួបជាមួយសមាជិកព្រឹទ្ធសភាអូស្ត្រាលីកាលពីថ្ងៃអង្គារទី១៨ មីនា លោកសម រង្ស៊ី ប្រធានគណបក្សសង្គ្រោះជាតិបានជំរុញឲ្យអូស្ត្រាលីជួយអន្តរាគមន៍រកដំណោះស្រាយបញ្ហានយោបាយនៅកម្ពុជា។ មេដឹកនាំបក្សបប្រឆាំងអះអាងតាមបណ្តាញសង្គមហ្វេសប៊ុកថា ព្រឹទ្ធសមាជិកអូស្ត្រាលីសន្យាជំរុញឲ្យរដ្ឋាភិបាលរបស់ខ្លួនដាក់គំនាបលើរដ្ឋាភិបាលកម្ពុជាឲ្យបង្កើតគណៈកម្មការឯករាជ្យស៊ើបអង្កេតអំពីភាពមិនប្រក្រតីនៃការបោះឆ្នោត។
បើតាមសេចក្តីប្រកាសព័ត៌មានរបស់គណបក្សសង្គ្រោះជាតិ ក្នុងដំណើរទស្សនៈកិច្ចទៅកាន់ប្រទេសអូស្ត្រាលីរយៈពេលពីរសប្តាហ៍ លោក សម រង្ស៊ី ក៏គ្រោងជួបពិភាក្សាការងារជាមួយលោកស្រី Julie Bishop រដ្ឋមន្ត្រីការបរទេសអូស្រា្តលី និងមន្ត្រីអូស្ត្រាលីជាច្រើនទៀត។ គោលបំណងនៃជំនួបទាំងនោះគឺដើម្បីស្វែងរកអន្តរាគមន៍ឲ្យមានការដាក់សម្ពាធលើរដ្ឋាភិបាលក្រុងភ្នំពេញឲ្យដោះស្រាយវិបត្តិនយោបាយនៅក្នុងប្រទេសដែលអូសបន្លាយជិត ៨ខែទៅហើយ។
ក្នុងអំឡុងពេលទស្សនកិច្ចនៅកម្ពុជាកាលពីខែមុន ប្រមុខការទូតអូស្ត្រាលី លោកស្រី Julie Bishop ក៏បានពិភាក្សាបញ្ហាវិបត្តិនយោបាយជាមួយភាគីកម្ពុជាផងដែរ។ លោក ហោ ណាំហុង រដ្ឋមន្ត្រីការបរទេសកម្ពុជាបានប្រាប់សមភាគីអូស្ត្រាលីថា វិបត្តិនយោបាយនៅកម្ពុជាកើតឡើងដោយការរៀបចំជាមុនរបស់គណបក្សប្រឆាំងដែលបានប្រកាសមិនទទួលស្គាល់លទ្ធផលបោះឆ្នោតតាំងពីមុនពេលបោះឆ្នោតម្ល៉េះ។ លោក ហោ ណាំហុងបានបញ្ជាក់ជំហររបស់គណបក្សប្រជាជនកម្ពុជាថា នៅតែបើកទ្វារសម្រាប់ការចរចា តែរាល់បញ្ហាត្រូវដោះស្រាយនៅក្នុងរដ្ឋសភា។
យ៉ាងណាក៏ដោយ នៅក្នុងបទសម្ភាសន៍ជាមួយវិទ្យុអូស្ត្រាលីកាលពីថ្ងៃទី ១៨ មីនា លោក សម រង្ស៊ី បានព្រមានជាថ្មីថានឹងផ្តាច់ការចរចាហើយប្រកាសធ្វើបាតុកម្មតាមដងផ្លូវជាថ្មីប្រសិនបើកិច្ចចរចាស្តីពីកំណទម្រង់បោះឆ្នោតមិនទទួលបានលទ្ធផលទេនោះ។ ចំណែកឯអាជ្ញាធរកម្ពុជាវិញរួមទាំងយោធាផងបានប្រកាសការពាររដ្ឋាភិបាលនិងរដ្ឋធម្មនុញ្ញរបស់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ