កម្មកររោងចក្រ ខាំបូខូថប ស្លាប់ម្នាក់ និង ដួលសន្លប់ជាង ៤០នាក់
កម្មការនីម្នាក់ បានស្លាប់ និង ជាង៤០នាក់ ដួលសន្លប់ជាបន្តបន្ទាប់ នៅក្នុងរោចចក្រខាំបូខូថប (CAMBOKOTOP LTD) ដែលស្ថិតនៅខណ្ឌពោធិ៍សែនជ័យ នៅព្រឹកថ្ងៃសុក្រនេះ។ ការស្លាប់ និងដួលសន្លប់នេះ នៅមិនទាន់មានការបញ្ជាក់ច្បាស់លាស់ ថាមកពីមូលហេតុអ្វីនៅឡើយទេ ប៉ុន្តែ ក្រុមសហជីពសន្និដ្ឋានថា មកពីកម្មករខ្សោយកម្លាំង បូកផ្សំនិងបរិយាកាសក្នុងរោងចក្រមិនល្អ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
កម្មការនីម្នាក់ បានស្លាប់ និងជាង៤០នាក់ផ្សេងទៀត បានដួលសន្លប់ ជាបន្តបន្ទាប់ តាំងពីល្ងាចថ្ងៃព្រហស្បតិ៍ រហូតមកដល់ព្រឹកថ្ងៃសុក្រនេះ នៅក្នុងរោងចក្រខាំបូខូថប (CAMBOKOTOP LTD) ដែលស្ថិតនៅតាមបណ្តោយផ្លូវជាតិលេខ៤ ភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ ក្រុងភ្នំពេញ។ នេះបើតាម អ្នកស្រី ឆន សុខា មន្ត្រីកម្មវិធីសិទ្ធការងារនៃមជ្ឈមណ្ឌលច្បាប់សម្រាប់សហគមន៍ ដែលបានប្រាប់វិទ្យុបារាំង នៅរសៀលថ្ងៃសុក្រនេះ។
អ្នកស្រី ឆន សុខា បានឲ្យដឹងថា មិនទាន់មានការកំណត់ដើមចមនៃការដួលសន្លប់នេះនៅឡើយទេ។ ប៉ុន្តែអ្នកស្រីបានបញ្ជាក់ថា កម្មករចាប់ផ្តើមស្លុតស្មារតី និងដួលសន្លប់ ខណៈទទួលដំណឹងថា មានកម្មករម្នាក់ស្លាប់ ក្នុងពេលកំពុងធ្វើការ។ យ៉ាងណាក៏ដោយ អ្នកស្រី បាននិយាយថា ក្រុមសង្គមស៊ីវិល នឹងសហការជាមួយនិយោជក ដើម្បីបើកការស៊ើបអង្កេតរកហេតុផល នៃការដួលសន្លប់របស់កម្មករក្នុងរោងចក្រនេះ។
លោកអាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា បានប្រាប់វិទ្យុបារាំងអន្តរជាតិថា ការដួលសន្លប់មកពីកម្មករខ្សោយកម្លាំង ពីព្រោះពួកគេធ្វើការច្រើនម៉ោង ហូបចុកមិនគ្រប់គ្រាន់ ដោយសារប្រាក់ខែតិច បូកផ្សំនឹងបរិយកាសមិនល្អនៅក្នុងរោងចក្រ។ រីឯអ្នកស្លាប់ គឺដោយសារគាំងបេះដូង។
បើតាមការសាកសួរពីកម្មករ-កម្មាការនី ដែលធ្វើការក្នុងរោងចក្រ អ្នកស្រីសុខា បានប្រាប់ថា មូលហេតុនៃការស្លាប់ និងដួលសន្លប់កម្មករនេះ គឺដោយសារតែបរិយាកាស នៅជុំវិញរោងចក្រ មិនមានខ្យល់ចេញ-ចូលគ្រប់គ្រាន់។ ប៉ុន្តែកត្តានេះ មិនទាន់អាចកំណត់ថាជាមូលហេតុចម្បងបាននៅឡើយទេ។
សូមបញ្ជាក់ថា រោងចក្រខាំបូខូថប (CAMBOKOTOP LTD) គឺជារោងចក្រកាត់ដេរ ហើយរោងចក្រនេះមានកម្មករធ្វើការធម្មតានៅក្នុងថ្ងៃនេះ ដោយមិនមានកម្មករណាម្នាក់ធ្វើកូដកម្មមិនចូលធ្វើការនោះទេ។ បន្ទាប់ពីមានកម្មករដួលសន្លប់ រោងចក្រនេះបានបញ្ជូនកម្មករឲ្យទៅសម្រាកព្យាបាល ក្នុងមន្ទីរពេទ្យមួយចំនួន ហើយបានអនុញ្ញាតឲ្យកម្មករឈប់សម្រាកមួយរយៈនៅរសៀលថ្ងៃសុក្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ