លោក សម រង្ស៊ី ថ្លែងប្រាប់បាតុករថា ការជជែកជាមួយលោក ហ៊ុន សែន បានជោគជ័យ
ក្រោយពីបានជួបចរចារជាមួយតំណាងគណបក្សប្រជាជនកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន លោកសម រង្ស៊ី និងលោកកឹម សុខាបានមកជួបបាតុកររបស់ខ្លួននៅលើទីលានប្រជាធិបតេយ្យ។ នៅចំពោះមុខអ្នកគាំទ្រដែលកើនឡើងច្រើនម៉ឺននាក់ជាងពេលព្រឹក មេដឹកនាំគណបក្សសង្គ្រោះជាតិបានប្រកាសថា ពួកគេបានជោគជ័យក្នុងការទាមទារអោយអាជ្ញាធរបញ្ឈប់ការប្រើហិង្សា និងថាពួកគេនឹងបន្តស្វែងរកយុត្តិធម៌ជូនម្ចាស់ឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ប្រធាន និងអនុប្រធានគណបក្សសង្គ្រោះជាតិបានត្រឡប់មកជួបបាតុកររបស់ខ្លួននៅលើទីលានប្រជាធិបតេយ្យនៅល្ងាចថ្ងៃចន្ទ ដើម្បីនាំលទ្ធផលនៃកិច្ចប្រជុំជាមួយគណបក្សប្រជាជនកម្ពុជា។ នៅចំពោះមុខបាតុករដែលមានចំនួនកើនឡើងជាច្រើនម៉ឺននាក់នៅលើទីលានប្រជាធិបតេយ្យ លោកសម រង្ស៊ីបានប្រកាសថា លោកបានទាមទារពីលោកនាយករដ្ឋមន្ត្រី ធ្វើយ៉ាងណាមិនអោយអាជ្ញាធរប្រើប្រាស់ហិង្សាដាក់ក្រុមបាតុករទៀត។ ហើយថាលោកនឹងបន្តស្វែងរកយុត្តិធម៌ជូនម្ចាស់ឆ្នោតបន្តទៀត។ ការប្រកាសរបស់លោកសម រង្ស៊ីដែលបន្ទរដោយការសំឡេងហ៊ោអបអរពីអ្នកគាំទ្រ។
នៅវេទិកាដូចគ្នា លោកកឹម សុខាបានប្រកាសផងដែរ ថាលោកបានទាមទារអោយលោកនាយករដ្ឋមន្ត្រី និងលោកឧបនាយករដ្ឋមន្ត្រី ធ្វើអន្តរាគមន៍ដោះលែងសកម្មជននយោបាយដែលត្រូវបានចាប់ខ្លួនក្នុងរយៈពេលនៃការឃោសនាបោះឆ្នោត និងក្រោយថ្ងៃបោះឆ្នោត។ លោក កឹម សុខា បានប្រកាសអោយពលរដ្ឋដែលមានសាច់ញាតិដែលស្ថិតនៅក្នុងករណីទាំងនេះ បញ្ជូនឈ្មោះទៅលោក ដើម្បីលោកអាចសរសេរបញ្ជូនទៅលោកនាយករដ្ឋមន្ត្រី។
ទោះយ៉ាងណាក៏ដោយ ការទាមទារអោយបង្កើតគណៈកម្មការឯករាជ្យដើម្បីដោះស្រាយបញ្ហាបោះឆ្នោតនោះ នៅតែមិនទទួលបានជោគជ័យដដែល ដោយគណបក្សប្រជាជនកម្ពុជាចាត់ទុកថា ជាការងារហួសពេល។
យោងតាមមន្ត្រីគណបក្សសង្គ្រោះជាតិ គម្រោងនៃការធ្វើបាតុកម្មអហិង្សានឹងត្រូវបន្តដល់ថ្ងៃបញ្ចប់នៅថ្ងៃអង្គារទី១៧កញ្ញា។
នៅព្រឹកថ្ងៃចន្ទនេះ ការស្លាប់យុវជននៅស្ពានក្បាលថ្នល់បានក្លាយជាប្រធានបទលើទីលានប្រជាធិបតេយ្យ។ មន្ត្រីគណបក្សសង្គ្រោះជាតិ និងព្រះសង្ឃដែលនៅ បន្តចូលរួមក្នុងមហាបាតុកម្ម បានស្មឹងស្មាធិ៍ សូត្រមន្តបង្សុកូលឧទ្ទិសដល់វិញ្ញាណក្ខន្ធរបស់យុវជន មោង សុខចាន់ អាយុ២៩ឆ្នាំ ដែលជាពលរដ្ឋរស់នៅក្នុងសង្កាត់ចអង្រែក្រោម។
អ្នកសម្របសម្រួលនៅលើវេទិកា បានបន្តប្រកាសអំពីការចូលរួមថវិកាជាមូលនិធិពីប្រជាជនខ្មែរក្នុងស្រុក និងនៅបរទេស។ យូរម្តង អ្នកសម្របសម្រួលប្រកាសឡើងវិញអំពីក្រមសីលធម៌អ្នកការធ្វើបាតុកម្មអហិង្សា។ អ្នកសម្របសម្រួលដែលបានរម្លឹកអោយបាតុករទាំងអស់ប្រកាន់មុខងារ ជាបាតុករអហិង្សា កងជាកងសន្តិសុខ ជាអ្នកសារព័ត៌មានជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ