មេដឹកនាំគណបក្សប្រឆាំងព្រមានដឹកនាំធ្វើមហាបាតុកម្មទូទាំងប្រទេស បើនៅតែមិនមានដំណោះស្រាយ
ថ្លែងនៅកាន់ក្រុមបាតុករពេញមួយទីលានប្រជាធិបតេយ្យនៅព្រឹកថ្ងៃអាទិត្យនេះ ដែលជាថ្ងៃចាប់ផ្តើមមហាបាតុកម្មអហឹង្សាជាលើកទីពីរ មេដឹកនាំគណបក្សសង្គ្រោះជាតិ គឺលោក សម រង្ស៊ី និងលោក កឹម សុខា នៅតែបញ្ជាក់ប្រាប់ពីជំហររបស់ខ្លួនថា នឹងបន្តធ្វើបាតុកម្មរហូតដល់មានដំណោះស្រាយ ហើយនឹងមិនចូលរួមប្រជុំសភាដំបូងតាមការកោះអញ្ជើញរបស់ព្រះមហាក្សត្រទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅពេលដែលក្បួនបាតុកម្មដែលដឹកនាំដោយលោក សម រង្ស៊ី និង លោក កឹម សុខា ចេញពីទីស្នាក់ការគណបក្ស ពីរកន្លែងខុសគ្នា ធ្វើដំណើរមកដល់ទីលានប្រជាធិបតេយ្យនៅម៉ោងប្រហែល៩ព្រឹក ដោយមានបាតុករជាងពីរម៉ឺននាក់រងចាំរួចជាស្រេចហើយនោះ ថ្នាក់ដឹកនាំទាំងពីរបានឡើងថ្លែងសារនយោបាយម្តងម្នាក់ៗ ទៅកាន់ក្រុមអ្នកគាំទ្ររបស់ខ្លួនភ្លាមដោយមិនបង្អង់នោះដែរ។
បាតុករចូលរួមដែលមានកាន់បដាពាក្យស្លោក និងនៅក្បាលរបស់គេមា្នក់ៗ មានពាក់កំណាត់ពណ៌ចំរុះ ដែលមានសរសេរអក្សរបង្ហាញពីសារនៃការតវ៉ា។ ខណៈដែលឡានចំណុំមួយតោនកន្លះជាច្រើនគ្រឿងនៅតែបន្តដឹកបាតុករមកក្នុងទីលានបាតុកម្មនេះ។
ក្រោមកំដៅថ្ងៃយ៉ាងក្តៅ ក្រុមបាតុករនៅទីលានប្រជាធិបតេយ្យបានប្រមូលផ្តុំគ្នាតាំងពីព្រឹកព្រលឹម ដោយខ្លះឈរជ្រកនៅក្រោមតង់ និងខ្លះទៀតឈរនៅលើផ្លូវជុំវិញនោះ។ ពួកគេបានឈរស្តាប់ការថ្លែងសារនយោបាយរបស់ថ្នាក់ដឹកនាំគណបក្សដោយអារម្មណ៏ពុះកញ្ជ្រោល ជាមួយនឹងស្នូរទះដៃយ៉ាងកងរំពង។
នៅក្នុងការថ្លែងសារនយោបាយនោះហើយដែល លោក កឹម សុខា អនុប្រធានគណបក្សសង្គ្រោះជាតិ បញ្ជាក់ទៅកាន់អ្នកចូលរួមរាប់ម៉ឺននាក់ថា ប្រសិនបើក្នុងរយៈពេលបីថ្ងៃនេះ គណបក្សប្រជាជនកម្ពុជា មិនផ្តល់ដំណោះស្រាយជូនប្រជាពលរដ្ឋ ជាម្ចាស់ឆ្នោត គណបក្សសង្គ្រោះជាតិនឹងអំពាវឲ្យប្រជាពលរដ្ឋបន្តធ្វើមហាតុកម្មនៅទូទាំងប្រទេស។
ចំណែក លោក សម រង្ស៊ី បានអំពាវនាវឲ្យពលរដ្ឋ ព្រះសង្ឃ និងយុវជន ចូលរួមមហាបាតុកម្ម ឲ្យបានច្រើនកុះករ ដើម្បីបង្ហាញពីការមិនពេញចិត្ត និងភាពមិនសុខចិត្តទៅនឹងលទ្ធផលបោះឆ្នោត ដែលលោកបញ្ជាក់ថា មានភាពអយុត្តិធម៌យ៉ាងខ្លាំងនោះ។ លោកបញ្ជាក់ថា ម្ចាស់ឆ្នោត មិនអាចទទួលយកលទ្ធផលបំភ្លៃបានទេ។
យ៉ាងណាក៏ដោយ មេដឹកនាំទាំងពីររបស់គណបក្សសង្គ្រោះជាតិនៅតែបញ្ជាក់ជំហររបស់ខ្លួននៅចំពោះបារតុករយ៉ាងច្បាស់លាស់ថា តំណាងរាស្ត្រទាំង៥៥រូបនៃគណបក្សសង្គ្រោះជាតិមិនចូលរួមប្រជុំសភានៅថ្ងៃដំបូងជាដាច់ខាត ប្រសិនបើនៅតែមិនមានដំណោះស្រាយចំពោះលទ្ធផលបោះឆ្នោតកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ