គណបក្សសង្គ្រោះជាតិដាក់ពាក្យបណ្តឹងប្រឆាំងមន្ត្រី គ.ជ.ប ទៅតុលាការ
ពាក្យបណ្តឹងរបស់គណបក្សសង្គ្រោះជាតិប្រឆាំងមន្ត្រី គ.ជ.ប ត្រូវបានដាក់ទៅតុលាការសាលាដំបូងរាជធានីភ្នំពេញជាផ្លូវការហើយ កាលពីថ្ងៃទី១១កញ្ញា។ ពាក្យបណ្តឹងនោះបានប្តឹងចំៗ ឈ្មោះមន្ត្រី ៣រូប គឺលោក អ៊ឹម សួស្តី ប្រធានគ.ជ.ប លោក ទេព នីថា អគ្គលេខាធិការ និងលោក ហ៊ី រ៉ុង ប្រធាននាយកដ្ឋានប្រតិបត្តិ គ.ជ.ប ពីបទក្លែងបន្លំឯកសារសាធារណៈ និងបានប្រើប្រាស់ឯកសារសាធារណៈក្លែងក្លាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ពាក្យបណ្តឹងរបស់គណបក្សសង្គ្រោះជាតិប្រឆាំងមន្ត្រីគណៈកម្មាធិការជាតិរៀបចំការបោះឆ្នោត(គ.ជ.ប) បានទៅដល់ដៃតុលាការហើយ កាលពីថ្ងៃទី ១១កញ្ញា។ នេះបើយោងតាមសេចក្តីជូនដំណឹងរបស់គណបក្សសង្គ្រោះជាតិ នៅថ្ងៃព្រហស្បតិ៍ទី ១២ កញ្ញានេះ។
ពាក្យបណ្តឹងនោះបានប្តឹងចំឈ្មោះមន្ត្រីជាន់ខ្ពស់ គ.ជ.ប ចំនួន ៣រូប គឺលោក អ៊ឹម សួស្តី ប្រធាន គ.ជ.ប លោក ទេព នីថា អគ្គលេខាធិការ និងលោក ហ៊ី រ៉ុង ប្រធាននាយករដ្ឋានប្រតិបត្តិការរបស់ គ.ជ.ប។ នៅក្នុងពាក្យបណ្តឹងរបស់ខ្លួន គណបក្សសង្គ្រោះជាតិបានប្តឹងចោទមន្ត្រីទាំងបីពីបទក្លែងបន្លំឯកសារសាធារណៈដែលមាន៤ចំណុចគឺ ក្លែងបន្លំឈ្មោះអ្នកបោះឆ្នោតក្នុងបញ្ជីបោះឆ្នោត ក្លែងបន្លំលិខិតអត្តសញ្ញាណដើម្បីឲ្យមានអ្នកបោះឆ្នោតជំនួស ក្លែងបន្លំលទ្ធផលបោះឆ្នោត និងការរំលោភច្បាប់ បទបញ្ជា និងនីតិវិធីនៃការបោះឆ្នោត។
នៅក្នុងពាក្យបណ្តឹងនោះដែរ គណបក្សសង្គ្រោះជាតិបានលើកយកចំណុចជាច្រើនមកបញ្ជាក់លម្អិតមានដូចជា ការអនុញ្ញាតិឲ្យពលរដ្ឋម្នាក់ចុះឈ្មោះបានច្រើនកន្លែង ហើយមិនព្រមលុបឈ្មោះចាស់ អនុញ្ញាតឲ្យអ្នកគ្មានសិទ្ធិបោះឆ្នោតអាចបោះឆ្នោតបាន ការទុកឲ្យកញ្ចប់សុវត្ថិភាព«ក»មួយចំនួនបើកចំហ រួមទាំងការអនុញ្ញាតិឲ្យរថយន្តដែលជាសម្បត្តិរដ្ឋដឹកជញ្ជូនអ្នកបោះឆ្នោតជាដើម។
យ៉ាងណាក៏ដោយ ពាក្យបណ្តឹងនេះមិនបានធ្វើឲ្យមន្ត្រី គ.ជ.ប ភ្ញាក់ផ្អើលទេ។ លោក ទេព នីថា អគ្គលេខាធិការ គ.ជ.ប បានប្រាប់វិទ្យុបារាំងអន្តរជាតិថា លោកទើបតែបានឃើញកម្មវត្ថុនៃពាក្យបណ្តឹងនេះដែរ តែលោកមិនយល់ថា តើការក្លែងបន្លំឯកសារសាធារណៈដែលគណបក្សប្រឆាំងបានលើកឡើងនោះថា ជាអ្វីឲ្យពិតប្រាកដនោះទេ។ មន្ត្រី គ.ជ.ប ដដែលបន្តថា ស្ថាប័នរបស់លោកអនុវត្តតាមច្បាប់ និងនីតិវិធីតែប៉ុណ្ណោះ។
ទោះជាយ៉ាងណា លោក ទេព នីថា អះអាងថា មន្ត្រី គ.ជ.ប ដែលរងពាក្យបណ្តឹងនោះរង់ចាំជានិច្ចដើម្បីអនុវត្តតាមនីតិវិធីរបស់តុលាការ ហើយបានត្រៀមជាស្រេចដើម្បីឆ្លើយបំភ្លឺក្នុងករណីដែលតុលាការកោះអញ្ជើញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ