សមត្ថកិច្ចត្រួតពិនិត្យជាតិផ្ទុះនៅតាមបណ្ដាច្រកចូលរាជធានីភ្នំពេញមុនពេលមហាបាតុកម្ម
ខណៈពេលដែលមហាបាតុកម្ម នឹងប្រព្រឹត្តទៅ នៅពីរថ្ងៃខាងមុខ អ្នកធ្វើដំណើរចេញចូលរាជធានីភ្នំពេញត្រូវបានគេឆែកឆេរ រកអាវុធជាតិផ្ទុះ។ ការឆែកឆេររកអាវុធជាតិផ្ទុះពីសំណាក់សមត្ថកិច្ច និង កងរាជអាវុធហត្ថ នៅតាមបណ្ដាច្រកចូលរាជធានីភ្នំពេញនេះ ធ្វើឡើងដើម្បីត្រៀមលក្ខណៈការពារ និងពង្រឹងសន្ដិសុខ អំឡុងមហាបាតុកម្ម ។ នេះបើយោងតាមយោងតាម លោក ខេង ទីតូ អ្នកនាំពាក្យកងរាជអាវុធហត្ថ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
នៅថ្ងៃព្រហស្បតិ៍ ទី០៥ កញ្ញានេះ សមត្ថកិច្ច និង កងរាជអាវុធហត្ថបានរឹតបន្ដឹងការធ្វើចរាចរណ៍របស់ប្រជាពលរដ្ឋដែលចេញចូលក្នុងរាជធានីភ្នំពេញ ដោយឆែកឆេររកអាវុធជាតិផ្ទុះ ខណៈពេលដែលមហាបាតុកម្មរបស់គណបក្សសង្គ្រោះជាតិ នឹង ត្រូវគេធ្វើឡើង រយៈពេល ២ថ្ងៃខាងមុខ។ រថយន្តទាំងឡាយដែលធ្វើដំណើរចូលមករាជធានីភ្នំពេញត្រូវបានឆែកឆេរមុននឹងអនុញ្ញាតឲ្យបន្តដំណើរ។ ការឆែកឆេរនេះត្រូវបានសមត្ថកិច្ចនៅនឹងកន្លែងអះអាងថាដើម្បីត្រួតពិនិត្យរកអាវុធ ជាតិផ្ទុះ។
លោក ខេង ទីតូ អ្នកនាំពាក្យកងរាជអាវុធហត្ថ ប្រាប់វិទ្យុបារាំងអន្តរជាតិ ឲ្យដឹងថា ការឆែកឆេររកអាវុធជាតិផ្ទុះនេះធ្វើឡើង ក្នុងគោលបំណងការពារ និង ពង្រឹងសន្តិសុខសណ្ដាប់ធ្នាប់ក្នុងពេលដែលមានការប្រមូលផ្ដុំ ធ្វើបាតុកម្មនៅរាជធានីភ្នំពេញ។ ប៉ុន្តែ ក៏លោក ខេងទីតូ បញ្ជាក់ថា ពុំមានការឃាត់រថយន្ត ឬឃាត់មនុស្សទុកនោះទេ ប្រសិនបើពួកគេពុំមាន ផ្ទុកអាវុធជាតិផ្ទុះខុសច្បាប់នោះ។
អ្នកនាំពាក្យរូបនេះបន្តទៀតថា ប្រតិបត្តិការឆែកឆេរអាវុធនេះ នឹងបន្តធ្វើរហូតទាល់តែសភាពការណ៍ នៃការប្រមូលផ្ដុំចូលរួមបាតុកម្មនេះល្អឡើងវិញ ហើយការឆែកឆេរនេះគឺធ្វើតែនៅច្រកចូលភ្នំពេញប៉ុណ្ណោះ គ្មានឡើយការឆែកឆេរនៅតាមបណ្ដាខេត្តនានា។
គួររម្លឹកថា ស្ថានភាពនយោបាយក្នុងប្រទេសកម្ពុជា នៅតែតានតឹងបន្ទាប់ពីការបោះឆ្នោតជ្រើសរើសតំណាងរាស្ដ្រនីតិកាលទី៥ ។ លទ្ធផល និង ភាពមិនប្រក្រតីទាំងឡាយមុន និង ក្រោយបោះឆ្នោតគឺជា មូលហេតុជំរុញឲ្យមានការប្រមូលផ្ដុំប្រជាពលរដ្ឋចូលរួមធ្វើបាតុកម្មអហិង្សា ដែលរៀបចំឡើងដោយគណៈបក្សសង្គ្រោះជាតិ ដើម្បីឲ្យរដ្ឋាភិបាលយល់ព្រមបង្កើតគណៈកម្មការពិសេសឯករាជ្យដោះស្រាយ ភាពមិនប្រក្រតីទាំងនោះ។ ប្រឈមមុខនឹងបាតុកម្មនេះ សមត្ថកិច្ចបានរឹតបន្តឹងសន្តិសុខយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ