សហជីពក្នុងស្រុកនិងសហជីពអន្ដរជាតិស្នើរឲ្យអ្នកបញ្ជាទិញដាក់សម្ពាធទៅលើរោងចក្រកាត់ដេរ SL
សហភាពការងារកម្ពុជារបស់លោកអាត ធន់ បានជូនដំណឹងរួចរាល់ហើយ ស្ដីពីវិវាទការងាររវាងថៅកែរោងចក្រកាត់ដេរ SL និងកម្មករនិយោជិក។ ជាមួយគ្នានេះ សហជីពអន្ដរជាតិ ដែលមានសមាជិក៥០លាននាក់ ក៏កំពុងតែពិចារណានិងដាក់សម្ពាធ ទៅលើអ្នកបញ្ជាទិញផលិតផលនានាពីរោងចក្រ SL ស្របពេលដែលមន្ដ្រីរដ្ឋាភិបាលកំពុងរកវិធីដោះស្រាយដូចគ្នា លើបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
វិវាទរវាងកម្មករនិងនិយោជិកនៅរោងចក្រកាត់ដេរ SL បានឈានកាន់តែតានតឹងហើយរហូតមកទល់ថ្ងៃប្រហស្បតិ៍នេះ បន្ទាប់ពីភាគីរោងចក្រមិនបានបង្ហាញជំហរណាមួយតាមការទាមទារ របស់កម្មករក្នុងការស្នើដកអ្នកគ្រប់គ្រងខ្មែរដែលមានអំណាចនិងប្រដាប់អាវុធចេញពីរោងចក្រ។ ភាពតានតឹងនេះ ធ្វើឲ្យកូដកម្មដែលមានកម្មករចូលរួមជាច្រើនរយនាក់ បានអូសបន្លាយមកដល់សប្តាហ៍ទី២ហើយ។
ប្រធានសហភាពការងារលោក អាត់ ធន បានប្រាប់វិទ្យុបារាំងអន្តរជាតិ RFI ថាវិវាទដ៏រាំរៃនេះបានត្រូវចាប់អារម្មណ៍ពី សហជីពអន្តរជាតិ ដែលមានសមាជិក នៅលើពិភពលោក ៥០លាននាក់។ លោក អាត់ ធន ដែលជាមេដឹកនាំសហជីពឯករាជ្យមួយនៅស្រុកខ្មែរ និងជាសមាជិកនៃសហជីពអន្តរជាតិផងដែរនោះ បន្តថា លោកបានជូនដំណើររឿងសព្វគ្រប់អស់ហើយ ទៅកាន់សហជីពពិភពលោកមួយនេះ។ជាមួយគ្នានេះសហជីពអន្តរជាតិក៏កំពុងពិចារណាផងដែរ លើកករណីរំលោភសិទ្ធិកម្មករនេះ ដោយសន្យាថា នឹងស្នើទៅក្រុមហ៊ុនបញ្ជារទិញអន្តរជាតិប្រយោជន៍ដើម្បីដាក់សម្ពាធលើថៅកែរោងចក្រ SL។ រោងចក្រ SL ដែលមាទីតាំងនៅក្នុងខ័ណ្ឌមានជ័យនោះ ត្រូវបានគេស្គាល់ថាទទួលកម្មង់ដេរ និងបោកគក់ ផលិតផលសម្លៀកបំពាក់ធំៗលើពិភពលោកចំនួន ៣០ទីផ្សារ ក្នុងនោះ មាន H&M, Levy ,Shara, Gap។ល។
ទាក់ទងទៅនឹងករណីរោងចក្រ SLនេះដែរ ក្រសួងការងារកម្ពុជា ក៏ដូចជាសមាគមថៅកែរោងចក្រកាត់ដេរនៅប្រទេសកម្ពុជា ក៏មានសុឆន្ទៈអន្តរាគមន៍ ដើម្បីបញ្ចប់រឿង បញ្ចៀសការប្រឈមមុខដាក់គ្នារវាងអ្នកគ្រប់គ្រងរោងចក្រ និងកម្មករ។ ក៏ប៉ុន្តែជំហររបស់ថៅកែរោងចក្រមិនមានភាពច្បាស់លាស់ ក្នុងការធ្វើសម្បទានដើម្បីដោះស្រាយបញ្ហា, នេះបើតាមមន្ត្រីនានាដែលជាប់ពាក់ព័ន្ធនឹងដំណោះស្រាយបញ្ហារោងចក្រ SL។ថៅកែរោងចក្រ SL មិនអាចសុំធ្វើអត្ថាធិប្បាយបានទេនៅពេលនេះ។
សូមរំលឹកថា កម្មកររោងចក្រ SL ជាងពាក់កណ្តាលក្នុងចំណោមកម្មករសរុបចំនួន៥ពាន់នាក់បានសម្រេចចិត្តធ្វើកូដកម្មកាលពីថ្ងៃទី ១២ខែសីហា បន្ទាប់ពីថៅកែរោងចក្របដិសេធនូវការទាមទាររបស់ពួកគេ។ដោយរងនូវសម្ពាធការងារកាន់តែខ្លាំងទៅៗ ក្រុមកម្មករបានធ្វើកូដកម្មដោយស្នើរឲ្យក្រុមហ៊ុនដោះស្រាយលក្ខខ័ណ្ឌការងារប្រមាណជា ១០ចំណុច ក្នុងនោះការស្នើឲ្យដកអ្នកគ្រប់គ្រងដែលប្រើអំណាចសម្លុត គម្រាមកំហែងចេញ ហើយវិលទៅរកស្ថានភាពដូចកាលពីអតីតកាល។ ក៏ប៉ុន្តែក្រុមហ៊ុនមិនទទួលយក ហើយចាត់ទុកថាចំណុចដ៏សំខាន់ដែលបានលើកឡើងដោយកម្មករនេះ គឺជាឧបសគ្គដែលមិនអាចបន្តជជែករឿងផ្សេងៗទៀតបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ