គណបក្សជាប់ឆ្នោតបែរខ្នងដាក់គ្នាក្រោយការប្រកាសលទ្ធផលបណ្តោះអាសន្ន
គណបក្សជាប់ឆ្នោតទាំងពីរនៅតែបន្តបែរខ្នងដាក់គ្នាដដែល ទោះបីជាពួកគេមិនយល់ស្របគ្នាចំពោះលទ្ធផលនៃការបោះឆ្នោតក៏ដោយ។ គណបក្សប្រជាជនកម្ពុជាដែលបានប្រគល់តួនាទីសម្របសម្រួលទៅឲ្យ គ.ជ.ប. អះអាងថា រង់ចាំតែការកោះហៅរបស់ស្ថាប័ននេះដើម្បីជួបពិភាក្សាជាថ្មីជាមួយបក្សប្រឆាំង។ ប៉ុន្តែ គណបក្សសង្គ្រោះជាតិវិញ ដែលបដិសេធតួនាទីរបស់ គ.ជ.ប នោះ ក៏នៅមិនខ្ចីបោះដៃរកគូទំនាស់របស់ខ្លួនមុនដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
វិបត្តិនយោបាយក្រោយការបោះឆ្នោតកំពុងតែជាប់ផុងកាន់តែជ្រៅ ប៉ុន្តែ ភាគីជម្លោះនៅតែមិនបោះដៃរកគ្នាដដែល។ លោក ជាម យៀប សមាជិកជាន់ខ្ពស់គណបក្សប្រជាជនកម្ពុជាបានប្រាប់វិទ្យុបារាំងអន្តរជាតិនៅថ្ងៃនេះថា គណបក្សរបស់លោកនៅរង់ចាំជួបប្រជុំជានិច្ចជាមួយគណបក្សសង្គ្រោះជាតិក្នុងករណីដែល គ.ជ.ប. កោះហៅ។ បើតាមលោក ជាម យៀប គណបក្សកាន់អំណាចបានប្រគល់តួនាទីជាប្រធានគណៈកម្មការចម្រុះទៅឲ្យ គ.ជ.ប រួចហើយ។
ប៉ុន្តែ គណបក្សសង្គ្រោះជាតិដែលបដិសេធតួនាទីរបស់ គ.ជ.ប តាំងពីដើមទីមកនោះក៏នៅមិនទាន់បង្ហាញសញ្ញាណាមួយទៅរកគូបដិបក្ខនៅឡើយដែរ។ លោក យឹម សុវណ្ណ អ្នកនាំពាក្យគណបក្សនេះបានអះអាងនៅថ្ងៃនេះថា គណបក្សសង្គ្រោះជាតិនៅមិនទាន់សម្រេចអ្វីថ្មីខុសពីការប្រកាសក្នុងសន្និសីទកាសែតកាលពីថ្ងៃចន្ទនោះឡើយ។
តាមរយៈសន្និសីទកាសែតនោះ គណបក្សសង្គ្រោះជាតិបានបដិសេធលទ្ធផលបណ្តោះអាសន្នដែលប្រកាសដោយ គ.ជ.ប និងចាត់ទុកការប្រកាសនេះថា ជាការបញ្ឆេះកំហឹងរបស់ប្រជាពលរដ្ឋ។ គណបក្សនេះបានព្រមានជាថ្មីថា ប្រសិនបើមានបាតុកម្មកើតឡើងគឺ គ.ជ.ប. និងគណបក្សប្រជាជនកម្ពុជាជាអ្នកទទួលខុសត្រូវ។
សូមបញ្ជាក់ថា ការបង្កើតគណៈកម្មការចម្រុះដើម្បីត្រួតពិនិត្យភាពមិនប្រក្រតីក្នុងការបោះឆ្នោតបានជាប់គាំង ដោយសារគណបក្សទាំងពីរបានខ្វែងគំនិងគ្នាត្រង់សមាសភាពគណៈកម្មការ។ គណបក្សប្រជាជនចង់ឲ្យ គ.ជ.ប ធ្វើជាប្រធាន និងមានសមាជិកតែពីរគណបក្សប៉ុណ្ណោះ។ ចំណែកឯបក្សប្រឆាំងបដិសេធតួនាទីរបស់ស្ថាប័នគ.ជ.ប និងចង់ឲ្យអង្គការជាតិ និងអន្តរជាតិមានតួនាទីក្នុងគណៈកម្មការ ដោយមានសហប្រជាជាតិជាអ្នកសង្កេតការណ៍។
លោក ទេព នីថា អគ្គលេខា គ.ជ.ប បានបញ្ជាក់ជាថ្មីនៅថ្ងៃនេះថា ការបង្កើតគណៈកម្មការចម្រុះមិនអាចទៅរួចទេពីព្រោះគណបក្សសង្គ្រោះជាតិមិនបានឆ្លើយតបអ្វីទៅនឹងសំណើរបស់ គ.ជ.ប ឡើយ។ ដូច្នេះ គ.ជ.ប នឹងមិនកោះប្រជុំអ្វីទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ