ADB៖ សេដ្ឋកិច្ចកម្ពុជានៅតែមានភាពរឹងមាំ ប៉ុន្តែកង្វះជំនាញ ធ្វើឲ្យកំណើនមានភាពយឺតយ៉ាវ
ធនាគារអភិវឌ្ឍន៍អាស៊ី ADB បានប្រកាសនូវលទ្ធផលរបាយការណ៍ថ្មីមួយ ព្យាករសេដ្ឋកិច្ចថា កំណើនសេដ្ឋកិច្ចកម្ពុជា នៅឆ្នាំ២០១១ កើនឡើងដល់ ៦,៨%។ ចំណែកឆ្នាំ២០១២ កំណើនសេដ្ឋកិច្ចកម្ពុជា បានថយចុះមកនៅត្រឹមតែ ៦,៥%។ ក៏ប៉ុន្តែ ADB បានមើលឃើញថា នៅឆ្នាំ២០១៣ សេដ្ឋកិច្ចកម្ពុជានឹងកើនឡើងដល់ ៧%។ ជាមួយនឹងការសន្មតដូច្នេះ ADB បានលើកឡើងថា សេដ្ឋកិច្ចរបស់ប្រទេសកម្ពុជា នៅតែមានភាពរឹងមាំ ប៉ុន្តែកង្វះជំនាញ ធ្វើឲ្យកំណើនមានភាពយឺតយ៉ាវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
របាយការណ៍ប្រចាំឆ្នាំ របស់ធនាគារអភិវឌ្ឍន៍អាស៊ី ដែលមានឈ្មោះថា "ទស្សនវិស័យអភិវឌ្ឍន៍អាស៊ី ២០១២ ( ADO 2012 )" ត្រូវបានប្រកាសនៅព្រឹកថ្ងៃទី១១មេសា ឆ្នាំ២០១២ នោះគឺកំណើនសេដ្ឋកិច្ចកម្ពុជានៅឆ្នាំ២០១២ បានថយចុះបន្តិច។ គឺថយពី ៦,៨% នៅក្នុងឆ្នាំ២០១១ មកនៅត្រឹម ៦,៥ % នៅឆ្នាំ២០១២។ សេដ្ឋកិច្ចកម្ពុជាក៏នឹងកើនឡើងដល់ ៧% នៅឆ្នាំ២០១៣។ ADB បានលើកឡើងថា ការព្យាករពីកំណើនសេដ្ឋកិច្ចកម្ពុជាយ៉ាងដូច្នេះ ដោយផ្អែកលើកំណើននៃការនាំចេញសម្លៀកបំពាក់ និងស្បែកជើង ការនាំចេញអង្ករ ព្រមទាំងការកើនឡើងនូវចំនួនទេសចរបរទេស។ ក្នុងនោះ កំណើននៃវិស័យសេវាកម្ម និងទស្សនវិស័យសេដ្ឋកិច្ចជាសកល ដែលមានស្ថិរភាពជាងមុន។
ចំពោះការព្យាករពីកំណើនសេដ្ឋកិច្ចកម្ពុជា ថានឹងថយចុះមកនៅត្រឹម ៦,៥% នៅឆ្នាំ ២០១២ ត្រូវបាន ADB សន្មតថា បណ្តាលមកពីការថយចុះនូវការនាំចេញនៃវិស័យឧស្សាហកម្ម និងការកើនឡើងបន្តិចបន្តួចប៉ុណ្ណោះ នៃកំណើនក្នុងវិស័យសេវាកម្ម និងកសិកម្ម។ កំណើនក្នុងវិស័យឧស្សាហកម្ម ដោយមានការជំរុញពីការនាំចេញសម្លៀកបំពាក់ និងស្បែកជើង ទៅកាន់សហរដ្ឋអាមេរិក និងសហភាពអឺរ៉ុប នឹងថយចុះមកនៅត្រឹម ១១,៤%។
តាម ADB ការថយចុះនៃកំណើនសេដ្ឋកិច្ចកម្ពុជាបន្តិចបន្តួច នៅឆ្នាំ២០១២ ក៏មកពីសេដ្ឋកិច្ចរបស់សហភាពអឺរ៉ុប និងសហរដ្ឋអាមេរិកដែលជាទីផ្សារនាំចេញដ៏សំខាន់របស់ប្រទេសកម្ពុជា។
លោក Peter Brimble អនុប្រធានប្រចាំប្រទេស និងជាសេដ្ឋកិច្ចវិទូជាន់ខ្ពស់របស់ធនាគារអភិវឌ្ឍន៍អាស៊ីប្រចាំប្រទេសកម្ពុជាបានលើកឡើងថា "បើទោះបីជាមានគ្រោះទឹកជំនន់អាក្រក់បំផុត ដែលមិនធ្លាប់មាន ក្នុងរយៈពេលជាងមួយទស្សវត្សរ៍កន្លងមកនេះ កើតមានឡើងកាលពីឆ្នាំមុន និងបើទោះបីជាមានភាពមិនប្រាកដប្រជាក្នុងកម្រិតខ្ពស់ និងកលយុគសេដ្ឋកិច្ចក្នុងសកលលោកក៏ដោយ ក៏ប្រទេសកម្ពុជាត្រូវបានគេរំពឹងទុកថា នឹងបង្ហាញពីកំណើនសេដ្ឋកិច្ចដ៏រឹងមាំ នៅក្នុងរយៈពេលពីរឆ្នាំខាងមុខ។
ប៉ុន្តែភាពមិនសមាមាត្រនៃធនធានមនុស្ស និងទីផ្សារជំនាញដែលកាន់តែរីកធំ នៅក្នុងរយៈ ពេលប៉ុន្មានឆ្នាំចុងក្រោយនេះ រំលេចឲ្យឃើញពីភាពចាំបាច់ ដើម្បីធ្វើឲ្យសាលារៀន និងស្ថាប័នបណ្តុះបណ្តាលវិជ្ជាជីវៈ ឲ្យមកនៅកៀកសហគមន៍ធុរកិច្ចសំដៅបង្កើនគុណភាព និងភាពពាក់ព័ន្ធទៅនឹងតម្រូវការទីផ្សារ។ យ៉ាងណាក៏ដោយ ADB បានលើកឡើងពីអតិផរណាទំនិញឡើងថ្លៃ នៅក្នុងឆ្នាំ២០១២ និងឆ្នាំ២០១៣ នឹងថយចុះមកនៅត្រឹមប្រមាណ ៥% គិតជាមធ្យមប្រចាំឆ្នាំ ខណៈដែលឆ្នាំ២០១១ អតិផរណា មានកម្រិត ៥,៥%។ ក៏ប៉ុន្តែការឡើងថ្លៃប្រេងជាសកលនៅឆ្នាំ២០១២ អាចធ្វើឲ្យការព្យាកររបស់ ADB ពីអតិផរណាខុសបន្តិចបន្តួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ