ករណីអភិបាលក្រុងបាវិតដែលជាជនសង្ស័យបាញ់កម្មករក្រោមការតាមដាន
ព័ត៌មានស្តីពីការចាប់ខ្លួនអភិបាលក្រុងបាវិតដែលជាជនសង្ស័យបាញ់ទៅលើកម្មការិនីឲ្យរបួស៣នាក់កាលពីថ្ងៃទី២០កុម្ភៈកំពុងក្លាយជាប្រធានបទនៃការតាមប្រមាញ់របស់ក្រុមអ្នកកាសែតនិងអង្គការសិទ្ធិមនុស្សយ៉ាងសកម្ម។ នៅថ្ងៃសៅរ៍នេះមានព័ត៌មានលេចលឺថា លោក ឈូក បណ្ឌិត ត្រូវបានសមត្ថកិច្ចចាប់ខ្លួនបញ្ជូនទៅតុលាការហើយកាលពីល្ងាចថ្ងៃសុក្រម្សិលមិញនេះប៉ុន្តែ ទីបំផុតទៅទាំងព្រះរាជអាជ្ញាតុលាការ ទាំងសមត្ថកិច្ចប៉ូលិសបានបដិសេធថាមិនទាន់មានការចាប់ខ្លួនជនសង្ស័យរូបនេះនៅឡើយទេ។ យ៉ាងណាក៏ដោយ សំណុំរឿងនេះកំពុងក្លាយជាកម្មវត្ថុនៃការតាមដានយ៉ាងសកម្មពីអង្គការសិទ្ធិមនុស្ស និងសហជីពកម្មករ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ជនសង្ស័យថាបានបាញ់ប្រហារទៅលើកម្មករនៅក្រុងបាវិតដែលមានឋានៈដល់ទៅចៅហ្វាយក្រុងនោះនៅមិនទាន់ត្រូវបានចាប់ខ្លួននៅឡើយទេរហូតដល់ថ្ងៃសៅរ៍នេះបើទោះបីជាក្រសួងមហាផ្ទៃបានប្រកាសជាចំហពីអត្តសញ្ញាណជនសង្ស័យហើយក៏ដោយ។ នៅព្រឹកថ្ងៃសៅរ៍នេះមានព័ត៌មានច្របូកច្របល់មួយចំនួនបានកើតឡើងស្តីពីការចាប់ខ្លួនលោក ឈូក បណ្ឌិត អភិបាលក្រុងបាវិត។ ប្រភពពីក្រុមអង្គការការពារសិទ្ធិមនុស្សខ្លះបានអះអាងថា ជនសង្ស័យត្រូវបានគេចាប់ខ្លួនហើយតាំងពីល្ងាចថ្ងៃសុក្រម្សិលមិញ។
ប៉ុន្តែ ទីបំផុតទៅ ទាំងសមត្ថកិច្ចប៉ូលិស ទាំងមន្ត្រីតុលាការខេត្តស្វាយរៀងបានបញ្ជាក់ថា គ្មានការចាប់ខ្លួនអភិបាលក្រុងដែលជាជនសង្ស័យនៅឡើយទេ។ យ៉ាងណាក៏ដោយ ក្រុមអ្នកកាសែត និងសកម្មជនការពារសិទ្ធិមនុស្សរួមទាំងសហជីពកម្មករផងកំពុងតាមដានយ៉ាងយកចិត្តទុកដាក់ចំពោះសំណុំរឿងនេះ។ លោក ចាន់ សូវ៉េត មន្ត្រីផ្នែកស៊ើបអង្កេតរបស់សមាគម អាដហុក បានប្រាប់វិទ្យុបារាំងអន្តរជាតិនៅថ្ងៃនេះថា សកម្មជនរបស់លោកក៏បានទទួលព័ត៌មានដ៏ច្របូកច្របល់នេះដែរ ហើយពួកគេកំពុងតាមដានយ៉ាងសកម្មនីតិវិធីនៃការចាប់ខ្លួននេះ។ លោក ហ៊ីង ប៊ុនជា ព្រះរាជអាជ្ញាតុលាការខេត្តស្វាយរៀងបានអះអាងប្រាប់អ្នកកាសែតនៅថ្ងៃនេះថា សំណុំរឿងនេះកំពុងស្ថិតក្នុងដៃរបស់លោក ហើយលោកព្រះរាជអាជ្ញាកំពុងតែពិនិត្យសំណុំរឿងនៅឡើយ។
លោកឈូក បណ្ឌិត អភិបាលក្រុងបាវិត ខេត្តស្វាយរៀង ត្រូវបានក្រសួងមហាផ្ទៃរកឃើញថា ជាជនសង្ស័យបាញ់ប្រហារទៅលើកម្មករបណ្តាលឲ្យរបួសធ្ងន់៣នាក់ខណៈដែលក្រុមកម្មករធ្វើកូដកម្មឈានដល់ផ្ទុះអំពើហិង្សាកាលពីថ្ងៃទី២០កុម្ភៈ។ ក្រោយការស៊ើបអង្កេត ក្រសួងមហាផ្ទៃបានដាក់សំណុំរឿងជូនតុលាការខេត្តស្វាយរៀងជាអ្នកចាត់ការតាមនីតិវិធីច្បាប់។ ប៉ុន្តែ មកទល់ពេលនេះជនសង្ស័យនៅតែមានសេរីភាពនៅឡើយ។ ការយឺតយ៉ាវនៃចំណាត់ការរបស់ក្រសួងមហាផ្ទៃ ក៏ដូចជារបស់តុលាការដែរបាននាំឲ្យមានក្តីបារម្ភពីសំណាក់សកម្មជនសិទ្ធិមនុស្សនិងសហជីពកម្មករ។ យ៉ាងណាក៏ដោយ ពួកគេនៅតែសង្ឃឹមថា ជនសង្ស័យនឹងត្រូវគេចាប់ខ្លួនយកទៅផ្តន្ទាទោសក្នុងពេលឆាប់ៗបំផុតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ