ក្រសួងព័ត៌មានព្រមានសារព័ត៌មានមិនអោយផ្សាយរូបភាពហឹង្សា
រដ្ឋមន្ត្រីក្រសួងព័ត៌មានបានជូនដំណឹងដល់ម្ចាស់សារព័ត៌មានទាំងអស់អោយបញ្ឈប់ការផ្សព្វផ្សាយទាំងស្រុងនូវរូបភាពហឹង្សា រូបភាពគ្រោះថ្នាក់ចរាចរគួរអោយរន្ធត់ ហើយមិនបានបិទបាំងអត្តសញ្ញាណមនុស្សទាំងនោះ។ រដ្ឋមន្ត្រីក្រសួងព័ត៌មានលោកខៀវ កាញារីទ្ធបានរម្លឹកឡើងវិញថាការផ្សព្វផ្សាយនូវរូបភាពទាំងនេះ គឺជាការអនុវត្តន៍ប្រាសចាកក្រមសីលធម៌អ្នកសារព័ត៌មាន និងបានប៉ះពាល់ដល់សិទ្ធិរស់នៅជាឯកជនរបស់បុគ្គលទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
រដ្ឋមន្ត្រីក្រសួងព័ត៌មានលោកខៀវ កាញារីទ្ធបានផ្សាយសេចក្តីណែនាំជាសាធារណៈមួយដល់ម្ចាស់និងអ្នកគ្រប់គ្រងការបោះពុម្ពផ្សាយសារព័ត៌មាន ទស្សនាវដ្តី និងព្រឹត្តិបត្រទាំងអស់នៅកម្ពុជា អោយពួកគេបញ្ឈប់ទាំងស្រុងនូវការផ្សព្វផ្សាយរូបភាពដែលអសីលធម៌ ខុសឆ្គងពីក្រមសីហធម៌វិជ្ជាជីវៈសារព័ត៌មាន។ រដ្ឋមន្ត្រីក្រសួងព័ត៌មានដែលធ្លាប់ធ្វើសេចក្តីជូនដំណឹងដូចគ្នានេះក្នុងពេលកន្លងមកហើយនោះ កំពុងនិយាយផ្តោតទៅលើការផ្សព្វផ្សាយរូបភាពហឹង្សាលើស្ត្រីនិងកុមារ រូបភាពគ្រោះថ្នាក់ចរាចរណ៍គួរអោយខ្លាច និងរូបភាពឧក្រិដ្ឋកម្មជាដើម។
បើយោងតាមកត់សម្គាល់របស់លោករដ្ឋមន្ត្រី សារព័ត៌មានខ្លះបានចុះផ្សាយរូបភាពជនរងគ្រោះដោយមិនបានបិទបាំងអត្តសញ្ញាណទៀតផង។ ហើយដែលប្រការនេះបានធ្វើអោយប៉ះពាល់ដល់កិត្តិយស និងសិទ្ធិរស់នៅជាលក្ខណៈឯកជនរបស់បុគ្គល។
ការណែនាំរបស់រដ្ឋមន្ត្រីក្រសួងព័ត៌មានកើតមានឡើងនៅពេលដែលការផ្សព្វផ្សាយរូបភាពផ្ទុយក្រមសីលធម៌វិជ្ជាជីវៈសារព័ត៌មានទាំងនេះ នៅតាមកាសែត និងទស្សនាវដ្តីនានាកំពុងកក្រើកឡើងវិញ។
ក្លឹបអ្នកកាសែតកម្ពុជាធ្លាប់បានរៀបចំកិច្ចប្រជុំថ្នាក់ដឹកនាំសារព័ត៌មានទាំងឡាយដើម្បីពិភាក្សាអំពីការតាំងចិត្តកាត់បន្ថយការផ្សព្វផ្សាយរូបភាពឧក្រិដ្ឋកម្ម គ្រោះថ្នាក់ចរាចរ និងរូបភាពហឹង្សានៅលើទំព័រសារព័ត៌មានរបស់ពួកគេដែរក្នុងពេលកន្លងមក។ ប៉ុន្តែការអនុវត្តមិនមាននិរន្តរភាពជាទូទៅនោះឡើយ។ វាហាក់ដូចជាមានការពិបាកក្នុងការអនុវត្តន៍ការប្តេជ្ញាចិត្តនេះ នៅពេលដែលអ្នកអានហាក់មានទម្លាប់ចង់ឃើញរូបភាពអាក្រក់ទាំងនេះហើយនោះ។ ហើយម្ចាស់សារព័ត៌មានខ្លះអះអាងថា អវត្តមាននៃរូបថតអាក្រក់ទាំងនេះ បានធ្វើអោយចំនួននៃការលក់ធ្លាក់ចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ