មនុស្សយ៉ាងតិច៥ម៉ឺននាក់នឹងចូលរួមបុណ្យសមុទ្រនៅថ្ងៃដាច់ឆ្នាំ២០១១
មនុស្សយ៉ាងតិច៥ម៉ឺននាក់នឹងចូលរួមអបអរសាទរបុណ្យសមុទ្រនៅថ្ងៃដាច់ឆ្នាំ២០១១។ លោក ថោង ខុន រដ្ឋមន្រ្តីក្រសួងទេសចរណ៍បានបញ្ជាក់ប្រាប់នៅថ្ងៃសៅរ៍នេះពីខេត្តព្រះសីហនុមកថា បន្ទប់សណ្ឋាគារនិងផ្ទះសំណាក់ទាំងអស់នៅក្នុងខេត្តត្រូវបានគេកក់ទុកជាមុនអស់ហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ប្រជាជនខ្មែរនិងជនជាតិបរទេសមកពីគ្រប់ទិសទីនៃប្រទេសកម្ពុជាប្រមាណជា៥ម៉ឺននាក់នឹងទៅចូលរួមអបអរសាទរពិធីបុណ្យសមុទ្រនៅក្នុងខេត្តព្រះសីហនុនៅដំណាច់ឆ្នាំ២០១១នេះ។ នេះបើយោងតាមការប៉ាន់ស្មានរបស់លោក ថោង ខុន រដ្ឋមន្រ្តីក្រសួងទេសចរណ៍ដែលបានប្រាប់វិទ្យុបារាំងអន្តរជាតិនៅថ្ងៃសៅរ៍នេះពីតំបន់ឆ្នេរតាមរយៈទូរស័ព្ទ។
នៅថ្ងៃទី៣១ខែធ្នូឆ្នាំ២០១១ដែលជាថ្ងៃចុងក្រោយនៃឆ្នាំចាស់ ក្រុងព្រះសីហនុនឹងរៀបចំសកម្មភាពជាច្រើនដើម្បីអបអរសាទរពិធីបុណ្យសមុទ្រដូចជា៖ការរៀបចំមហោស្រពម្ហូបអាហារអាស៊ី អឺរ៉ុប ការប្រកួតកីឡា ការសម្តែងសិល្បៈ។ល។
លោករដ្ឋមន្រ្តីក្រសួងទេសចរណ៍បានបញ្ជាក់ប្រាប់ទៀតថា បន្ទប់សណ្ឋាគារ បន្ទប់ផ្ទះសំណាក់នៅខេត្តព្រះសីហនុដែលមានប្រមាណជា៤ពាន់បន្ទប់ត្រូវបានអតិថិជនកក់អស់ហើយចាប់ពីថ្ងៃនេះតទៅ។
ដោយសារកន្លែងស្នាក់នៅមានកំណត់ ឥឡូវនេះ ស្ថាប័នពាក់ព័ន្ធចាប់ផ្តើមដំឡើងស្តង់នៅតាមតំបន់ឆ្នេរដើម្បីទុកសម្រាប់ជួលជូនអតិថិជនដែលមានបំណងចង់ចូលរួមពិធីបុណ្យសមុទ្រដែរ។ ប្រជាជននៅក្នុងខេត្តព្រះសីហនុបាននិយាយប្រាប់ថា សេវាកម្មជាច្រើនត្រូវបានគេដំឡើងថ្លៃគួរសមនៅពេលបុណ្យសមុទ្រនេះពីព្រោះមនុស្សម្នាជាច្រើនមកលេងក្រុងព្រះសីហនុ។
នៅថ្ងៃសៅរ៍នេះ លោក រដ្ឋមន្រ្តីក្រសួងទេសចរណ៍ ថោង ខុន បានជួបប្រជុំជាមួយប្រតិបត្តិករទេសចរណ៍នៅក្រុងព្រះសីហនុដើម្បីជំរុញអោយពួកគេពង្រឹងសេវាកម្មទេសចរណ៍នៅថ្ងៃបុណ្យសមុទ្រខាងមុខនេះ។
ងាកមកនិយាយពីសកម្មភាពកីឡាវិញ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកបាននិយាយប្រាប់នៅថ្ងៃសៅរ៍នេះថា កីឡា៨ប្រភេទនឹងចូលរួមបង្ហាញនៅថ្ងៃបុណ្យសមុទ្រនេះក្នុងនោះមានកីឡាលើឆ្នេរនិងកីឡាក្នុងសមុទ្រ។ លោក ចំរើន បានបន្តទៀតថា កីឡាគឺជាផលិតផលទេសចរណ៍ថ្មីសម្រាប់ទាក់ទាញភ្ញៀវទេសចរខ្មែរនិងបរទេស។
ក្រោយពីបុណ្យសមុទ្រនេះនិងក្រោយពេលដែលសមុទ្រខ្មែរត្រូវបានគេដាក់បញ្ចូលក្នុងក្លឹបដែលមានឆ្នេរល្អជាងគេក្នុងពិភពលោកនោះ គេសង្ឃឹមថា សមុទ្រខ្មែរនឹងអាចទាក់ទាញភ្ញៀវទេសចរខ្មែរនិងបរទេសបានកាន់តែច្រើននៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ